ಇಂಚನೇ ದಿನ ಕರಿದ್ ಏಳನೇ ದಿನಾನಿ ಊರು ನಿರೆತ್ತಕುಲು ಕೂಡಿಯೆರ್. ಮಡ್ಡೆಲ್ದಿ ಮೈರೆ. ಭಂಡಾರ್ದಿ ಬಾಮು ಬತ್ತೆರ್. ನೀರ ಪರ್ಬ ಗೌಜಿ ಗದ್ದಲೊಡೇ ನಡತ್ಂಡ್.
ಒಂಜಿ ದಿನ ಸೊನ್ನೆ ಇಲ್ಲ್ ಗಾವಂದೆ ಕುಲ್ಲುದು, ಐನ್ ನೀರ್ ಮೀತಲ್.
ಒಂಜಿ ಪುಂಡಿ ಬೊಳೆಂತರಿ, ಒಂಜಿ ಕೊಡಿ ಇರೆ, ಒಂಜಿ ತಾರಯಿ ಪತೊಂದು ತುದೆಕ್ ಪೋತಲ್.
ತುದೆ ನೀರ್ ಮೀದ್ ಸುದ್ದ ಮುದ್ರಿಕೆಡ್ ನೀರ ಬರಿಟ್ಟ್ ಇರೆ ಪಾಡಿಯಲ್. ಇರೆಕ್ಕ್ ಅರಿ ಪಾಡಿಯಲ್. ಅರಿತ್ತ ಮೇಲ್ಡ್ ತಾರಯಿ ದೀದ್ ಕೈ ಮುಗಿಯಲ್.
"ಓ ಗಂಗಾದೇವಿ! ಮಾಯದಪ್ಪೆ ಸಿರಿನ ಬಂಜಿಡ್ ಬತ್ತಿ ಬಾಲೆ ಯಾನ್, ಪ್ರಾಯ ಕರಿದ್ ಮದಿಮಲಾತೆ. ಆಂಡಲಾ ಜನ ನಂಬಂದೆ ಪೋತೆರ್!
"ಇನಿ ಈ ಪುಂಡಿ ಅರಿನ್ ನಿನ್ನ ಗರ್ಬೊಗು ಪಾಡುವೆ. ಅವು ಸಾವಿರ ಸಾವಿರ ಮೀನ್ಲ್ನ ಗರ್ಬ ಸೇರಡ್. ಮೀನುಲ್ನ ಬಂಜಿ ದಿಂಜಿ ಲೆಕ್ಕೊನೇ ಎನ್ನ ಗರ್ಬಲಾ ದಿಂಜಿದ್ ಬರಡ್. ಅಮ್ಮಾ ಮಾನ ಒರಿಪು, ಮಾಯೆ ತೋಜಾವು" ಪಂಡಲ್,
ಅರಿನ್ ನೀರ್ಗ್ ಬಿರ್ಕಿಯಲ್! ತಿರ್ಗ್ದ್ ಬತ್ತಿನಾಲ್ ಉರ್ಕಿದೊಟ್ಟು ಉಲಯಿ ಪೊಗ್ಗಿಯಲ್.
ಮಗುರು ಮನದಾನಿ ಕಂಡನೆ ಮಾರ್ಲನ್ ಲೆತ್ತೊಂದು ತಿರುಪತಿ ತಿಮ್ಮಪ್ಪ ಕಟ್ಟೆಗ್ ಬತ್ತಲ್ - ದೀಪ ಪೊತ್ತಾಯಲ್. ಕೈ ಮುಗಿಯಲ್.
"ಓ ಮಜಲೊಟ್ಟು ಬೆಮ್ಮೆರೇ - ಎನ್ನ ಬಂಜಿಡೊಂಜಿ ಸಂತಾನದ ಕೊಡಿ ಕೊರ್ಲೆ.ಇರೆ ಭಂಡಾರೊಗು ಬಂಗಾರ್ದ ಬಾಲೆ. ಬೊಳ್ಳಿದ ತೊಟ್ಟಿಲ್ ಒಪ್ಪಿಸಾವೆ. ಕೈತ ಇಡೆ ಬಳೆ ಕೊರ್ದು ಮುಗುಳಿ ದೀಪಾವೆ.
ಕಟ್ಟೆಗ್ ಅಡ್ಡ ಬೂರುದು ಕೈ ಮುಗಿತ್ತಲ್. ದಿನ ಅಂಚೆನೇ ಕರಿದ್ ಪೋತುಂಡು.ಸೊನ್ನೆ ಬಂಜಿನಾಲ್ ಆತಲ್. ತಿಂಗೊಲು ತಿಂಗೊಲು ದಿಂಜಿದ್ ಬಂಜಿಗ್ ಏಳ್ ತಿಂಗೊಲಾತ್ಂಡ್.
ಆ ಏಳನೇ ತಿಂಗೊಲೊಡ್ದೆ ಸೊನ್ನೆ ಅಮರ್ ಪೊಣ್ಣು ಜೋಕುಲೆನ್ ಪೆದ್ದಿಯಲ್.
ಪುಟ್ಟಿ ರಾಶಿ ಕೇಂಡಿ ಪೊರ್ತುಗು - ಸುರು ಪುಟ್ಟಿ ಬಾಲೆಗ್ 'ಅಬ್ಬಗ' ಬೊಕ್ಕ ಪುಟ್ಟಿನಾಲ್'ದಾರಗ' ಪನ್ಪಿ ಪುದರ್ಡ್ ಲೆತ್ತೊಂದುಪ್ಪುಲೆ ಪಂಡೆರ್ ಜೋಯಿಸರ್.
22
