ಕೊರಗ ಸುಡುವ ಬಿಸಿಲಿನ ಬೇಗೆಯುರಿ ಬಡಿದು, ತೊಗಲೆಲ್ಲ ಸುಟ್ಟು ಸೀಕರಿಹೋದರೂ ಬಣ್ಣಕೆಡದಂಥ ಕರಿಮೆಯ್ಯ ಹಿರಿಜೀವ! ಭೋರೆಂಬ ಜಡಿಮಳೆಗೆ ಅಡಿಯಿಂದ ಮುಡಿವರೆಗು ನೀರು ಧಾರಾಕಾರ ಸುರಿಯುತ್ತಿದ್ದರು ಶೀತನಿರ್ಲಿಪ್ತ ಸಮಭಾವ! ಮೈಮಾನ ಮುಚ್ಚಲಿಕೆ, ನಡನಡುಗಿಸುವ ಚಳಿಗೆ, ಹರುಕುಚಿಂದಿಯ ಹೊದಿಕೆ - ಏನಿಲ್ಲವೀತನಿಗೆ ! ಪ್ರಕೃತಿಯ ಪ್ರಕೋಪಕ್ಕೆ ತಾಪಕ್ಕೆ ಶಾಪಕ್ಕೆ ಎಲ್ಲದಕು ಮೂಕಬಲಿಯಾಗಿಯೇ ಬಾಳವನು! ಕಾಟಿಕಾಡಾನೆಗಳ ತೊತ್ತಳದ ತುಳಿತಕ್ಕೆ ಹಗಲಿರುಳು ತಲೆಯೊಡ್ಡಿ ಬೆಟ್ಟದಡಿಯಲ್ಲಿ ಚಾಚಿ ಬಿದ್ದಿರುವ ಹೆಬ್ಬಂಡೆಯಂತಿಹನು! ಬುರುಡೆಗವಿ ಒಳಮುದುಡಿ ಮಿದುಳೊ ಮಹಾಮೌನಿ! ಇರಲೊಂದು ಮನೆಯಿಲ್ಲ, ಮಠವಿಲ್ಲ, ಗುರಿ ತೋರ್ಪ ಗುರುವಿಲ್ಲ. ಸುಖದುಃಖದರಿವಿಲ್ಲ, ನಿಲೆಬಲೆಗಳಿಲ್ಲ; ಇಲ್ಲವೆಂಬುದೆ ಇವನ ಬದುಕು ಭಾಗ್ಯಗಳೆಲ್ಲ! ಏನಾದರೂ ತನಗೆ, ನೋವಾದರೂ ತನುಗೆ ಎಂತಾದರೂ ಮನಕೆ - ಯಾವುದಕು ಇವ ಕೊರಗ! - ನಾಡನಾಳುವ ಮಂದಿ - ಉತ್ತಮೋತ್ತಮ ಜನರು ವೇದಶುದ್ಧ ಸಮಾಜ, ಮುಖಕೆ ಉಗುಳುವ ತೆರದಿ ಇವನ ಪೀಳಿಗೆಗೆಸೆದ ಹೆಸರು ಕಾಡಿನ ಕೊರಗ ಮಾನಪಮಾನವೋ ಲಾಭವೋ, ನಷ್ಟವೋ ಸೋಲೋ ಗೆಲುವೋ ಸುಖವೋ ದುಃಖವೋ ಬಂದಿರಲಿ, ಮೇಣಾವುದೂ ಬರದಿರಲಿ, ಎಂತಾದರೂ ಕೊರಗ! ಕಯ್ಯಾರೆರ ಕಬಿತೆಲು / 57
