ಅಯ್ಯೋ ಸ್ವಾಮೀ ಈರ್ ಲಾ ಅಂಚ ಪನಡೆ. ತಂಗಡಿನ ನೀರ ಪರ್ಬೊಗು ಪೋಯಿಜಿಡ ಯಾನ್ ತಪ್ಪುಗಾರ್ತಿ ಆಪೆ. ಉಪ್ಪುನಾಲ್ ಎಂಕೊರ್ತೇ ತಂಗಡಿ.
ಎನ್ನಜ್ಜೆರ್ ಗಿಂಡಿನ್ ಕನತ್ತ್ ತಾಂಕ್ನಗನೇ ಪನ್ತೆರ್-
"ಮಗಾ! ಸೊನ್ನೆ! ನಿಕುಲು ಸೊನ್ನೆ ಗಿಂಡಿ ಪಲಿ ತಂಗಡಿ ಲೆಕ ಉಪ್ಪೊಡು ಮಗಾ. ಒಪ್ಪ ತಪ್ಪೊಡು ಒಂಜಿ ಬಂಜಿಡ್ದ್ ಬತ್ತಿ ಜೋಕುಲೆಲೆಕ್ಕ ಕೂಡೊಂದು ಸೇರೊಂದು ಉಪ್ಪೊಡು ಪನ್ಪೆರ್.
ಯಾನ್ ಇರೆನ ಕೈ ಪತ್ತಿ ಬೊಕ್ಕ ಅಜ್ಜೆರೆಗ್ ಗಿಂಡಿನ್ ಆ ಬೆಮ್ಮೆರೇ ದಾನ ಕೋರಿಲೆಕ್ಕ ಕೊರ್ತೆರ್. ಅಂಚಾದ್ ಯಾನ್ ನೀರ ಪರ್ಬೊಗು ಪೊಜಿಡ ಸರಿ ಆವಂದ್. ಸೊನ್ನೆ ಛಲ ಪತಿಯಲ್.
ಸೊನ್ನೆನ ಮನಸ್ ಆಸೆ. ಅಲೆನ ಹಟ ಉಂದೆನ್ ತೂಯಿನ ಗುರುಮಾರ್ಲೆ ಆವು ಪೋದು ಬಲ್ಲೆ. ಯಾನ್ ಅಡ್ಡಿ ಮಲ್ಪಯೆ. ಆಂಡ ಒಂಜಿ ಪಾತೆರ ಪನ್ಪೆ.
"ಕಾನ ಬೊಟ್ಟುಗು ಪೋಯಿನ ಈ ಮಾನೊಗು ಕೋರೆ ಮಲ್ತೊಂದು ಇಡೆಗ್ ಪಿರ ಬರಿಯರೆ ತೀರಂದ್. ಬತ್ತಡ ನಿನನ್ ಪಿದಯಿದ ಗೌಡಿ ಚಾಕರಿ ಮಲ್ಪಾವೆ. ಕಿದೆ ಕೊಟ್ಯದ ಕಂಜಿ ಕೈಕಂಜಿಲೆಗ್ ಅರ್ಕಂಜಿ ಮೈಪಾವೆ. ಬೈಪಾಡವೆ. ಉಂದೆನ್ ನೆನಪು ದೀಲ" ಪಂಡಿನ ಗುರುಮಾರ್ಲೆ, ಬೈರಾಸ್ನ್ ಒಯ್ತ್ ಪುಗೆಲ್ಗ್ ಪಾಡೊಂದು ಪಿದಯಿ ಪೋಯೆ.
ಕಂಡನೆನ ಕಟ್ಟಿ ನಿಟ್ಟಿದ ಪಾತೆರ ಕೇಂಡಲಾ ಸೊನ್ನೆ ದಾನೆ ಆಯರೆ ಉಂಡಾ? ಅವು ಆದ್ ತೀರಡ್ ಪನ್ಸಿ ತೀರ್ಮಾನೊಡು ಉರ್ಕಿದೊಟ್ಟು ಜತ್ತಲ್. ನಿರೆತ್ತಲೆನ್ ಲೆತ್ತೊಂಡಲ್. ಬೆರಿ ಪಾಸಡಿ ಮಲ್ತೊಂದು ಕಾನ ಬೊಟ್ಟುದ ತಾದಿ ಪತಿಯಲ್.
ಕಾನ ಬೊಟ್ಟುದ ಇಲ್ಲ ಮುಂದಿಲ್ಗ್ ಬತ್ತಲ್. ಉಲಯಿ ಮುಖ ಮಂಟಪೊಗು ಪೊಗ್ಗಿಯಲ್.
ಅವುಲು ಸೇರಿನ ಪೊಣ್ಣು ಪೊಂಜೊವು ಮಾತ ಸೊನ್ನೆಗ್ ಕಣ್ಣ್ ಕಣ್ಣ್ ತೂಯೆರ್.
ಸೊನ್ನೆ ಉಲಯಿ ಪಡಸಾಲೆಗ್ ಬತ್ತಲ್. ಬಾಕಿಲ್ ಒಂದಾದ್ ಉಲಯಿ ಇಲ್ಲ್ ಸೇರೊಂಡಲ್.
ಈತಾನಗ ಅಲ್ಪ ಅಟಿಲ್ ಅರೆಗಾನ ಮಲ್ತೊಂದಿತ್ತಿನ ಜನಮಾನಿ ಕೆಲಸದ ಕೈ ಬುಡಿಯೆರ್.
ಕಾಯಿ ಕಜಿಪು ಮೂರೊಂದಿತ್ತಿನಕುಲು ಮುಟದನೆ ಬುಡಿಯೆರ್. ತಾರಾಯಿ ಪಿರೊವೊಂದಿತ್ತಿ ಪೊಂಜೊವು ಪೆರದನೆ ಬುಡಿಯರ್,
16
