ಇಂಚ ಅಬ್ಬಗ - ದಾರಗ ಪುಣ್ಯಮೆದ ಚಂದ್ರಲೆಕ್ಕ ದಿನೊಕ್ಕು ದಿನ ಬುಳೆವೊಂದು ಬಲತ್ತೆರ್.
ಪುಟ್ಟಿ ಜೋಕುಲೆನ್ ಜೋಡು ತೊಟ್ಟಿಲ್ ಕಟ್ದ್ ಸೊನ್ನೆ ತೂಂಕಿಯಲ್. ಜೋಕುಲ್ನ ತೆಲಿಕೆ ನಲಿಕೆಡ್ ಪಗೆಲ್ ಬೇಸರಿಜ್ಜಿ ರಾತ್ರೆಡ್ ನಿದ್ರೆ ಇಜ್ಜಿ. ಜೋಕುಲು ಎಣ್ಣೆ ನೀರ್ಡ್ ಬುಲೆದ್ ಬುಲೆಯ.
ಜೋಕುಲ್ನ ಗೊಬ್ಬು ಗದ್ದಲೊಡು ಮಾರ್ಲಗ್ಲಾ ಕಾಲ ವೇಳ್ಯ ಪೋಯಿನವೇ ತೆರಿಯಂದೆ ಪೋತುಂಡು. ಜೋಕುಲು ತೂ ನೀರ್ಗ್ ಅಂದಾದ್ ವರ್ಸ ವರ್ಸನೆ ಕರಿಂಡ್. ಪ್ರಾಯ ಪದ್ರಾಡ್ ದಿಂಜಿಂಡ್.
ಇಂಚಪ್ಪುನ ಪೊರ್ತು ಜೋಕುಲು ಬಲಿರು ಬಲಕೆನ್ ತೂದು ಮದಿಮೆ ಮಲ್ಪುನ ಯೋಚನೆ ಮನಸ್ಸಡ್ ಮುಂಗುದೀಂಡ್.
ಸೊನ್ನೆ ಮಾರ್ಲೆರ್ ಈ ಚಿಂತೆಡ್ - ಬತ್ತಿ ಪೋಯಿನ ಕಲೆ ಮೋನೆ ತೂದು ಪನ್ಪೆರ್ -
ಜೋಕ್ಲೆಗ್ ಆಣ್ ತೂವೊಡು. ಅಕಲೆ ಪೊರ್ಲುಗು, ಮನೆತನೊಕ್ಕು ಸರಿ ಆಪಿ ಆಣ್ ಆವೊಡು ಪಂಡೆರ್.
ಇಂಚನೇ ಕಾಲ ಕರಿಯೊಂದುಪ್ಪುನಗ ಈಡೇರಿ ಕಾರ್ಲದ ಬೊಲ್ಯ ಚಂದ್ರಮ ಸೆಟ್ಟಿಗ್ಲಾ ರಡ್ಡ್ ಅಮರ್ ಜೋಕುಲು, ರಾಮೆ - ಲಕ್ಷ್ಮಣೆರ್ಂದ್ ಅಕಲೆ ಪುದರ್.
ಈ ಸುದ್ದಿ ತೆರಿನ ಮಾರ್ಲೆ, ಕಾನ ಬೊಟ್ಟುದ ಅಜ್ಜೆರ್, ಅಣ್ಣ ಜಾರು ಮಾರ್ಲನ್ ಕೂಡಾವೊಂದು ಪೋದು ನಿಶ್ಚಯೊಗು ಕಾರ್ಲಗ್ ಪೋಯೆರ್.
ಬತ್ತಿ ಬಿನ್ನೆರೆಗ್ ಪೊರ್ತುಡು ತಮ್ಮನ ಮಲ್ತಿನ ಚಂದ್ರಮ ಸೆಟ್ಟಿಡ-
ಅಯ್ಯಾ ಚಂದ್ರಮ ಸೆಟ್ರೇ, ಇರೆಗ್ಲಾ ರಡ್ಡ್ ಅಮರ್ ಜೋಕುಲು. ಎಂಕ್ಲಾ ರಡ್ಡ್ ಅಮರ್ ಪೊಣ್ಣುಲು.
"ಇರೆನ ಕುಲ, ಕೂಟ ಎಂಕಲೆಗ್ ಒಪ್ಪಿಗೆ ಆತ್ಂಡ್. ಇರೆಗ್ ಇಷ್ಟ ಇತ್ತ್ಂಡ ಪೊಣ್ಣ ನಿಶ್ಚಯೊಗು ಬರೊಡು. ಮದಿಮೆ ಮಲ್ತ್ದ್ ಸಂಬಂಧ ಬುಳಪಾವೊಡು" ಪಂಡೆರ್ ಗುರು ಮಾರ್ಲೆ.
ಚಂದ್ರಮ ಸೆಟ್ಟಿ ಪೊದುಕ್ಕು ಒಪ್ಪಿಯೆರ್. ಪೊಣ್ಣು ನಿಶ್ಚಯೊದು ಬರ್ಪೆಂದ್ ಪಾತೆರ
23
