ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ
ಮಣ್ಣ್ ದ ಗುಣೋ ಬಿರ್ಸ್ ಮಲ್ಲಾವು.
ಓ ಬಾಲೆ ನಿದ್ರೆಡ್ದ್ ಲಕ್ಕಪ್ಪ ಕನಕುಲೆ
ಕುಡ್ತ್ ಲಕ್ಕೊಂದು ಬಲ ಇತ್ತೆ
ಈ ಚಲ್ಲ್ ಜಾಗಡ್ದ್ ಕೇಂದ್ ಪಾಸ್ಡ್ದ್
ಲಕ್ಕ್ ಕಣ್ಣೆದ್ರ್ ಉಂತೊನ್ಲಾ .
ಬಾಲೆಲೆಗ್ ಸಂಬಂಧ ಪಟ್ಟಿನ ನುಡಿಕಟ್ಟುಲು
ಜನಮಾನಿನ ಬದ್ಕ್ ಡ್ ಪುಟ್ಟು ಕಜಂಬು ತರೆನೀರ್ದ ಮದಿಮೆ, ಮದಿಮೆ- ಬಯಕೆ- ಸಾವು, ಕನ್ಯಾವು ಇಂಚಿನ ಎಡ್ಡೆ ಪಡ್ಕೆದ ಸಂಸ್ಕಾರೊಡು ಪತ್ತಸೇರ್ದಿನ ಕಲೊಟು ಸುಗಿಪುನ ಮದು ಪನ್ಪುನ ಆಚರನೆ ಉಂಡು.
•ಧರ್ಮದ ನಡೆಟ್ ದೈವ, ಬಾಲೆಗ್ ಬಾಳ್ ದ ಪೆಟ್ಟ್ ಕೊರ್ಪಿನವು ಧರ್ಮ ಅತ್ತ್oದ್ ನುಡಿಟ್ ಅಭಯ ಕೊರ್ಪುಂಡು.
•ಬಯಕೆದ ಪೊರ್ತುಡು ಪೊನ್ನನ್ ಅಪ್ಪೆ ಇಲ್ಲಗ್ ಕಡಬುಡ್ಪುನ ಪೊರ್ತುಗು ಇಲ್ಲದ ಗುರ್ಕಾರೆ, ದೈವ-ದೇವೆರೆನ ಎದುರುಡು “ಎಂಕುಲು ನಂಬೊಂದು ಬೈದಿನ ಸತ್ಯೋಲು, ರಡ್ಡ್ ಕುಟ್ಮದ ದೈವದೇವರ್ನಾಕ್ಲು ಈ ಇಲ್ಲದ ಬಾಲೆ (ಬಯಕೆದ ಮದಿಮಾಲ್) ಜತ್ತ್ ಪೋಪಿನ ಪೊರ್ತುಗು ವಿಸ ಗಲಿಗೆ ಇತ್ತಂಡ ಅವೆನ್ ಗರುಡ ಬಾಯಿಗ್ ಪಾಡ್ದ್ ಅಮೃತ ಗಲಿಗೆನ್ ಒದಗಾದ್ ಕೊರೊಡು. ದಿಂಜಿದಿ ಕಪ್ಪಲ್ ನಂಜಿದ ಪುದೆ ಬಂಜಿಡುಂಡು, ಪೆದ್ದುನ ಪೊರ್ತುಡು ಒಂಜಿ ಜೀವ ರಡ್ಡಾನಗ ಅಲೆಗ್ ಬರ್ಪುನಂಚಿತ್ತಿನ ಮಾತ ಪೆದ್ದುಬೇನೆ ಬೆಸರಗ್ ಕುದ್ದುಬೇನೆ ಕೊರ್ದು, ನಂಜಿ ನೀರ್ನ್ ಪಿದಯಿ ಪಾಡ್ದ್ ಆಲ್ ಆನ್ ಬಾಲೆನ್ ತೊಟ್ಲಾಲೆ ಪತೊಂದು ಈ ಇಲ್ಲ (ಕಂಡನೆನ) ಮುಟ್ಟಿಕಲ್ಲ್ ಮಿತರ್ಲೆಕ್ಕ ಮಲ್ಪುನ ಕೀರ್ತಿ ಎಂಕುಲು ನಂಬುದಿನ ಸತ್ಯೋಲೆಗ್ ಸೇರ್ದಿನಂದ್ ಸುಗಿತ್ ಕಡಪುಡ್ದ್ ಕೊರ್ಪೆರ್.
•ಬಾಲೆ ದಾಂತೆ ದೈವಡ ದೂರು ಕೊರ್ನಗ ಸಂಸಾರಗ್ ವಂಸದ ಕೊಡಿ ಬೋಡು ಪನ್ಪುಂಡು. ನಾಗ ಬೆರ್ಮೆರೆನ್ ಸಾರಥಿ ಮಲ್ತೊಂದ್ ಮಾಗಣೆ ದೇವೆರೆನ ಅನು ದೆತ್ತೊಂದ್ ಮೂಜಿ ಸನಿವಾರ ಮಧುಮಾಸ ತಿನಂದೆ ಅಸ್ವತ್ಥ ಕಟ್ಟೆಗ್ ಬಲಿ ಬರೊಡು. ಮೂಜಿ ಅಮಾಸೆ ಮೀಯೊಡು, ಪರಬಿತ್ತ್ ಗ್ , ಪೊಸ ಬಿತ್ತ್ ಮಗತ್ ಪಾಡೊಡು.
181
