ಬತ್ತನೋ ಈ ಬರ್ಪನೋ?
ಏತ್ಕಾಲೊಡ್ದಿಂಚಿ ಕಾಪುವೆ
ಬತ್ತನೋ ಈ ಬರ್ಪನೋ?
ಜಾಲ್ಜತ್ತ್ ದ್ ಪಗೆಲ್ ತೂಪೆ,
ರಾತ್ರೆ ಬಾಕಿಲ್ದೆತ್ತ್ ದೀಪೆ ,
ಕತ್ತಲೆಡ್ಲಾ ಕಣ್ಣ್ ಬುಡುಪೆ
ಬತ್ತನೋ ಈ ಬರ್ಪನೋ?
ಕಣ್ಣ್ ಕೂರುಜಿ ಇರ್ಲ್ ಪಗೆಲ್
ರೂಪೊಪೋರ್ಲುನು ತೂವೊಡೇ;
ಕೆಬಿನ್ ಕೊರ್ದೇ ಉಪ್ಪೆ , ಪಜ್ಜೆದ
ದನಿಲ ಕೇನುಜಿ - ಕಾಪೊಡೇ.
ಕನಟ್ ಆಂಡಲ ನೆನಪೆ ನಿನ್ನವು
ಮನಸ್ಡುರಿವುರಿಯೇರುಂಡು;
ಬೊಲ್ಪುಗಾದೇ ದೊಂಬುಡುಂತ್ಯೆ
ಪಿದಯುಳಯಿ ಮೈಬೈಪುಂಡು.
ಪೋಂಡು ಪುಣ್ಣಿಮೆ, ಮುಗಿಂಡ್ ಮಾರ್ನಮಿ
ಕರಿಂಡ್ ಪರ್ಬೊಲ ಕಾತ್ದ್,
ಕಣ್ಣನೀರ್ಡೆ ಮೀದ್ ಉಂತ್ದೆ
ನಿನ್ನ ಪೊರ್ಲುಗು ಸೋತ್ದ್.
ಮೆಂಚಿದೊಂಜೇ ಗೆರೆಲ ಬೂರುಜಿ
ಮುಗಲ್ ಬಾನೊಡು ತೋಜುಜಿ
ಕಾರ್ತೆಲಾಂಡಲ ಬರ್ಸೊ ಬರ್ಪುಜಿ
ತಣ್ಪು ಜೀವೊಗು ಕೊನ್ಪುಜಿ
ಏಪೊ ಬರ್ಪನೋ? ಬತ್ತೊಂದುಲ್ಲನೋ?
ಬರ್ಪಿತಾದಿಲ ದೂರೊನೊ?
ಎನ್ನ ಒಡಲ್ದ
ಉರಿನ್ ಪಿಂದನೊ?
ಬತ್ತನೋ ಈ ಬರ್ಪನೋ?
ಏತ್ ಕಾಲೊಡ್ದಿಂಚಿ ಕಾಪುವೆ
ಬತ್ತನೋ ಈ ಬರ್ಪನೋ?
(1989)
ಕಯ್ಯಾರೆರ್ನ ಕಬಿತೆಲು / 37
