ಭಾಗಂಡಕ್ಷೇತ್ರೋಂದ್ ಪುದರ್, ಉಂದು ಭಗಂಡ ಪಣ್ಪಿ ಋಷಿ ತಪಸ್ಸ್ ಮಳ್ತಿನ ಜಾಗೆ.ಮುಳ್ಪನೇ ಕಾವೇರಿ-ಕನಕೆ ಪಣ್ಪಿ ಸುದೆಕ್ಕ್ಳ್ ಪರಿತ್ತೊಂದುಲ್ಲೆರ್ಂದ್ ಸ್ಕಂದವನೊತ್ತ ವಿಶೇಷತೆಳೆನ್ ಪೂರ ಬುಡಬುಡ್ಪಾದ್ ಪಣ್ಪೆರ್.
ಕಾವೇರಿನ ಕತೆನ್ ಕೇಂಡಿಪೆಟ್ಟ್ಗ್ ಪಾರ್ವತಿದೇವಿನ ಕುತೂಹಲೋ ಕುಡ
ಹೆಚ್ಚಾಂಡ್, ತನ್ಕ್ ಕಾವೇರಿನ ಕತೆನ್ ಪಣೊಡುಂದ್ ಆರ್ ಶಿವದೇವೆರೆಡ ಅರಿಕೆ
ಮಳ್ತೊಂಡಲ್, ಶಿವದೇವೆರ್ ಕಾವೇರಿನ ಕತೆನ್ ಇಂಚ ಪಣ್ಯರೆ ಸುರು ಮಳ್ತೆರ್:
ರಡ್ಡನೆದ ಅಧ್ಯಾಯೊ:
ಭಾರೀ ಪ್ರಾಕ್ಡ್ ಕವೇರೆ ಪಣ್ಪೆ ಒರಿ ಋಷಿ ಇತ್ತೆರ್. ಆರೆಗ್ ಮದ್ಮೆ ಆದ್ ಸುಮಾರ್ ವರ್ಸೊಮುಟ್ಟ ಜೋಕುಳಾತ್ಜ್ಜಿ, ತನ್ಕ್ ಸಂತಾನೊ ಬೋಡುಂದ್ ಆದ್ ಬ್ರಹ್ಮಗಿರಿ ಪಣ್ಪಿ ಜಾಗೆಡ್ ತಪಸ್ಸ್ ಮಳ್ತೆರ್. ಆರೆನ ತಪಸ್ಸ್ಗ್ ಮೆಚ್ಚಿದ್ ಬ್ರಹ್ಮದೇವೆರ್ ಕಣ್ಣೆದ್ರ್ ತೋಜಿದ್ ಬತ್ತ್ದ್- 'ಬೋಡಾಯಿನ ವರೊನ್ ಕೇಂಡೊನ್ಂದ್ ಪಂಡೆರ್. ಕವೇರೆ ತನ್ನ ಮನಸ್ಸ್ದ ಅಭಿಪ್ರಾಯೊನ್ ಪಂಡೆರ್, ಆತಾನದ ಬ್ರಹ್ಮದೇವೆರ್- 'ನಿಕ್ಕ್ ಈ ಜನ್ಮೊಡು ಜೋಕುಳೆ ಭಾಗ್ಯ ಇಜ್ಜಿ. ಆಂಡ ನಿನ್ನ ಆಸೆ
ಮಣ್ಣಾವರೆಬಲ್ಲಿ. ಅಯಿಕ್ಕ್ ಬೋಡಾದ್ ಎನ್ನ ಮಗಳಾಯಿನ ಲೋಪಾಮುದ್ರೆನ್ ನಿಕ್ಕ್ ಕೊರ್ಪೆ. ಆಳೆನ್ ಸ್ವೀಕಾರೊ ಮಳ್ಪುಲಂದ್ ಪಂಡೆರ್, ಬ್ರಹ್ಮನ ಅಪ್ಪಣೆದಂಚನೆ ಕವೇರ ಋಷಿ ಲೋಪಾಮುದ್ರೆನ್ ತನ್ನ ಮಗಳಾದ್ ಸ್ವೀಕಾರ ಮಳ್ತೆ, ಆತಾನಗ ಲೋಪಾಮುದ್ರೆ
ತಾನ್ ದುಂಬುಗ್ ಸುದೆಯಾದ್ ಪರಿತ್ತ್ದ್ ಲೋಕೊಗು ಉಪಕಾರಿಯಾಪುನಂಚನೆ
ಬ್ರಹ್ಮಡ ವರೊ ಕೇಂಡಳ್.
ಲೋಪಾಮುದ್ರೆನ ಮಹಿಮೆಯನ್ ತೆರಿನಂಚಿನ ಕವೇರಮುನಿ ಆಳೆನ್ ದೇವಿಂದೇ ಗ್ರೆಯಿತ್ತೊಂದ್ ಸ್ತುತಿ ಮಳ್ಳುವೆ. ಅಂಚಾದ್ ಆಯೆ ಬುಡೆದಿನೊಟ್ಟಿಗೇ ಮೋಕ್ಷೊಗ್ಲ ಪೋಪೆ.
ಒಂಜಿ ದಿನೊ ಅಗಸ್ತ್ಯ ಮುನಿ ಬ್ರಹ್ಮಗಿರಿಕ್ ಬತ್ತೆ. ಅಳ್ಪ ಲೋಪಾಮುದ್ರೆನ್ ತೂದ್ ಆಳೆನ ಪೊರ್ಲ್ಗ್ ಮರ್ಲಾಯೆ. ತನ್ಕ್ ಆಳೆನ್ ಮದ್ಮೆ ಆಯರ ಇಷ್ಟೊ ಉಂಡುಂದ್ ಪಣ್ಪೆ. ಆಳ್ಲ ಒಪ್ಪುವಳ್, ಅಂಚ ಮದ್ಮೆಲ ನಡಪುಂಡು. ಕಂಡನಿಬುಡೆದಿ ಸುಮಾರ್
ಸಮಯೊ ಸುಖೋಟ್ಟಿತ್ತೆರ್.
ಒಂಜಿ ದಿನ ಪುಲ್ಯಕ್ಕೆಲ್ಗ್ ಅಗಸ್ತ್ಯೆ ತನ್ನ ಬುಡೆದಿನ್ ಒಂಜಿ ಮಲ್ಲ ಕಮಂಡಲ್ದುಳಾಯಿ ದೀದ್, ಅಯಿನ್ ಜಾಗ್ರತೆಡ್ ತೂವೊಣುನಂಚನೆ ಶಿಷ್ಯೆರೆಡ ಪಂಡ್ದ್ ಕನಕಾನದಿಕ್ಕ್ ಮೀಯರೆ ಪೋಯೆ, ಲೋಪಾಮುದ್ರೆಗ್ ಪಿಸ್ರ್ ತಡೆಯರಾಯಿಜ್ಜಿ. ಆಳ್ ನೀರ್ದ ಒರು ಪಡೆದ್ ಕಮಂಡಲ್ಡ್ದ್ ಪಿದಾಯಿ ಲಾಗ್ಯಳ್, ಶಿಷ್ಯೆರ್ನಾಕ್ಳ್ ಏತ್ ತಳ್ತ್ಂಡಲಾ ಆಳ್ ಕೇಂಡಿಜ್ಜಿ. ಆಕ್ಳ್ ತೂವೊಂದಿತ್ತಿಲೆಕ್ಕನೆ ಆಳ್ ಕಣ್ಣಮದೆಯಾದ್ ಪೋಯಳ್.
