ಈ ಪುಟೊನು ಪ್ರಕಟಿಸದ್ ಆಂಡ್
ಕುಡರಿದ ರಾಮ
ಬಲ ಬಲ ಬಲ ಬಲ ಓ ರಾಮ,
ಬಲ ಈ ಕುಡರಿಡೆ ಕುಡರಾಮ.
1
ಕಡಲ್ಡ್ ದೆಂಗಿನವೀ ತುಳುನಾಡ್,
ಮೃಡಸಖ ಈ ಕೊರಿ ಭಾಗ್ಯೊದ ಬೂಡು,
ಪಡೆವೊಡು ನಾಡ್ನ್ ನಿನ ದಯೆ ಬೋಡು,
ಜಡಜಾಂಬಕ ನಿನ ನಿಜಕಲೆ ಕೊರೊಡು
2
ಅನ್ನೇಯೊ ಮಲ್ತಿನ ಜನತೆದ ಮೂಲೊ
ನಿನ್ನಾ ಕುಡರಿಡೆ ಬಿದೆ ನಿರ್ಮೂಲೊ,
ಮಣ್ಣ್ ಗ್ ನಿನನೇ ನನ ಒರೊ ಜಾಲ
ಪುಣ್ಯದ ಮಂಗಲ ಮೈಮೆದ ಕಾಲ
3
ಬಿರ್ಕ್ದ ಕೈಕಡ್ತ್ ದಾಕಾರ್ತಿವೀರ್ಯ
ಸೊರ್ಕುನೆ ಕಲೆದೊಂಜಿ ನಿಲೆ ಕೊರಿನಾರ್ಯ ,
ಮುರ್ಕುದಿ ಮಾಮಾರಿಲೆನ್ ಗಿಡೆಗಿಡೆಪು
ಸಿರ್ಕ್ದಿ ತುಳುಬಾಲೆಲೆಗ್ ಕಲೆಕೋಪು.
4
ಕ್ರಾಂತಿದ ಸತ್ವೊದ ಕುಡರಿದ ರಾಮ
ಭ್ರಾಂತೆರೆ ಧೂರ್ತೆರೆ ನಾಶಕಭೀಮ
ಕಾಂತಿದ ನಿನಕಲೆ ಕೊರ್ಗುಣಧಾಮ
ಶಾಂತಿ ಸುಶಕ್ತಿದ ಸತ್ವ ನಿಸ್ಸಿಮ
5
ಕೋಪೊದ ಜಮದಗ್ನಿನಾಜ್ಜಲದಗ್ನಿ -
ರೂಪೊದ ಕ್ಷತ್ರಿಯವನದಾವಾಗ್ನಿ
ಕಾಪೊಡು ಏಪೊಲ ರೇಣುಕೆಮಾಣಿ
ಶ್ರೀಪದೊ ನಂಬುದೊ ತುಳು ಜನಮಾನಿ
(1939)
ಕಯ್ಯಾರೆರ್ನ ಕಬಿತೆಲು / 31
