ಕಡೆಪಿನಕುಲು ಕಲ್ಲ್ ಬುಡಿಯೆರ್, ನೀರ್ದಕುಲು ಕೊಡಪನ ಬುಡಿಯೆರ್. ಇಲ್ಲ ದುಂಬುಡುತ್ತಿನ ಕುಕ್ಕುದ ಕಟ್ಟೆಗ್ ಪೋಯೆರ್. ಒರಿಯನ್ ಒರಿ ಮೋನೆ ಮೋನೆ ತೂವೊಂಡೆರ್.
ಉಂದೆನ್ ತೂಯಿನ ಅಜ್ಜೆರ್ -
"ದಾಯೆ ಮಗಾ? ಕಡೆಪಿನಕುಲು ಕಲ್ಲ್ ಬುಡಿಯೆರ್? ನೀರ್ ದಕುಲು ಕಂದೆಲ್ ಬುಡಿಯೆರ್ ? ದಾನೆ ಆಂಡ್? ದಾನೆ ಪೊಂಡು?”
ಆತ್ ಕೇಂಡಿನ ಕೂಡ್ಲಿ ಪೊಂಜೊವು-
"ಅಜ್ಜೆರೇ! ಸೊನ್ನೆ ಇತ್ತಿ ಕಲಟ್ಟ್ ಎಂಕುಲು ಉಂತಯ. ಆಲ್ ಇತ್ತಿ ಕೂಟೊಡು ಎಂಕುಲು ಸೇರಯ. ಸೊನ್ನೆನ ತಂಗಡಿ ಗಿಂಡಿ ಇನಿ ಪೊಣ್ಣು ಪೋದು ಪೊಂಜೊವಾತಲ್. ಸೊನ್ನೆಗ್ ಮದಿಮೆ ಆದ್ ಕೆಲವು ವರ್ಸ ಕರಿದ್ ಪೋಂಡು, ಕೆನ್ನೆಡ್ ಪನ್ನೆ ನರೆ ಬೈದ್ಂಡ್. ಮೋನೆ ನೆರಿ ಕಟ್ದ್ಂಡ್. ಮೋಲು ಮಂಜ ಮರಡೆ. ಗೊಡ್ಡು ದಡ್ಡೆ. ನನಲಾ ಪೊಣ್ಣು ಪೋದು ಪೊಂಜೊವಾತ್ಜಲ್.ಒಂಜಾ ಆಲ್ ಮುಲ್ಪಡ್ದ್ ಅಗಪೊಡು. ಇಜ್ಜಾ ಎಂಕುಲಾದೇ ಮುಲ್ಪಡ್ದ್ ಅಗಪ್ಪುವ"
ಕೂಡ್ಲಿ ಪೊಂಜೊವು ಕುರು ಕುಟ್ಟನದ ಪಾತೆರ ಪಂಡೆರ್. "ಆಯ್ಯಾ ಪೊಂಜೊವೇ! ಈತ್ಲಾ ಹಟನಾ ನಿಕಲೆಗ್! ಮೋಕೆದ ತಂಗಡಿನ ನೀರ ಪರ್ಬೊಗು ಬೈದಲ್. ಯಾನ್ ಅಲೆನ್ ಎಂಚ ಪೋಯರ ಪನೊಲಿ?" ಬೇಸರ್ಡ್ ಪಂಡೆರ್ ಅಜ್ಜೆರ್.
ಆಂಡಲಾ ಪೊಂಜೊವು ಪತ್ತಿ ಬಲ್ಲ್ ಬುಡಂದೆ ಚಲ ಕಟಿಯೆರ್. ಆ ಪೊರ್ತುಡು ಅಜ್ಜೆರ್ ಕಡೆ ಕಣ್ಣ್ ಡ್ ಕಣ್ಣ ನೀರ್ ಜಪ್ಪುಡಾದ್ ಸೊನ್ನೆನ್ ಕೈತಲೆ ಲೆತ್ತ್ ದ್ ಬಾಮಿದ್ ಪಂಡೆರ್.
"ಮಗಾ ಸೊನ್ನೆ! ನಿನನ್ ಮೋಕೆಡ್ ಲೆಪುಡಾಯಿನಿಲಾ ಅಂದ್."
ಈ ತಂಗಡಿನ ಪೊರ್ಲು ಪೋಲೆ ತೂವೊಡುಂದು ಬೈದಿನಿಲಾ ಅಂದ್. ಆಂಡ ಊರು ನಿರೆನ್ ಬುಡುದು ನಡತ್ಂಡ ನಮ್ಮ ಜಾತಿಗೊಂಜಿ ಕೋರೆ. ನೀತಿಗೊಂಜಿ ಕೋರೆ ಬರು ಮಗಾ!
ಮಲ್ತಿ ಅಟಿಲ್ ಅರೆಗಾನ ನಾಯಿ ಪುಚ್ಚೆಗ್ ಪಾಡೊಡಾವು. ಕಕ್ಕೆ ಪಕ್ಕಿಲೆಗ್ ದಕ್ಕೊಡಾವು.
"ಈ ಎಲ್ಲೆಲ್ಲಾ ಇಡೆಗ್ ಬರೊಲಿ. ನಿನ್ನ ತಂಗಡಿ ಪೊರ್ಲು ಏಪಲಾ ತೂವೊಲಿ"
ಪಂಡೆರ್ ಅಜ್ಜೆರ್. ಸೊನ್ನೆನ ಬೆರಿ ಪೂಜಿದ್ ಬಾಮಿಯೆರ್. ಕೈ ನಿಲ್ಕೆ ಕಣ್ಣೊರಸೊಂಡೆರ್!
17
