ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಪಂಡಿಲೆಕ್ಕ ಇತ್ತೆ ಮರ್ದ್ದ ದೈ ಬೊಡ್ಚಿ, ಬಿತ್ತಿಲೆನ್ ತೂವರೆಗಿಜ್ಜಿ. ಅಂಗೈ ಅಗಲ ಜಾಗ್ಡ್ಲ ಇತ್ತೆ ನೂದ್ ಇಲ್ಲ್ ಉಪ್ಪುನ, ಫ್ಲಾಟ್, ಕಟ್ಟೋಣನ್ ತೂವೊಲಿ. ಇಂಚ ಉಪ್ಪುನಗ ನನ ಗಿಡಮೂಲಿಕೆ ಬುಲೆಪುನ ಕಾಡ್, ಗುಡ್ಡೆಲೆನ್ ದುರ್ಬಿನ್ ಪಾಡ್ದ್ ತೂಂಡಲಾ ತೋಜರೆಗಿಜ್ಜಿ. ಅಂಚಾದ್, ನಮ್ಮ ಹೆರಿಯೆರ್ ನಾಡ್ದ್ ಪತ್ತಿನ ಏರ್ಲ ಬಿಲೆಕಟ್ಟರೆಗಾವಂದಿನ ಗಿಡಮೂಲಿಕೆದ ಸಂಪತ್ತ್ ಇನಿ ಮಾತಲಾ ಅಲಿದ್ ಪೋತಿನವು ಒಂಜಿ ಬೇನೆದ ಸಂಗತಿ ಆಂಡಾ, ನನೊಂಜಿ ದಿಕ್ಕಡ್ ಅಂಚಿನ ದೈ-ಬೂರ್ನು ಗುರ್ತ ಅರ್ಥ ಮಲ್ಲುನಾಕ್ಲು ಇತ್ತೆ ಏರ್ಲಾ ಉಪ್ಪಂದಿನವು ಸತ್ಯದ ಸಂಗತಿ. ಗುರ್ತ ಇತ್ತ್ಂಡಲಾ ಅವೆನ್ ನಾಡ್ದ್ ಕನತ್ ನುಂಗಾದ್, ಕುಟ್ಟುದು, ಕೊದಿಪಾದ್, ಪೊಡಿಮಲ್ತ್ ದ್ ಬಂಜಿಗ್ ದೆತೊನುನ ತಾಳ್ಮೆ ಇನಿತ ಯಾಂತ್ರಿಕ ಯುಗದಕ್ಲೆಗ್ ಇಜ್ಜಾಂದಿನವು ಭಾರಿ ವ್ಯತೆತ ಸಂಗತಿ. ಇತ್ತಿನ ಕೆಲವು ಗಿಡಮೂಲಿಕೆದ ದೈಕುಲು . . ನಾಗರಿಕತೆದ ಪ್ರಭಾವಡ್ ಪರಿಸರ ಮಾಲಿನ್ಯಡ್ ಅಲಿದ್ ಪೋವೊಂದುಂಡು. ದುಂಬುದಕ್ಲು ಸೀಕ್ ಬತ್ತಿ ಬೊಕ್ಕ ಮರ್ದ್ ಮಲ್ಪುನೆಡ್ದ್ ಸೀಕ್ ಬರಂದಿಲೆಕ್ಕ ಗಿಡಮೂಲಿಕೆನ್ ಹಾರಡ್ ಬಲಸ್ದ್ ಜಾಗ್ರತೆ ಮಲ್ತೊಂದಿತ್ತೆರ್.
ಇತ್ತೆದಾಕ್ಲೆಗ್ ಐತ ಒಗರ್, ಕೈಪೆ, ಪರಿಮಲ ಒಗ್ಗುಜಿ. ಇತ್ತೆದಾಕ್ಲೆಗ್ ದುಂಬುದ ಉನಸ್, ಅಡ್ಡೆ ಪುಂಡಿ ಒಗ್ಗಂದೆ ನಾಲಾಯ್ ದ ರುಚಿಗಾದ್ರ ವಿದೇಶದ ಅಡೈಲೆನ್ ಫಾಸ್ಟ್ ಫುಡ್ಲೆನ್, ಅತ್ತಡ ಬಾಯಿಗ್ ಪಾಡ್ಂಡ ನೀರಾಪಿನ ಬೇಕರಿದ ತಿಂಡಿಲೆನ್ ತಿಂದಿನಾಕ್ಲೆಗ್ ನಾರ್-ಬೇರ್, ತಪ್ಪ್, ಕಂಡೆಲೆಡ್ ಮಲ್ತಿನ ತಂಬುಲಿ, ಅಜಾದಿನ, ಚಟ್ನಿ, ಸಾರ್, ಕೊದ್ದೆಲ್, ಗಸಿತ ಕೈಪುಲು, ಬೊಕ್ಕ ಗಟ್ಟಿ, ತೆಲ್ಲಾವ್ ಇಂಚಿನ ಅಡ್ಡೆಲೆನ್ ತಿನ್ವೆರಾ?
ಇತ್ತೆ ಏತೋ ಜನಕ್ಲೆಗ್ ಐತ ರಿಚಿ ತಿಂದ್ದ್ ಬೊಡ್ಚಿ, ಮಲ್ಪುನ ಬೊಡ್ಚಿ, ಪುದಾರ್ನ್ಲ ಕೇನ್ಡ್ ತೆರಿಯಂದಿನಕ್ಲು ಜಿಂಜ ಜನ ಉಲ್ಲೆರ್. ಐಡ್ಡಾತ್ರ ದುಂಬುದಕ್ಲು ಜಿಂಜ ವರ್ಷ ವಾ ಸೀಕ್ ದಾಂತೆ ಕಲ್ಲಗುಂಡುದಲೆಕ್ಕ ಆರೋಗ್ಯಡ್ ಇತ್ತೆರ್. ಪತ್ತ್ ಇರುವ ಪೆದ್ದಿನಕ್ಲಲ ಪದಿನಾಜಿ ವರ್ಷದ ಜವಂತಿಲೆಕ್ಕ ಇತ್ತೆರ್. ಆಕುಲೆನ ಕಣ್ಣ್, ಕೆಬಿಲಾ ಭಾರಿ ಸೂಕ್ಷ್ಮ. ಸಮ ತಿನೊಂದಿತ್ತೆರ್, ಸಮ ಬೆನೊಂದಿತ್ತೆರ್. ಅತ್ತಾಂದೆ ಇತ್ತೆದಕ್ಲೆಗ್ ಒಂಜಿ ಗಲ್ಗೆಡ್ ಸೀಕ್ ಗುನ ಆವೊಡು, ಬೇನೆನ್ ತಡತೊನ್ರೆಗ್ಲ ಗೊತ್ತಿಜ್ಜಿ, ಅಂಗಡಿದ ಮರ್ದ್ ಮಾತ್ರೆಲೆಡ್ ವಂತೆ ಸಮಯೊಡು ಬೇತೆ ಸೀಕುಲು ಬರ್ಪುಂಡುಂದು ಅಕ್ಲೆಗ್ ಗೊತ್ತಿಪ್ಪುಜ್ಜಿ. ಗಿಡಮೂಲಿಕೆದ ಮರ್ದ್ ವಾ ಭಾದಕಲಾ ಇಜ್ಜಿಂದ್ ತುಳುಜನಪದರೆನ ನಂಬಲಿಕೆ.
65
