ನೆತ್ತಿಗ್ ನೀರೆಣ್ಣೆ - ಪಾದೊಗು ಪನಿ ಎಣ್ಣೆ, ಕೆಬಿಕ್ ಕೀಲೆಣ್ಣೆ ಪಾಡೊಂಡೆರ್. ಬೆಚ್ಚ ಮೀಯೆರ್, ಚಂಡಿ ಒರಸೊಂಡೆರ್.
ತುಳಸಿ ಕಟ್ಟೆದ ದುಂಬು ಉಂತುದು, ಸೂರ್ಯನ್ ನೆನೆತ್ತ್ ದ್ ಸೂರ್ಯ ಬೊಟ್ಟು. ಚಂದ್ರನ್ ಸುಗಿತ್ತ್ ದ್ ಚಂದ್ರಬೊಟ್ಟು ಪಾಡೊಂಡೆರ್. ತುಳಸಿ ಪತ್ದ್ ಸೀರ್ಥ ದೆತೊಂಡೆರ್.
ಬಣ್ಣಲ್ಲ ಚಾವಡಿಗ್ ಬತ್ತ್ದ್ ವಿಭೂತಿಗಟ್ಲೆಗ್ ಕೈ ಪಾಡ್ದ್ ನಾಮ ಪಾಡೊಂಡೆರ್.
ಕೆಲಸದಾಲ್ ಪಾಚುನು ಲೆತ್ತ್ ಪಂಡೋಲು ಸೊನ್ನೆ-
'ದಾರೋ ಪೇರ್ ಮಂಜೊಲು ಪೂಜಿನ ಮದಿಮಾಲ್ ಜೋಕುಲು ಅಬ್ಬಗ - ದಾರಗನ್ ಪಿದಯಿ ಪೋವರೆ ಬುಡಡ. ಇಲ್ಲ ಉಲಯಿ ಜಾಗ್ರತೆ ಉಪ್ಪಡ್" ಪಂಡ್ದ ಇರ್ವೆರ್ಲ ಉರ್ಕಿದೊಟ್ಟು ಜತ್ತ್ ಪಿದಡಿಯೆರ್.
ಪಿದಡ್ ದ್ ಬತ್ತಿ ಸೊನ್ನೆ ಮಾರ್ಲೆರ್ ನಂದಳಿಕೆ ಚಾವಡಿದ ಇಲ್ಲಗ್ ಪೋದು ಕಾಯಿ ಬಚ್ಚರ ಕೊರಿಯೆರ್. ಕೆಂಜ ಪರಾಡಿಗ್ ಬತ್ತೆರ್. ಕಾನ ಬೊಟ್ಟುಗು ಪೋಯೆರ್. ಅಜ್ಜೆರೆನ್ ತೂಯರ್. ಕಾರ್ ಪತಿಯೆರ್, ಮುರ್ತೊಗು ಲೆತ್ತೆರ್.
ಅಲ್ತ್ ಜತ್ತಿನಕುಲು ಕಾಪು - ಕಟಪಾಡಿಗ್, ಮುಂಡೇರ್ಗ್ ಕಲ್ಯ ಕೈರೊಟ್ಟುಗು ಪೋದು ಮುರ್ತೊಗು ಲೆತ್ತೆರ್!
ಬೋಳ ಬೊಳ್ಮಣ್ಣ್ಗ್ ಬತ್ತೆರ್.
ಮಟ ಮಟ ಮದ್ಯನದ ಪೊರ್ತು, ಉರಿ ಉರಿ ದೊಂಬು, ಕಾರ ಬಚ್ಚಿಲ್ಗ್ ಅಬ್ಬನಡ್ಕದ ಗೋಳಿದ ಕಟ್ಟೆದ ನಿರೆಲ್ಡ್ ಒಂತೆ ಪೊರ್ತು ಕುಲ್ಲಿಯೆರ್.
ಕುಲ್ಲಿನ ಗುರು ಮಾರ್ಲಗ್ ಎಡೇನ ನಿದ್ರೆ! ಸೊನ್ನೆನ ತೊಡೆಕ್ ತರೆ ದೀದ್ ಅಡೇಗೆ ಜೆತ್ತೆರ್.
ಅಪ್ಪೆ ಪೊರ್ತು - ಮೂಡು ಮಜಲೊಟ್ಟು ಉರಿ ಬೆಮ್ಮೆರ್ ಬಡ ಬೆರಣನ ವೇಷ ಪಾಡೊಂಡೆರ್. ತುರೆತ್ತ ತಂಬುರಿ ಪತೊಂಡೆರ್. ಕರುಂಬು ಕಡ್ತ್ ದಂಟೆ ಊರೊಂಡೆರ್.
ಧೋತರ, ಪರ್ತಿದ್ ಜೋಳಿಗೆ ಪಾಡೊಂಡೆರ್. ಅಜಿಪ ಪಂಚಾಂಗ - ಮುಪ್ಪ ಜಾತಕದ ಕಟ್ಟ್ ಪತೊಂಡೆರ್. ಅಬ್ಬನಡ್ಕದ ಗೋಳಿದ ಮುದೆಲ್ಗ್ ಬತ್ತೆರ್.
25
