ಜತ್ತ್ ಬತ್ತಂದ್ ಮಂಜಣೆ ಬೊಕ್ಕ ಕಿನ್ಯನೆ ಪನ್ಪಿ ಇರ್ವೆರ್ ಜವನ್ಯೆರ್ ಮಿತ್ತಬೈಲ್ದ ಗುಡ್ಡೆ ಗರ್ತ್ದ್ ಕಾಡ್ ಕಡ್ತ್ಂದ್ ಕಂಡ ಸಾಗೊಳಿ ಮಲ್ತಿನವು ಅಂಚೆನೆ ಪೊಸ ಗುತ್ತುದ ಇಲ್ಲ್ ಕಟ್ಟುನವು ಪೊಸ ಬದ್ಕ್ ದ ಒಂಜಿ ಸಾದಿ. ಅಯಿತ ಒಟ್ಟುಗೆ ಅಂಕ ತಂಕೊಡು ಬೀರೆ ಬಿರ್ಸೆ ಆಯಿ ಮಂಜಣ ಆಳ್ವೆ ಕುಂಬುಳೆ ಅರಸೆರೆ ದಂಡನಾಯಕೆ ಆದ್ ಮೆರಿಯಿನವು ಬೊಕ್ಕ ಗುತ್ತುದ ಗಡಿ ಪತ್ತ್ ದ್ ಯಜಮಾನಿಕೆ ತೂದು ಪುಗರ್ತೆ ಪಡೆಯಿನವು. ಮಾಂಕರಾಲ್ಲೆಕಂತಿ ಅತ್ರೋಣದ, ಇಲ್ಲ್ ಬದ್ಕ್ ಮಾತ ಬುಡ್ದು ಗಾಂದ್ಯೆರ್ ಲೆಪ್ಪುಗು ಓಕೊಂದು ಗಾಂಧಿ ಸುಬ್ಬಯ್ಯೆಂದ್ ಪುದರ್ ಪಡೆಯಿ ಸುಬ್ಬಯಾಳ್ವೆ, ಗುತ್ತುದ ಗತ್ತ್ ಗ್ ಸರಿಯಾದ್ ಸಾದುಗ್ ಸಾದು, ಪೆರ್ಚಿಗ್ ಪೆರ್ಚಿ ತೊಜಪ್ಪಾದ್ ಉಳ್ಳಾಲದ ರಾಣಿ ಅಬ್ಬಕ್ಕಲೆಕ್ಕನೆ ಮಿತ್ತಬೈಲ್ದ ಗುರ್ಕಾರ್ತಿ ಯಮುನಕ್ಕೆ ಇಂಚ ಮಾತ ಬೇತೆ ಬೇತೆ ಸುಬಾವುದ ಜನೊಕುಲೆ ಬದ್ಕ್ ದ ಮರ್ಗಿಲ್ ಲೆನ್ ಪೊರ್ಲಕಂಟ್ಡ್ ಮೊಡೆದ್ ಕೊರಿನ ಕಜ್ಜೋ ಮುಲ್ಪ ತೋಜೊಂದುಂಡು.
ಅಂಚಾದ್ ಉಂದೊಂಜಿ ಮಾಮಲ್ಲ ಪೊರ್ಲಕಂಟ್ದ ತುಳುನಾಡ್ದ ಸಾಂಸ್ಕೃತಿಕ ಕಥನಲಾ ಅಂದ್. ಚಾರಿತ್ರಿಕ ಪುರಾವೆಲೆ ಗ್ರಂತೊಲಾ ಅಂದ್. ಸಾಮಾನ್ಯವಾದ್ ಪುರಾಣ ಕಾವ್ಯೊಲೆಡ್ ಉಪ್ಪು ವರ್ಣಣೆಲೆದಲೆಕೊ ಪದಿನೆನ್ಮ ಅದ್ದೆಯದ ವರ್ಣನೆಲು ನಾನಾ ನಮೂನೆಡ್ ಉಂದೆಟ್ಟ್ ಉಪ್ಪುನೆಡ್ದಾತ್ರ ಏನಿದ ಕಾಲೊಗುಲಾ ಉಂದು ಒಂಜಿ Classic ಆದ್ ಒರಿವುನಂಚಿತ್ತಿ ಎಡ್ಡೆ ಗದ್ಯ ಕಾವ್ಯ ಆದುಂಡು.
ಒಂಜಿ ಪೆದ್ಮೆದಿನ ಆರೈಕೆಗ್ ಬೋಡಾಯಿ ಸನ್ನಾಯದ ವಿವರ ತೂಲೆ (ಪು.184). ಗಾಡಿಡ್ ಪೆದ್ಮೆದಿನ ಆರೈಕೆಗ್ ಬೋಡಾಯಿನ ಕಟ್ಟಬೆಲ್ಲ, ಅಚ್ಚಿಬೆಲ್ಲ, ಓಲೆಬೆಲ್ಲ, ಬೋಳಂತೆ ಅರಿ, ಉರ್ಪೆಲ್ದ ಅರಿ ಗಾಡಿ ನಿಲಿಕೆ ಬತ್ತ್ಂಡ್. ಕುರುವೆ ನಿಲಿಕೆ ತೆತ್ತಿ, ಭರಣಿ ನಿಲಿಕೆ ನೆಯಿ, ತಿಗತ್ತ ನೆಯಿ ಬತ್ತ್ಂಡ್, ಪೆದ್ಮೆದಿನ ಆರೈಕೆಗ್ ಕೋರಿದ ಕಿನ್ನಿಲು, ಪೆರಡೆ ಲಾಕಿಲು ಬತ್ತ್ಂಡ್, ಕಸಾಯೊಗು ಓಮ, ಕೊತ್ತಂಬರಿ, ಜೀರಿಗೆ, ಶುಂಠಿ, ಮೆಂತೆ, ಗೋಣಿ ಗೋಣಿಲೆಡ್ ಬತ್ತ್ಂಡಂ. ಇಲ್ಲದಕ್ಲೆಗ್ ಗಾಡಿ ನಿಲಿಕೆ ಲಾಡ್, ತಡ್ಪೆ ನಿಲಿಕೆ ಹೋಳಿಗೆ ಬತ್ತ್ಂಡ್, ಮಜಲೋಡಿಡ್ ಗೌಜಿಯೋ ಗೌಜಿ, ಒಕ್ಕೆಲ್ ಸಕ್ಕೆಲ್ಡ್ ಲಾಡ್ ಹೋಳಿಗೆದ ತಮ್ಮನ.
ಇಂಚ ಒವ್ವೇ ಒಂಜಿ ಲೇಸ್ದ ವರ್ಣನೆ, ದೈವದೇವೆರೆಗ್ ಕರಿವುನ ಕಟ್ಟ್ ಕಟ್ಟಳೆದ
91
