ಮಂಡೆಗ್ ಪತ್ ದ್ , ಮೂಜಿ ಮೈಲ್ ನಡತೊಂದು ಬರೊಡು ತೂಲೆ. ನಿಗಲೆ ಕೇಂದೆ ಸಾಕ್ ಆವು, ಅಗಲೆ ಮೂಜಿದಿನ, ರಡ್ಜ್ ರಾತ್ರೆ ಬಸ್, ರೈಲ್ ಪಗತ್ ಪಗತ್ ಎಂಚ ಆವು ಪನಿ? ಅಂತೂ, ಅಪರೂಪೊಗು ಊರು ಜಪ್ಪುನು ಅದಗ. ಪಪ್ಪನ ಮೆಗ್ಯೆ ರಾಜು ತಿದ್ದಿ ಒಂಜಿ ವರ್ಸದಾರ್ಗೆ, ಪಪ್ಪ ಬೊಂಬಾಯಿಗ್ ಪೋನಗ. ಪಪ್ಪ ಐನ್ ವರ್ಸೊಡ್ದು ಬೊಕ್ಕ ಬರ್ನಗ, ತಿದ್ದಿಗ್ ಗುರ್ತ ತಿಕ್ ಜಿ. ತಿಕ್ಕುನು, ಮಗಲೆಡ ಪನೊಂದು ಇತ್ತೆರ್ಗೆ "ಅನ್ನೆ, ಅನ್ನೆ ಪನ್ನಿನಿ ಉನರೆ ಒಂಜಿ ಇಲ್ಲ್ ಆವೊಡು ಅತ್ತಾ, ಐಕ್ದೆ. ಬೊಕ್ಕ ಒಲ್ತ ಅನ್ನೆ, ಇಡೆ ಮುಟ್ಟ ಕನ್ನ್ ಡ್ ಕಾರ್ಡ್ ತುವ್ವರೆ ದಾಂತಿನ? ಒಲಾ ಗಟ್ಟದ ಮಿತ್ ಡ್ದ್ ಜೈದೆ“ ಪಂದ್.
ಎನ್ನ ಅಮ್ಮೆರೆ ಇಲ್ಲದ ಜಾಲ್ದ ಅರುಟು ಒಂಜರೆ ರಡ್ಡ್ ಆಲ್ ಗಾಂತ್ ದ್ ಎರು ಪೋಪಿನ ಒಂರ್ಕು, ಎನ್ನ ಮೆಗ್ಯೆ ಹರ್ಸೆ ಒರ ಬೂರ್ದ್, ಬದ್ಕ್ ದಿನ ಪುನ್ಯ. ಎನ್ನ ಅಪ್ಪೆ ಪಂಡಿಲೆಕ್ಕ ಎಂಕಲ್ನ ಮೈಯಾರ್ಗೆದ ದೈವ ಕುಪ್ಪೆ ಪಂಜುರ್ಲಿಯೇ ಆಯನ್ ಅದೆರ್ದಿನಿ. ಆರ್ ಗಲ್ಲಿಡ್ (ಒಂರ್ಕುಡು) ಇತ್ತೆರ್ ಇಂಬ್ಯನ್ "ಕ್ಯಾಚ್" ಪತ್ತೆರೆ. ಆರ್ ಕ್ಯಾಚ್ ಪತ್ತುಜೆರ, ಉಂಬೆ "ಔಟ್" ಆತುವೆ. ಅಂಚ ಆ ಗಾಂತ್ ದ ಒಂರ್ಕುದ ಪೋಡಿಗೆ ಇತ್ತ್ಂಡ್ ಎಲ್ಯ ಜೋಕುಲೆನ ಅಪ್ಪೆಲ್ಲೆಗ್. ಅಂಚಾದ್ "ಅಂಚಿ ಪೋವಡ ಮಗಾ, ಗುಮ್ಮೆ ಬರ್ಪೆ, ಗುಮ್ಮೆ ಕೊನೊಪೆ” ಪಂದ್ ಜೋಕುಲೆಗ್ ಪೋಡಿಗಟ್ಟಾವೊಂದ್ ಇತ್ತೆರ್, ಒರ ಅಲ್ಪದ ಗುಮ್ಮ ನಾಯ್ಕೆರ್ ಬತ್ತೆರ್ಗೆ. ಒಂಜಿ ಬಾಲೆ ಜಾಲ್ಡ್ ಗೊಬ್ಬೊಂದು ಇತ್ತ್ಂಡ್, ಬಾಲೆದ ಅಜ್ಜಿಗ್ ಸರಿ ತೋಜುಜಿ, ಕನ್ನ್ ಗ್ ಕೈ ಅಡ್ಡ ಪತ್ ದ್, ಬಗ್ಗ್ ದ್ "ಅವು ಏರ್ ಬರ್ಪಿನಿ, ಗುಮ್ಮೆನಾ?" ಪಂದ್ ಪಂತಿನನೇ ಗೊತ್ತು, ಬಾಲೆ ಒರಾನೆ ಕಲ್ಕ್ಂಡ್ಗೆ. ಪೊಡ್ತುದು ಜರ ಪಂದ್ ಕರ್ಬ ಕೈತ್ ನೀರ್ ಕೊರಿಯೆರ್ಗೆ. ಈ ಬಾಸೆದಾಂತಿನ ಅಪ್ಪಲು, ಗುಮ್ಮನ ದಾಯೆಗ್, ಪೊಲೀಸ್ದ ಪೋಡಿಗೆ ಕಟ್ಟಾವರೆ ಆಪುಜಾ?
ಗುಮ್ಮನ ಸುದ್ದಿ ಪಾತೆರ್ನಗ ಗುಣಪಾಲನ ಸುದ್ದಿ ಗೋಚರೊಗು ಬತ್ತ್ಂಡ್. ಎಂಕ್ ಅಪಗ ಆಜಿ ವರ್ಸ. ಬೈಯನಗ ನಾಲ್ ಕೈಕಂಜಿಲೆನ ಒಟ್ಟುಗು ಒಂಜಿ ಗೋನೆ, ಒಂಜಿ ಪಾರೊಲ್ ನು ದೇರೊಂದು ಇಲ್ಲಡ್ದ್ ಒಂಜಿ ಪರ್ಲಾಂಗ್ ದೂರ ಪಾಡಿಡ್ ಮೇಪಾವೊಂದು ಇತ್ತೆ. ಎನ್ನ ಅಜ್ಜಿ ಮೊಂಟಿಯಕ್ಕೆಗ್ ಜೋಕುಲು ಕನ್ನ ಎದುರು ಇಜ್ಜಡ ಜೀವ ಪಾರುಂಡು. ರಡ್ಡ್ ಸರ್ತಿ ಲೆತ್ತೆರ್. ಮೆರೆನ ಯಾಪದಲ ಇತ್ತೆನನೇ ರಾಗ ಪಂದ್ ಯಾನ್ ಒಕೊನುಜಿ, ಮುಲ್ಲ ಪಂರ್ದ್, ಕುಂಟಲ್ಲ ಪಂರ್ದ್ ಪೆಜ್ಜೊಂದು ಇತ್ತೆ.
100
