ಎಂಕಲೆನ್ ಮಿತ್ತ್ ದೆಪ್ಪೋಡು, ಮಸಣದ ಕಂಡೊಡು ಕಾಟ ಗೂರೊಡು. ಭೂಮಿಗ್ ಬೊಣ್ಯ, ಆಕಾಸೊಗು ಪುಗೆ ಮಲ್ಪೊಡು.
ಓ ಅಪ್ಪಾ! ಓ ಅಮ್ಮೆರೇ! ಪುಣ್ಯದ ಫಲ ಆದ್ ಪುಟ್ಟಿ ಜೋಕುಲೆಂಕುಲು. ನಿಕಲೆ ಕಣ್ಣ್ ಗ್ ಮಣ್ಣ್ ಸುಣ್ಣ ಪಾಡಿಯ.
ಅರ್ತಿಡ್ ತಾಂಕಿಯೆರ್.ಮೋಕೆಡ್ ತೂಯೆರ್. ಎಂಕಲೆ ತರೆಕ್ಕ್ ನಾಲರಿ ಪಾಡೊಡು. ಎಂಕಲೆ ಪೊರ್ಲು ಪೋಲ್ಯ ತೂವೊಡುಂದು ಆಸೆ ಮಲ್ತರ್.
ಆಂಡ ಎಂಕುಲು ರುಣದಾಂತಿ ಜೋಕುಲು. ಪುಣ್ಯದಾಂತಿ ನಿಕಲೆಗ್ ಪುಟಿಯ.
“ಓ ಅಮ್ಮೆರೇ! ಓ ಅಪ್ಪಾ ನಿಕುಲು ದುಃಖ ಮಲ್ಪರೆ ಬಲ್ಲಿ. ಎಂಕಲೆನ್ ಬೆಮ್ಮೆರೇ ಕೊರಿಯೆರ್. ಆರೇ ಕೊನೆಯೆರ್ಂದ್ ನೆನೆಪುಲೆ. ಮತಿ ತಪ್ಪಡೆ. ಚಿಂತೆ ಮಲ್ಪಡೆ"
ಅಬ್ಬಗ ಅಜ್ಜೆರೆಗ್ ಓಲೆ ಬರೆದ್, ಬೊಕ್ಕೊರ ದಾರಗನ್ ಅರಾಪತ್ದ್ ಮೈ ನಿಲ್ಕೆ ಮುತ್ತು ಕೊರಿಯಲ್. ತಾಂಗ್ ತಡೆಪುದಾಂತೆ ಬಾಯಿ ಕೊರುದೇ ಬುಲಿತಲ್. ಕಣ್ಣ್ ಗ್ ಕತ್ತಲೆ ಬಲೆ ಕಟಿಲೆಕ್ಕಾಂಡ್.
ದೆರ್ತ್ ಪತಿನ ತಂಗಡಿನ್ ಅವ್ವೇ ಉಗ್ಗೆಲ್ಗ್ ಪಾಡಿಯಲ್. ಅಲೆನ ಒಟ್ಟುಗೇ ತಾನ್ ಲಾಗಿಯಲ್.....
ಇಂಚಿಡ್ ದ್, ಅವ್ವೇ ಪೊರ್ತುಗು ಬೀಲ ದೆರ್ತೊಂದು ಪಾರ್ದಿ ಕೈ ಕಂಜಿಲು ದಾರುನ ಕೈಕ್ ತಿಕ್ಕಿಯ.
ಕೈ ಕಂಜಿಲೆ ದೇರೊಂದು ಬತ್ತಿನ ದಾರು ಉಲಯಿ ಬತ್ತ್ ನಾಲ್ ಅಬ್ಬಗ - ದಾರಗನ್ ಲೆತ್ತಲ್.
ಇಲ್ಲದುಲಯಿ ಮನಿ ಮಂಬುದಾಂತೆ ಮಸಣದಂಚಾತ್ಂಡ್. ತಿರ್ತ ಚಾವಡಿಡ್ ಬಿರ್ಕ್ದ್ ಪರಡ್ದಿ ಬೊಳ್ಳಿದ ಚೆನ್ನೆದ ಕಾಯಿ, ಬಂಗಾರದ ಚೆನ್ನೆದ ಮಣೆ - ನೆತ್ತೆರ್ ಓಕುಳಿಡ್ ಮುರ್ಕುದು ಪೋತುಂಡು.
ದಾರು - ಇಲ್ಲ್ ಸುತ್ತು ಸುತ್ತು ಬತ್ತಲ್. ಅಬ್ಬಗಾ - ದಾರಗಾ? ಲೆತ್ತಲ್. ತರೆಕ್ಕ್ ತರೆ ದರ್ತೊಂದು ಊರೊರ್ಮೆ ನಾಡಿಯಲ್! ನಾಡಿಯಲ್.
32
