ಬೆರಣನ್ ತೂದು ಸೊನ್ನೆ ದಿಡ್ಕ ಲಕ್ಕಿಯಲ್. ತರೆ ತಗ್ಗಾದ್ ಕೈ ಮುಗಿತಲ್.
"ದಾನೆಮ್ಮಾ ಸೊನ್ನೆ! ಕಂಡನೆ ಬುಡೆದಿ ಐತ ಸಿಂಗಾರ ಆದ್ ಪಿದಡ್ಡರ್? ದೂರ ಪೋಪಿನಕುಲು? ದಾನೆ ಕಜ್ಜೊಡು ಪಿದಡ್ದರ್? ದಾನೆ ಸಂಗತಿ?” ಭಟ್ರ್ ಕೇಂಡೆರ್.
ಭಟ್ರೇ! ಮದಿಮೆ ಮುರ್ತೊಗು ಕಾಯಿ ಬಚ್ಚಿರ ಕೊರಿಯರೆ ಪಿದಡ್ಡ. ಎಂಕಲೆ ಜೋಕುಲು ಅಬ್ಬಗ - ದಾರಗೆರೆಗ್ ಮದಿಮೆಗ್ ದಿನ ಆತ್ಂಡ್. ಉರಿ ದೊಂಬುಗು ಮರತ ಮುದೆಲ್ದ ಗಾಳಿಗ್ ಒಂಜೀತ್ ಕುಲ್ಲುದ" ಪಂಡಲ್ ಸೊನ್ನೆ.
"ಓ! ಅಂಚನಾ? ಏಪ ಮದಿಮೆ? ವಾ ಗಳಿಗೆಡ್"
ಮದಿಮೆದ ದಿನ ಮಿತ್ತ ಅಂಗಾರದಾನಿ. ಪಗೆಲ್ ಪದ್ರಾಡ್ ಗಳಿಗೆಗ್ ದಾರೆ ಮುರ್ತ ಪಂಡೊಲು ಸೊನ್ನೆ.
"ಅಯ್ಯೋ ದೇವರೇ! ಏರಮ್ಮಾ ನಿಕಲೆಗ್ ಮದಿಮೆಗ್ ದಿನ ಪಂಡಿನಿ? ಓಲಾಂಡಲಾ ಅಂಗಾರೆ ದಿನ ಮದಿಮೆ ಆಪಿನ ಉಂಡಾ? ವಾ ಬೆರಣೆ ದಿನ ಪಂಡೆರ್? ವಾ ಪಂಚಾಂಗ ತೂದು ಪಂಡೆರ್? ಎನ್ನಂಚ ನಾಲಿಲ್ಲ್ ನಟ್ಟ್ ಬೆರಣೆಲಾ ಅಂಗಾರೆ ದಿನ ಪನುವೆನಾ?"
ಪಂಡೆರ್ ಭಟ್ರ್,
"ಅಯ್ಯೋ ಭಟ್ರೆ! ಇರೆನಂಚ ನೂಲು ಪಾಡಿ ಭಟ್ರೆ ದಿನ ಪಂತೆರ್. ಅವು ಅಂಚಿಪ್ಪಡ್! ಇತ್ತೆ ಇರೆನ ಪಂಚಾಂಗ ತೂದಾಂಡಲಾ ಎಂಕಲೆಗೊಂಜಿ ದಿನ ಪನುವರಾ?"
ಆತ್ ಕೇಂಡಿನ ಬೆರಣೆ - ಚಕ್ಕಪ್ಪ ಅಟ್ಟೆ ಪೊಯ್ದ್ ಕುಲ್ಲಿಯೆರ್. ಪಂಚಾಂಗ ಬುಡ್ಪಾಯೆರ್.
"ಅಯ್ಯೋ ಮಗ ಸೊನ್ನೆ! ನಿಕಲೆ ಜೋಕುಲೆ ಮದಿಮೆಗ್ ದಿನ ತೂಯೆ. ಬೆಮ್ಮೆರೆ ಪರಕೆ ಬಾಕಿ ಉಂಡು. ಮುರ್ತೊಗು ತಡೆ ತೊಡಕ್ ತೋಜುಂಡತ್ತಾ? ದಾದ ಕತೆ? ದಾನೆ ಪರಕೆ ಬಾಕಿ ಆತ್ಂಡ್ ಮಗಾ?"
"ಓಹೋ! ಪರಕೆ ಬಾಕಿ ಇತ್ತಿನಲಾ ಇರೆ ಪಂಚಾಂಗೊಡು ತೋಜಿ ಬರ್ಪುಂಡ ಭಟ್ರೇ? ದಾದ ಬಾಕಿ? ಅವೆನ್ ಪನುವರಾ?”
ಸೊನ್ನೆ ಒಂಜೀತ್ ಕೊಂಕು ಪಾತೆರ ಪನ್ಪಲ್.
26
