ಕಬಿತೆದ ತುಳು ಅನುವಾದ ಆಂಡಲ ತುಳು ಬಾಸೆದ ಪೊರ್ಲುನು ಐಟ್ ತೂವೊಲಿ.
'ಮಂಗಳಾವತಾರ' ಒಂಜಿ ಭಕ್ತಿದ ರಚನೆಯಾದ್, ಬತ್ತಿ ಕಷ್ಟ-ಕಂಟಕೊಲು ಕಳೆದ್ ಸುಖ ಮೂಡಡ್ ಪನ್ಪಿ ಆಶಯ ಕೊರ್ಪುಂಡು. ಪುರಾಲ್ (ಪೊಳಲಿ)ದ ದೇವಿನ ಜಾತ್ರೆ ವಿಶೇಷವಾಯಿನವು. ರಕ್ಕಸೆರಾದ್ ಇತ್ತಿನ ಚಂಡಮುಂಡೆರೆ ತರೆ ಕಡ್ತ್ ದ್ ದೇವಿ ಚೆಂಡ್ ಗೊಬ್ಬಿಯೆರ್ ಪನ್ಪಿನವು ಮುಲ್ಪದಮಲ್ಲ ನಂಬಿಕೆ. ಅಂಚಾದ್ ದೇವಿನ ಜಾತ್ರೆನ್ ಪುರಾಲ್ದ ಚೆಂಡ್ಂದೇ ಪನ್ಪೆರ್. ಇಂಚ ವಿಶೇಷವಾಯಿನ ಪುರಾಲ್ದ ಜಾತ್ರೆದ ಬಗೆಟ್ ಬರೆಯಿನ ಕಬಿತೆ 'ಪುರಾಲ್ ಚೆಂಡ್'. ಪ್ರಶ್ನೆ ಬೊಕ್ಕ ಉತ್ತರದ ಮಾದರಿಡ್ ಸಾಗುನ 'ಪ್ರಶೋತ್ತರ' ಪನ್ಪಿ ಕಬಿತೆ ತುಳು ಚಳವಳಿದಾಕ್ಲೆನ್, ತುಳು ಬರವುಗಾರೆರೆನ್ ಪರಿಚಯ ಮಲ್ತ್ ಕೊರ್ಪುಂಡು. ಅಪ್ಪೆ ಬಾಲೆನ್ ಮಾನಾವುನ ರೀತಿಡ್ ಸಾಗುನ 'ಜೋ... ಜೋ...' ಪನ್ಪಿ ಕಬಿತೆ ಬಾಲೆದ ಪೊರ್ಲು ಪೊಲಿಕೆ, ಸೇಲೆ-ನೇಲೆನ್ ಪನೊಂದು ತುಳುನಾಡ್ದ - ತುಳು
ಜನೊಕ್ಲೆನ ಪೊರ್ಲು ಪೊಲಿಕೆನ್ಲಾ ಒಟ್ಟೊಟ್ಟುಗು ಪಂಡೊನುನವು ವಿಶೇಷ.
'ಕುಡರಿ ರಾಮೆ' ಪನ್ಪಿ ಕಬಿತೆ-ಪರಶುರಾಮೆ ಕುಡರಿ ದಕ್ಕದ್ ಕಡಲ್ ಜಾರ್ದ್ ತುಳುನಾಡ್ ಉಂಡಾಂಡ್ ಪನ್ಪಿ ನಿಲೆಟ್ ಪರಶುರಾಮನ್ ಸ್ತುತಿ ಮಲ್ಪುನ ರಚನೆಯಾದ್ ಮೂಡ್ಡು ಬತ್ತ್ ದ್ಂಡ್. ಆಂಡ ತಮಿಳ್ ದ ಸಂಗಮ್ ಸಾಹಿತ್ಯೊದ ಆಧಾರೊಡು ಮಯಿಲೈ ಶೀನಿ ವೆಂಕಟಸಾಮಿ ಪನ್ಪುನಾರ್ 'ತುಳುನಾಡು ವರಲಾರು' ಪನ್ಪಿ ತನ್ನ ಬೂಕುಡು ಪರಶುರಾಮ ಸೃಷ್ಟಿದ ಕತೆ ಏತೋ ಕಾಲೊಡ್ದು ಬೊಕ್ಕ ಸೃಷ್ಟಿಯಾಯಿನ ಕಟ್ಟುಕತೆಂದ್ ಪನ್ತೆರ್. ತುಳುವೆರ್ ಈ ಬಗೆಟ್ ವೈಚಾರಿಕ ದಿಟ್ಟಿನ್ ದೀವೊನುನ ಎಡ್ಡೆ.
'ವಂದನೆ' ಪನ್ಪಿ ಕಬಿತೆ ತುಳು ಮಣ್ಣ್ ದ ಸಾಹಿತ್ಯಿಕ-ಸಾಂಸ್ಕೃತಿಕ ಸಂದರ್ಭೋಡ್ದು ಸುರು ಮಲ್ತ್ ದ್ ಭಾರತೊದ ಸಾಹಿತ್ಯಿಕ-ಸಾಂಸ್ಕೃತಿಕ ಸಂದರ್ಭೊ ಮುಟ್ಟ ಮೂಲು ಕವಿ ತನ್ನ ವಂದನೆ ಸಲ್ಲಿಸಾವುನ ಧನ್ಯತಾ ಭಾವ ಮೂಡ್ಡು ಬತ್ತ್ಂಡ್. “ಪನ್ಲೆ ಒಂಜೇ ಸೊರೊಟು” ಪನ್ಪಿ ಕಬಿತೆಡ್ ತುಳುನಾಡ್ದ ಸಾಂಸ್ಕೃತಿಕ ವೈಭವೊ ಪಂಡೊಂದು, ಇನಿ ಎನ್ನ ತುಳುನಾಡ್ ಬುಲಿಪುಂಡು, ಉಂದೆಕ್ಕ್ ಏರೆನ್ಲಾ ದೂರುದು ಪ್ರೇಜನ ಇಜ್ಜಿ. ನಮ ಮೆಗ್ಗಿ-ಪಲಯೆ, ಪಲ್ದಿ-ತಂಗಡಿ ಜತೆಟ್ ಸೇರೊಡು, ತುಳುತ್ತ ಕೊಡಿನ್ ದೇರ್ಪೊಡು ಪನ್ಪಿ ನಾಡ್ದ ಅಭಿಮಾನ ಉರ್ಕುದು ಎರ್ಕ್ದ್ಂಡ್.
“ಸಾರೊ ಎಸಳ್ ದ ತಾಮರೆ” ಬಾರೀ ಪೊರ್ಲುದ ಕಬಿತೆ. ಓದುನಗನೇ ಮೈ-ಮನಸ್ಸ್ ಮರ್ಲುಂಡು, ತುಳು ಬಾಸೆದ ಬಗೆಟ್ ಅರ್ಲುಂಡು, ಕಬಿತೆದ ಲಯೊಕ್ಕು ಮನಸ್ಸ್ ನಲಿಪುಂಡು- ಏತ್ ಪೊರ್ಲುದ ಬಾಸೆ ನಮ ತುಳು
ಸಾರೊ ಎಸಳ್ ದ ತಾಮರೆ
ಪಂಡಿ ಬಾಯಿಡ್ ಕೇಂಡಿ ಕೆಬಿಟ್
ಉರ್ಕುಂಡಮೃತೊದ ನುರೆ ನುರೆ
“ಬತ್ತನೋ ಈ ಬರ್ಪನೋ” ಕಬಿತೆ ಧ್ವನಿಪೂರ್ಣವಾದ್ ಮೂಡು ಬತ್ತ್ ದ್, ಬೇತೆ ಬೇತೆ ಅರ್ಥದ ಮರ್ಗಿಲ್ ಲೆನ್ ತೋಜಾದ್ ಕೊರ್ಪುಂಡು. ಕಾಸರಗೋಡು,
X
