ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಬಂಜಿನಾಲೆಗ್ ಬಲಸುನ ಕ್ರಮದ ವರ್ಣನೆ ಪಾಡ್ಡನೊಡು ಇಂಚ ಬೈದುಂಡು.
1. ಮುತ್ತು ಬರನದ ನುಪ್ಪು | ಪಚ್ಚೆ ಬರನದ ಕಯಿಪು | ಎಣ್ಣೆಲ ಕಾಯೊಡೆ ಬನ್ನಲ್ಲ ಚಕ್ಕುಲಿ! ಅಂಗಯಿ ಮುರ್ಕೆಲ ನೆಯಿ | ಮುಂಗಯಿ ಮುರ್ಕೆಲ ಕೊಜಪು ಪುಲಿ ಕೂಟುದು ಮುನ್ನೂದು ಬಗೆ, ಅಳೆ ಕೂಟುದು ಆಯ್ನಾದ್ ಬಗೆ ಪೇರ್ ಡ್ ಉಂಡಲ್ ಅಲೆತ್ ಕಯಿ ದೆಕಿಯಲ್ |
ಇಂಚ ಏತೆ ಬಡಪತ್ತ್ ದಕ್ಲಾಂಡಲ ಕಡೀರ್ದ ಬಂಜಿನಾಲೆಗ್ ಬಯಕೆದ ಕ್ರಮನ್ ಮಲ್ಪೆರ್. ಬೊಕ್ಕ ಅಪ್ಪೆ ಇಲ್ಡ್ಲಲ.. ಬಂಜಿನಾಲೆಗ್ ಪೊರಿತ ಶಾಸ್ತ್ರ ಅತ್ತಡ ಉನಸ್ ಬಲಸುನ ಕ್ರಮಲೆನ್ ಮಲ್ಪೆರ್.
ಬಯಕೆದ ಮದಿಮಾಲ್ ಪೆದ್ದರೆ ಅಪ್ಪೆ ಇಲ್ಲಗ್ ಪೋವೊಡಾಂಡ ಬ್ರಾಣೇರ್ನ ವರ್ಗಡ್ ಹೆರಿಯೆರ್ ಇಲ್ಲದ ದೈವ-ದೇವೆರೆಡ ಸುಗಿತ್ದ್, ಮಾಮಿ ಆಲೆನ ಸಿರಂಗ್ಗ್ ಅರಿ, ಮಂಜಲ್ದ ಕೋಡು, ಎಡ್ಡೆ.ಮುಂಚಿನ್ ಸಕನಕ ಕಟ್ವಲ್.ಕೈಕ್ ಬಿಸತ್ತಿ ಕೊರ್ಪೆರ್. ರಡ್ಡ್ ತೆಪ್ಪಿತ್ತಿನ ತಾರಾಯಿನ್ ಕೊರ್ದು ಕಡಬುಡ್ನಗ ಮದಿಮಾಲ್ ಪಿರತೂವಂದೆ ಅಪ್ಪೆ ಇಲ್ಲಗ್ ಪಿದಾಡ್ದ್ ಪೋತಿನಾಲ್ ತೊಟ್ಲಬಾಲೆದೊಟ್ಟುಗೇ ಕಂಡನೆನ ಇಲ್ಲಗ್ ಬರೊಡುಂದು ಕಟ್ಟ್ ಉಂಡು.
ಮಾತೃ ಮೂಲ ಪದ್ಧತಿಡ್ ಬಂಜಿನಾಲ್ ಅಪ್ಪೆ ಇಲ್ಲಗ್ ಪಿದಾಡ್ನಗ (ಸಸಾಯಿ) ಸೀಗೆಕಾಯಿ, ಸಾಸಮಿ, ಮಂಜಲ್ದ ಕೊಂಬು, ಕೊತ್ತಂಬರಿ, ಎಡ್ಡೆ ಮುಂಚಿ, ಐನ್ ವಾಲೆ ಬೆಲ್ಲ, ಐನ್ ಪಾವಲಿನ್ ಆನನ ಅಮ್ಮೆ ಬೊಕ್ಕ ಅಜ್ಜೆರ್. ಮದಿಮಾಲೆನ ಸಿರೆಂಗ್ಗ್ ಪಾಡ್ದ್ ನಂಬಿಂಚಿನ ದೈವ-ದೇವೆರೆಡ ಭಕ್ತಿಡ್, ಪೊರ್ಲುಡು ಬಂಜಿದ ನಂಜಿ ತಿರ್ತ್ ಪಾಡ್ಪಾದ್.. ಒಂಜಿ ರಡ್ಡಾದ್ ಪೊರ್ಲುಡು ತೊಟ್ಲಾಲೆ ಬರೊಡೂಂದು ಸುಗಿತ್ತ್ದ್ ಗೆಜ್ಜತ್ತಿ ಕೊರ್ದು ಬಂಜಿನಾಲೆನ್ ಕಡಪುಡ್ಬೆರ್.
•ಆಲ್ ಪೆದ್ದಿ ಬೊಕ್ಕ ತೊಟ್ಲಾಲೆ ಕಂಡನೆ ಇಲ್ಲಗತ್ತಾವಂದೆ ಬೇತೆ ವಾ ಇಲ್ಲಗ್ಲಾ ಸುರು ಪೋವೆರೆ ಬಲ್ಲಿ ಪನ್ಪುನ ಕಟ್ಟುಂಡು.
•ಬಯಕೆದಾನಿ ಬಂಜಿನಾಲೆಗ್ ಬಲೆಸಿನ ಇರೆನ್ ಕುರ್ನಿದೊ್ರಟ್ಟುಗು ಅಲೆಗ್ ತೊರತ್ದ್ ದಿಕ್ಕಲ್ದಿಗ್ ದುಂಬು ಕೊರೊಂದಿತ್ತೆರ್ಗೆ. ಅಂಚ ಮಲ್ತ್ಂಡ ಆಲೆಗ್ ಬೂರ್ದಿನ ಕೊದಿ, ಗೆರಚಾರ ಪೋಪುಂಡೂಂದ್ ನಂಬಲಿಗೆ ಇತ್ತೆಂಡ್ಗೆ.
24
