ಸೊನ್ನೆಗ್ ಅವಮಾನ
ಕಾನಬೊಟ್ಟುದ ಅಜ್ಜೆರೆನ ಮೋಕೆದ ತಾಂಕನೊಡು ಬುಳೆಯಿನ ಗಿಂಡಿನ್ ಅದಗದಗ ಬತ್ತ್ ದ್ ತೂದು ಪೋವೊಂದಿತ್ತಲ್ ಸೊನ್ನೆ.
ಸೊನ್ನೆಗ್ ಮದಿಮೆ ಆದ್ ಪದ್ರಾಡ್ ವರ್ಸ ಕರಿದ್ ಪೋಂಡಲಾ ಆಲ್ ಪೊಣ್ಣು ಪೋದು ಪೊಂಜೊವಾತ್ಜಲ್.
ಗಿಂಡಿಗ್ ಇತ್ತೆ ಪದ್ರಾಡ್ ವರ್ಷ ಪ್ರಾಯ ದಿಂಜಿದ್ಂಡ್. ಆಲ್ ಮದಿಮಲಾದ್ ಆಜಿ ದಿನ ಕರಿದ್ಂಡ್. ಏಳನೇ ದಿನ ನೀರ್ ಮೀಪಾವು, ನೀರ ಪರ್ಬೊಗು ಬರೊಡುಂದು ಸೊನ್ನೆಗ್ ಜನ ಕಡಪುಡ್ದೆರ್ ಅಜ್ಜೆರ್.
ಕಾನ ಬೊಟ್ಟುದ ಅಜ್ಜೆ ಕಡಪುಡ್ಡಿ ಜನ ಊಳಿಗಮಾನಿ ಉರ್ಕಿದೊಟ್ಟುಗು ಬತ್ತ್ ದ್ ಸೊನ್ನೆಗ್ ಸುದ್ದಿ ಪಂಡೆ.
ಬೈದಿ ಮಾನಿನ್ ತೂದು ಸೊನ್ನೆಗ್ ಮುಡು ಮೂಜಾಂಡ್. ಸಂತೋಸ ಉರ್ಕರೊಂದು ಬತ್ತ್ಂಡ್.
ಆಳ್ ಮಾನಿಗ್ ಅಸರ್ಗ್ ನೀರ್. ಬಡವುಗು ಬಂಜರ ಕೊಜಪು ನುಪ್ಪು ಬಳಸಿಯಲ್.
ಉಲಯಿ ಪೋದು ಕಂಡನೆ ಗುರುಮಾರ್ಲಡ ಸುದ್ದಿ ಪಂಡಲ್. "ತಂಗಡಿ ಗಿಂಡೆನ ನೀರ ಪರ್ಬೊಗು ನಮ ಇನಿಯೇ ಪೋವೊಡು" ಒತ್ತಾಯ ಮಲ್ತಲ್ ಸೊನ್ನೆ.
ಆತ್ ಕೇಂಡಿನ ಗುರು ಮಾರ್ಲೆ
ದಾದ ಮರ್ಲ್ ಮರ್ಕಟೆ ಪಾತೆರುವಯಾ? ನಿನ್ನ ತಂಗಡಿನ ನೀರ ಪರ್ಬೊಗು ಪೋಡುನ್ಪಿನ ನಿಕ್, ನಿನ್ನ ಸ್ಥಿತಿ ಗತಿತ್ತ ನೆಂಪಾಂಡಲ ಉಂಡಾ?
ಕಾನೊಟ್ಟು ಮಾನೊಟ್ಟು ಒಕ್ಕೆಲ್ ಸಕ್ಕೆಲ್ದ ಜನ ನಿಕ್ಕ್ ದುಂಬೇ ಕೊಂಗಿ ಕಟೊಂದುಲ್ಲೆರ್. ಕಪಿತನ ಪನ್ಪೆರ್.
ಈ ಮಂಜ ಮರಡೆ, ಗೊಡ್ಡು ದಡ್ಡೆ ಪಂಡ್ದ್ ನಕಲಿ ಮಲ್ತೊಂದುಲ್ಲೆರ್. ಇತ್ತೆ ಈ ಅಡೆಪೋಯಡ ನಿನ್ನ ಮಾನೊಗು ಕುಂದೆಲಾವು. ಮರ್ಯಾದಿ ಪೋವು. ಈ ಅಡೆ
ಪೋಪಿನ ಸರಿ ಅತ್ತ್? ಪಂಡೆ ಗುರು ಮಾರ್ಲೆ ಕಟ್ಟಿನಿಟ್ಟ್ ಡ್.
15
