ಪಾಡ್ದನದ ನನೊಂಜಿ ಎಗ್ಗೆ ಲೋಕೊಗು ಸಂಬಂಧ ಪಟಿನ ಪಾಡ್ದನೊಲು. ಮುಲ್ಪ ದೈವ ದೇವೆರೆನ ವಿಷಯ ಬತ್ತ್ಂಡಲಾ ಅಲ್ಪ ಭಯ ಭಕ್ತಿದ ವಿಷಯ ಇಜ್ಜಿ. ಉಂದೊಂಜಿ ಸಾಮಾನ್ಯ ಕತೆತ್ತ ಲೆಕ್ಕ ತೋಜುಂಡು. ಉದರ್ಮೆಗ್ ಅಮೃತ ಸೋಮೇಶ್ವರರ್ ಪಾಡ್ಡನ ಸಂಪುಟೊಡು ಪಂತಿಲೆಕ ಪರತಿ ಮಂಗಣೆ, ಒನ್ನಮ್ಮ ಜೇಪು, ಇಂದುಲ್ಲ ಮಾಣಿಗ, ಬಾಲೆ ದುಗ್ಗಮ್ಮ, ಬಾಲೆ ತಂಗಡಿ, ಇಂಚಿತ್ತಿನವು. ಅಂಚಂದ್ ದೇವುಪೂಂಜೆ, ಸಿರಿ, ಕೋಟಿಚೆನ್ನಯ ಮೊಕುಲು ನರಮಾನಿಲು ಆದಿತ್ತೆರ್‌ಡಲಾ ಅಕಲ್ನ ಪಾಡ್ದನೊಲು ಲೌಕಿಕ ಅತ್ತ್. ದಾಯೆ ಪಂಡ ಅಕುಲು ದುರಂತ ಮರಣೋನು ಪಡೆದ್ ದೈವಿಕ ಶಕ್ತಿಲು ಆದ್ ಆರಾಧನೆ ಪಡೆತಿನಕುಲು.
ಒಟ್ಟಾರೆ ಆದ್ ತೂವೊಂದು ಪೋಂಡ ಪಾಡ್ದನೊಲೆಡ್ ತುಳುನಾಡ್‌ದ ಸಂಸ್ಕೃತಿ ಉಂಡು. ದುಂಬುದ ಜನೊಕುಲು ಎಂಚ ಬದ್‌ಕ್‌‌ದೆರ್ ಅಕಲ್ನ ಜೀವನ ಮೌಲ್ಯ ದಾದ? ನಂಬಿಕೆ, ವೇಷ ಭೂಷಣ, ಒಣಸ್ ತಿನಸ್, ಮರ್ದ್ ಮಾಯ್, ಆಟ ಕೂಟ, ಇಲ್ಲ್ ಬದ್ಕ್, ಕುಟುಮ ಸಂತಾನ, ತೆಲಿಕೆ ನಲಿಕೆ ಎಂಚ ಇತ್ತ್ಂಡ್ ಪನ್ಪಿನೆನ್ ತೆರಿಪಾವಂದ್ ಮಾತ್ರ ಅತ್ತಂದೆ ತುಳುನಾಡ್‌ಡ್ ಇತ್ತಿನ ವರ್ಗ ಸಂಘರ್ಷದ ಕತೆಲಾ ಪಾಡ್ಡನೊಲೆಡ್ ತೆರಿಪುಂಡು. ಭಾಷೆದ ಪೊರ್ಲುನು ತೂವೊಡಾಂಡ ಪಾಡ್ಡನೊಲೆಡೇ ತೂವೊಡಾವುಂಡು. ಜಾತಿ ಸಂಘರ್ಷ, ಶೋಷಣೆ, ಅತ್ಯಾಚಾರ ಈ ಚಿತ್ರಣೊಲು ಪಾಡ್ದನೊಲೆಡ್ ಬೋಡುತ್ತಿನಾತ್ ಉಂಡು. ಒಂಜಿ ದೃಷ್ಟಿಡ್ ತೂಂಡ ಪಾಡ್ಡನೊಲು ಮಾನವಕುಲ ಶಾಸ್ತ್ರದ ಅಧ್ಯಯನದ ದೃಷ್ಟಿಡ್ ಮುಖ್ಯ ಆಕರ ಸಾಮಗ್ರಿ ಆದ್ ತೋಜುಂಡು. Parry Lordನ ಸಿದ್ಧಾಂತದ ಲೆಕ್ಕ (ಮೌಖಿಕ ಸೂತ್ರ ಸಿದ್ಧಾಂತ) ಪನ್ಪುನುಂದಾಂಡ ತುಳು ಪಾಡ್ದನೊಳು ಬಾಯಿಪಾಠದ ಸೊತ್ತತ್ತ್. ಅವು ಸಂದರ್ಭ ಸಂದರ್ಬೋಡು ಪಾಡ್ಡನಕಾರೆ ಬದಲಾವಣೆ ಮಲ್ತೊಂದು ಬೋಡಾತಿನೆನ್ ಮಾತ್ರ ಪಂಡೊಂದು ಪೋಪಿನ ವ್ಯಾಪ್ತಿ ಅಯಿಕ್ಕುಂಡು. ಅಂಚಾದ್ ಜನೊಕ್ಕು ಜನೊಕ್ಕು
21
