ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಜನಪದೆರ್ ಉಂಡುಮಲ್ತಿನ ಪಾಡ್ಡನೊಡು ... ಆಕುಲೆನ ಬದ್ಕ್ ದ ಸಂಸ್ಕೃತಿಗ್ ಪತ್ತಿನ ಕನ್ನಡಿಯಾದುಂಡು. ಉಂದೆಟ್ ದುಂಬು ತುಳು ಸಮಾಜ ಬುಲೆದ್ ಬತ್ತಿ ರೀತಿ, ಆಚಾರ- ವಿಚಾರ, ಕೂಡುಕಟ್ಟೆ, ಸಂಪ್ರದಾಯ, ಕಲೆ, ಗೊಬ್ಬು, ಪಗೆ, ವಿನೋದ, ತುತ್ತೈತ ಆಹಾರ- ವಿಚಾರನ್ ತೆರಿಯೊಲಿ.
ಅತ್ತಂದೆ ತುಳುನಾಡ್ಡ ಕಾರ್ನಿಕ ಜನಮಾನಿನ ಪುಟ್ಟು, ಜೋಕ್ಲಾಟಿಗೆದ ಗೊಬ್ಬು, ಅಪ್ಪೆನ ಕೊಂಡಾಟ ಇಂಚ ಕೆಲವು ಪಾಡ್ಡನೊಡು ಬತ್ತಿನ ಪ್ರಸಂಗ ಉಂಡು. ಮಾತ್ರ ಹೆಚ್ಚದ ಪಾಡ್ಡನದ ವರ್ಣನೆ ... ಉಪಮೆ ... ಪ್ರಾಸ....ಪ್ರಸಂಗೊಲು ಒಂಜೇ ಲೆಕ್ಕ ಅತ್ತಡ ಅಂಚಿ-ಇಂಚಿಂಡ್ ಒಂತೆ ವ್ಯತ್ಯಾಸ ತೋಜ್ದ್ ಬರುಂಡು. “ದೇಯಿ ಬೈದೆದಿ, ಕೋಟಿ-ಚೆನ್ನಯ, ಕಾಂತಾಬಾರೆ-ಬೂದಬಾರೆ, ಸಿರಿ ಕುಮಾರೆ, ತನ್ನಿಮಾನಿಗ, ಚೆನ್ನು ಕುಣಿತ, ಮೈಸಂದಾಯ, ಕಲ್ಕುಡ ... ಇಂಚಿನ ಪಾಡ್ದನೊಡು ಬಾಲೆಲುನ ತಾಂಕನದ ಚಿತ್ರಣದ ವಿವರನೆ ತಿಕ್ಕುಂಡು.
ಮೈಸಂದಾಯ ಭೂತದ ಅಪ್ಪೆನ ಪುದರ್ ಮೈಯಗೆಂಡ್, ಮೈಯಿ ಪನ್ಪುನಾಲೆನ ಮಗೆ ಮೈಸಂದಾಯೆ. ಈ ಬಾಲೆಗ್ ಪುಟ್ಟುನಾಗನೆ ಮಂಡೆಡ್ ಕೊಂಬು ಉಪ್ಪುಂಡುಗೆ, ಯುದ್ದೊಡು ಆಕುಲೆಗ್ ಸೋಲಾದ್ ರುಂಡ ಮುಂಡ ಬೇತೆ ಬೇತೆಯಾದ್ ಬೂರ್ನಗ ಅಪ್ಪೆ ಬಾಲುಲೆಗ್ ದತ್ತ-ಬಲತ ಮಿರೆ ಪೇರ್ ಕೊರುದು... ಬೆರಿ ಪೂಜ್ದ್ ಬಾಲೆಲೇ ಕಾಯ ಬುಡ್ದ್ ಕೈಲಾಸೊಗು ಪೋಲೆ, ಜೀವ ಬುಡ್ಡು ವೈಕುಂಠಗು ಸಲ್ಲುಲೆಂದು ಕಡಪುಡ್ದ್ ಕೊರ್ಪುನ ಪ್ರಸಂಗ ಬರ್ಪುಂಡು.
ತುಳುವೆರೆನ ಕೃಷಿ ಸಂಸ್ಕೃತಿಗ್ ಸಂಬಂಧಪಟ್ಟಿನ ಭೂಮಿ ಪೂಜೆದಾನಿ (ದೀಪಾವಲಿಡ್ ಬಲಿ ಚಕ್ರವರ್ತಿನ್ ಲೆಪ್ಪುನು) ಪೊಲಿ ಲೆಪ್ಪುನ ಕ್ರಮ ಉಂಡು. ಆ ಧಾನ್ಯದ ಸಿರಿದೇವಿ ಎಂಚ ಬರೊಡು ಪಂಡ್ದ್ ಜನಪದರೆನ ನುಡಿಗಟ್ಟಿಡ್ ಇಂಚ ಉಂಡು.
ಪೊಲಿ ಪೊಲಿ ಆ ಜಾಲ ಈ ಜಾಲ ಪೊಲಿ
ಎಲ್ಪತೇಲ್ ಜಾಲ ಪೊಲಿ, ಪಂಚ ಪಾಂಡೇರ್ಕಲೆ ಪೊಲಿ
ನಿತ್ಯ ದೇವರ್ಕಲೆ ಪೊಲಿ ಅಪ್ಪೆ ಬೆರಿಯೆ ಬಾಲೆಲು
ಬನ್ನಂಗೆ ಬರೊಡುಂದ್ ಪೊಲಿನ್ ಲೆಪ್ಪುವೆ.
184
