ಮದಿಪುಡು ಕರಿನ ಮೂಜಿ ನಾಲ್ ವರ್ಸೊದಿಂಜಿ ಬೈದಿನ ಪದಿಮೂಜಿ ಲೇಖನೊಲೆನ್ ಮೂಲು ಆಯ್ಕೆ ಮಲ್ತ್ ದ. ಆಯ್ಕೆ ಮಲ್ಪುನಗೆ ತುಳು ಸಂಸ್ಕೃತಿದ ಪರಿಚಯ ಮಲ್ಪುನಂಚಿ ಬರವುಲೆಗ್ ಪ್ರಾಮುಖ್ಯತೆ ಕೊರ್ತುಂಡು. ತುಳು ಭಾಷೆ, ತುಳು ಸಂಸ್ಕೃತಿ, ಊರೂಲೆಪುದರ್, ಕಬಿತೆಲು, ಪದ್ದೆಯಿಬಂಗಾರ್, ತುಳುನಾಡ ತುದೆಕುಲು, ಕಲಾವಿದೆರ್ ನಲಿಕೆದಕುಲು ಇಂಚಿತ್ತಿ ಅಪರೂಪದ ಸಂಸ್ಕೃತಿ ಅಧ್ಯಯನದ ಲೇಖನೊಲೆನ್ ಆಯ್ಕೆ ಮಲ್ಪ. ಕೌಡೂರು ನಾರಾಯಣ ಶೆಟ್ಟಿ, ಬರೆತಿನ "ಬಾಸೆದಾಂತಿನ" ಒಂಜಿ ವಿಶಿಷ್ಟ ನಮೂನೆದ ರಸಿಕ ಬರವು. ಹರಟೆದ ರೀತಿಡೇ ಸಂಸ್ಕೃತಿ ಬೊಕ್ಕ ಬಾಸೆದ ವಿಶಿಷ್ಟತೆನ್ ಪರಿಚಯ ಮಲ್ಲುವ ವಿಶಿಷ್ಟ ಲೇಖನೊ. ಅನಂತರಾಮ ಬಂಗಾಡಿಯೆರ್ನ "ಬಂಗಾಡಿದ ಇತಿ ಆದಿ" ಒಂಜಿ ಐತಿಹ್ಯ ಆಧಾರಿತ ಐತಿಹಾಸಿಕ ಬರವಣಿಗೆ, ಜ್ಞಾನಪೀಠ ಪ್ರಶಸ್ತಿ ವಿಜೇತೆರಾಯಿನ ಮಲಯಾಳಂ ಲೇಖಕೆ ಶ್ರೀ ಎಮ್.ಟಿ. ವಾಸುದೇವ ನಾಯರ್. ಅಕಾಡೆಮಿದ ಸಮಾರಂಭೋಡು ಮಲ್ದಿನ ಭಾಷಣ, "ತುಳು ಬಾಸೆಗ್ ಎಡ್ಡೆ ಭವಿಷ್ಯ ಉಂಡು" ಲೇಖನೊನು ಮುದ್ದು
ಮೂಡುಬೆಳ್ಳೆರ್ ಪೊರ್ಲುಡು ಅನುವಾದ ಮಲ್ಪೆರ್. ಅಪ್ಪೆ ಬಾಸೆದ ಬಗ್ಗೆ ಬೆಪ್ಪು ಪುಟಾವುನ ಶಕ್ತಿಯುತ್ತ ಬರವು ಅವು. ಚೌಟರ್ನ ಯಮುನಕ್ಕೆ ಕಾದಂಬರಿನ್ ಪೊರ್ಲುಡು ಪರಿಚಯ ಮಲ್ದಿನ ಡಾ. ವಾಮನ ನಂದಾವರೆರ್ನ "ಮಿತ್ತಬೈಲ್ ದ ಉಲಯಿ ಪಿದಯಿ" ಬರವು ವಿಶಿಷ್ಟವಾಯಿನವು. ಇಂಚ ಸಂಸ್ಕೃತಿ ಪರಿಚಯದೊಟ್ಟುಗು ವಿಶಿಷ್ಟತೆಗ್ಲಾ ಮಹತ್ವ ಕೊರ್ತುಂಡು.
ಸುರುಟು ಪಂಡಿಲೆಕನೆ ಈ ರೀತಿದ ಬರವುದ ಸಂಕಲೊನು ಬರೊಡು ಪನ್ಪಿನ ಈ ಸಂಕಲನದ ಆಶಯೊ. ಒರಿಯೆ ಲೇಖಕೆ ತುಳುಟ್ಟು ಇಂಚಿ ಲೇಖನ ಪ್ರಕಟ ಮಲ್ಪುನು ಆರ್ಥಿಕವಾದ್ ಕಷ್ಟ ಆಂಡಲಾ ಸಂಪಾದನೆದ ರೂಪೊಡು ಕನೆರೆ ಅಡ್ಡಿ ಇಜ್ಜಿ. ಇಂಚ ತುಳುತ್ತ ಸೃಜನೇತರ ಗದ್ಯ ಬರವಣಿಗೆನ್ ಬುಲೆ ಪಾವರ್ ಸಾಧ್ಯ.
ಈ ಲೇಖನ ಪ್ರಕಟನೆಗ್ ಕಾರಣರಾಯಿನ ಅಕಾಡೆಮಿದ ಗುರ್ಕಾರೆ ಶ್ರೀ ಎಂ.ಕೆ. ಸೀತಾರಾಮ ಕುಲಾಲೆಗ್, ರಿಜಿಸ್ಟ್ರಾರ್ ಶ್ರೀ ಎಚ್. ಎಸ್. ಶಿವರುದ್ರಪ್ಪೆರೆಗ್, ಸ್ಥಾಯಿಸಮಿತಿದ ಸದಸ್ಯರೆನ್, ಅಕಾಡೆಮಿದ ಸರ್ವ ಸದಸ್ಯೆರೆಗ್, ಮುದ್ರಣ ಮಲ್ತಿನ ಫೈನ್ ಪ್ರಿಂಟರ್ಸ್ ಉರ್ವ, ಮಾತೆರೆಗ್ಲಾ ಎನ್ನ ಸೊಲ್ಮೆಲು.
ಡಾ. ಗಣನಾಥ್ ಎಕ್ಕಾರ್
ಸಂಪಾದಕೆರ್
