ಉಂತಿನಾಲ್ ಉಂತಿನಲ್ಪನೇ ಪಿಜಿರಂದೆ ಉಂತ್ದಲ್. ಏತ್ ಪೊರ್ತಾಂಡಲಾ ಸೊನ್ನೆ ಬರಂದಿನ ತೂದು, ಕಬೆತಿನ್ ಕಟ್ದಿ ಕಿದೆಕ್ಕ್ ಕೆಲಸದಾಳ್ನ ಕಡಪುಡಿಯೆರ್ ಮಾರ್ಲೆ.
ಚಾಕ್ರಿದ ಪೊಣ್ಣು ಬತ್ತ್ ತೂನಗ ಕಬೆತಿನ್ ಕಟ್ದಿ ತರೊಳಿ ಗುಂಟ ಪತ್ದ್ ಉಂತುದಲ್ ಸೊನ್ನೆ.
ಉಂದೆನ್ ತೂಯಿನ ಬೇಲೆದ ಪೊಣ್ಣು ಪಾರ್ ಬತ್ತಲ್ ಮಾರ್ಲೆರಡ ಪಂಡಲ್.
"ಅಕ್ಕೆ ಪೊಣ್ಣು ಪೋದು ಪೊಂಜೊವಾತೆರ್. ನಗೆ ನಾಸಿಗೆಡ್ ತರೆತಗ್ಗಾದೆರ್"
ಗುರು ಮಾರ್ಲಗ್ ಈತ್ ಕೇಂಡ್ದ್ ಮೋನೆಡ್ ಮುಗುರು ತೆಲಿಕೆ ಮೂಡೊಂದು ಬತ್ತ್ಂಡ್.
ಆ ಪೊರ್ತುಡೇ ಮಿತ್ತ ಕೂಟಯಿಗ್, ತಿರ್ತ ಕೂಟಾಯಿದ ಇಲ್ಲಗ್ ಜನ ಕಡಪುಡಿಯೆರ್ ಸುದ್ದಿ ತೆರಿಪಾಯೆರ್.
ಸೊನ್ನೆ ಮದಿಮಾಲಾತಿ ಸುದ್ದಿ, ಜಾಗ್ ಜಾಗ್ದಕ್ಲೆಗ್ ಪಂಡ್ದ್ ಬಲ್ಲೆಪ್ಪಾ.
ದುಂಬು ನಂದೊಳಿಗೆ ಚಾವಡಿಗ್. ಕಾನೊಟ್ಟು ಮಾನೊಟ್ಟುಗು, ಕೆದಿಂಜೆ ಪರಾಡಿ ಅಣ್ಣೆ ಜಾರು ಮಾರ್ಲಗ್ ಪಂಡ್ದ್ ಬಲ್ಲ. ಊರು ನಿರೆತ್ತ ಪೊಣ್ಣು ಪೊಂಜೆವೆಗ್ ಪನ್.ಸೊನ್ನೆಗ್ ನೀರ್ ಮೀಪಾವರೆ ನೀರ ಪರ್ಬೊಗು ಬಲ್ಲೆಂದ್. ಇಲ್ಲ ಇಲ್ಲಗ್ ಜನಕಡಪುಡಿಯೆರ್ ಮಾರ್ಲೆ.
ಸುದ್ದಿ ಕೇಂಡ್ ಬತ್ತೆರ್, ನಂದಳಿಕೆ ಚಾವಡಿದಕುಲು.
ತಿರ್ತ ಕೂಟಾಯಿ, ಮಿತ್ತ ಕೂಟಾಯಿದಕುಲು. ಆಂಡಲಾ ಕಾನ ಬೊಟ್ಟ ಮಾನೊಟ್ಟುದಕಲು ಬತ್ತ್ಜೆರ್.
ಈ ಸುದ್ದಿ ಕೇಂಡ್ದ್ ತೆಲ್ತೆರ್. ನಂಜಿಡ್ ಕೋಂಗಿ ಪಂಡೆರ್ - “ಉಂದೆಂಚಿನ ಕಳು ಪಾತೆರಯಾ? ಇಂಚಲಾ ಆವರೆ ಉಂಡಾ? ಕೆನ್ನೆಡ್ ಪನ್ನೆ ನರೆ ಬತ್ತಿನಾಲ್ ಮದಿಮಲಾಪಿನಿ ದಾದ? ಕಂಡನೆನ್ ಮರ್ಲ್ ಮಲ್ಪರೆ ಕಳು ಪಂತಲ್. ನಮ್ಮ ಕುರು ಕುಚ್ಚನ ಕೇಂಡ್ದ್ ಸುಳ್ಳು ಪಂತಲ್.
ಕಿದೆಕ್ ಪೋಯಿನಲ್ಪ ಮಂಗು ತುಚಿಂಡಾ ದಾನ್ನ.... ಒರಿ ಒರಿ ಒಂಜೊಂಜಿ ಬಣ್ಣೊಡು ಕೊಂಗಿ ಕಟಿಯೆರ್.
21
