'ಈ ಬದ್ಕರೆ ಉಂಡಾ? ಮಗಾ? ಎದುರು ಜಾಲ್ಡ್ ಗೂವೆಲುಂಡು. ಐಕ್ಲಾಗಿದ್ ಜೀವ ಬುಡು. ಕೈಲಾಸ ಸೇರ್" ಈತ್ ಪಂಡಿನ ಬೆರಣೆ ತೂವ ತೂವನೆ ಮಾಯ ಆಪೆರ್.
ಈತಾನಾಗನೇ ಅಬ್ಬಗ ತರೆ ತಿರ್ಗ್ದ್ ತಂಗಡಿ ದಾರಗನ ಪುನತ್ತ ಮಿತ್ತ್ ಮಗ್ರ್ದ್ ಬೂರ್ದಲ್!.
ಬಾಯಿ ಕೊರುದು ಬುಲ್ತಲ್ ಬುಲ್ತಲ್!
ಓ ತಂಗಡಿ ದಾರಗಾ ಒಪ್ಪ ಪುಟಿನ ನೆನೆಪುನ್ಲಾ ದೀವಂದೆ ನಿನನ್ ಹಾಕ್ದ್ ಕೆರೆಯೆನೇ? ಅಯ್ಯೋ ದೇವರೇ-
ಅಪ್ಪೆ ಅಮ್ಮೆರ್ ಬತ್ತ್ ದ್ ತಂಗಡಿ ದಾರಗ ಓಲ್ಲಲ್ ಮಗಾ? ಕೇಂಡೆರ್ಡ ದಾನೆಂದ್ ಪನ್ನೆ? ಓ ದೇವರೇ ಯಾನೆಂಚಿ ಕಟುಕೆದಿ?
ಅಬ್ಬಗ ಬಗೆ ಬಗೆಟ್ ಅರೆ ಮುರಡ್ದ್ ದ್ ಬುಲಿತಲ್. ಧಿಡಕ್ಕನೆ ಲಕ್ದುಂತಿಯಲ್. - ನೆತ್ತೆರದ್ ಓಕುಲಿಡ್ ಅಡ್ಡ ಬೂರ್ದಿನ ತಂಗಡಿನ್ ಕಣ್ಣ್ ದಿಂಜಿದ್ ತೂಯಲ್.
ಮನಸ್ ಕಲ್ಲ್ ಮಲ್ತೊಂಡಲ್. ಕಣ್ಣ್ ಕತ್ತಲೆಡ್ ದಿಕ್ ದೇಸ ತೋಜಂದಿನ ಅಬ್ಬಗ, ಸೀರೆದ ಸೆರಂಗ್ನ್ ಒಯ್ತ್ ಸೊಂಟೊಗು ಕಟಿಯಲ್.
ತಂಗಡಿ ದಾರಗನೆ ದೆರ್ತೊಂದು ಮುಂದಿಲ್ ದಾಂಟಿಯಲ್. ಜಾಲ್ಗ್ ಜತ್ತಲ್. ಉಗ್ಗೆಲ್ದ ಬಾಯಿ ಕಲ್ಲ್ ಡ್ ತಂಗಡಿ ಪುನೊನು ದೀದ್ ಬೇನೆ ಉರ್ಕರ್ದ್ ದುಃಖ ದುಃಖದ್ ಬುಲ್ತಲ್.
ಇಲ್ಲದುಲಯಿ ಪಿರ ಬತ್ತಲ್. ಬಚ್ಚಿರ ಹರಿವಾಣೊಗು ಕೈ ಪಾಡ್ದ್ ಬಚ್ಚಿರೆ ದೆತ್ತಲ್. ಮೂಂಕುಡಿತ್ತಿ ಮೂಂಕು ಬೊಟ್ಟುನು ದೆತ್ತಲ್. ಬಚ್ಚಿರೆದ ಮಿತ್ತ್ ಡ್ ಓಲೆ ಬರೆಯೊಲು
"ಓ ಕಾನಬೊಟ್ಟುದ ಅಜ್ಞಾ! ಎಂಕಲೆ ಅಪ್ಪೆ ಅಮ್ಮೆರ್ ಮದಿಮೆ ಲೆಪ್ಪರೆ ಪೋತಿನಕುಲು ಪಿರ ಬನ್ನಗ ಜೋಕುಲು ದಾಂತಿನ ತೂದು ಕಂಗಾಲಾದ್ ಪೋವೆರ್.ಅಕಲೆಗ್ ಸಮಾದಾನ ಪನೊಡು.
ಉರ್ಕಿದೊಟ್ಟುದ ಬಂಗಾರ್ದ ಜಳ್ಳ ದೆಪ್ಪುಲೆ - ಐಕ್ ಪೊಸ ಪುಡಯಿ ಕಟ್ದ್ ಉಗ್ಗೆಲ್ಗ್ ಜಪ್ಪುಡಾಲೆ.
ಆಪೊರ್ತು ಪಿಂಗಾರದ ಪೂ ಆದ್ ಎಂಕುಲು ಈ ಉಗ್ಗೆಲ್ಡ್ ನೀಂದುವ.
31
