ಎಸ್.ಯು. ಪಣಿಯಾಡಿ
೧
"ತುಳು ಚಳವಳ ಪಂಡ ಕರ್ನಾಟಕೊಗು ಎದ್ರ್ದ ಚಳವಳ ಪಣ್ದ್ ಒಂತೆಜನ, ಕೊಂಕಣಿದಗಲೆನ ಎದ್ರ್ದ ಚಳವಳ ಪಣ್ದ್ ಒಂತೆ ಜನ ತೆರಿಯೊಂದೆರ್. ಆಂಡ, ಸತ್ಯ ಸಂಗತಿ ಮಾತ್ರ ಅಂಚ ಇಜ್ಜಿ. ಉಂದು - ತುಳುನಾಡ್ದ ಆತ್ಮೋದ್ಧಾರೊಗು ಮಾತ್ರ ಇಪ್ಪುನ ಚಳವಳ” - ಉಂದು ಪಣಿಯಾಡಿದಾರ್ 1931ನೇ ಇಸ್ವಿಡ್ ಕುಡ್ಲದ 'ಕಂಠೀರವ' ಪತ್ರಿಕೆಗ್ "ತುಳುತನಯ" ಇನ್ಪಿ ಕಾವ್ಯನಾಮೊಡ್ ಬರೆದಿನ ಒಂಜಿ ಕಾಕಜಿದ ರಡ್ಡ್ ಸಾಲ್.
ಪಣಿಯಾಡಿದಾರ್ ಸ್ವಾತಂತ್ರ್ಯ ಚಳವಳತ್ತ ಒಟ್ಟುಗೇ ತುಳು ಚಳವಳ ಸುರುಮಲ್ತಿನಾರ್. ತುಳು ಸಾಹಿತ್ಯ ಮಾಲೆ, ತುಳುನಾಡ್ ಪ್ರೆಸ್, ತುಳು ಕಾದಂಬರಿ, ವ್ಯಾಕರಣ ಬರೆದಿನಿ - ಇಂಚ ಆರ್ ತುಳುಕು ಬೋಡಾದ್ ಮಲ್ತಿನ ಬೇಲೆ ಒಂಜಿ ರಡ್ಡತ್ತ್. ಸ್ವದೇಶಿ ಚಳವಳತ್ತ ಪುದರ್ಡ್ ಆರ್ ಸುರುಮಲ್ತಿನ ಬ್ಯಾಂಕ್ - ತುಳುನಾಡ್ ಬ್ಯಾಂಕ್. ಆರ್ ಪ್ರಕಟ ಮಲ್ತೊಂದಿತ್ತಿನ ಅಂತರಂಗ ಕನ್ನಡ ಪತ್ರಿಕೋದ್ಯಮೊಡು ಮಸ್ತ್ ಪುದರ್ ಮಲ್ತಿನ ಒಂಜಿ ಎಡ್ಡೆ ಪತ್ರಿಕೆ ಆದಿತ್ತ್ಂಡ್. ಪಣಿಯಾಡಿದಾರೆನ ಬದ್ಕ್ ದ ಕತೆ ಸ್ವಾತಂತ್ರ್ಯಬೊಕ್ಕ ತುಳು ಚಳವಳೋಕು ಬೋಡಾದ್ ತನ್ನ ಇಲ್ಲ್ ಬದ್ಕ್ ಪೂರಾ ಕಲೆವೊಂದಿನ ಒರಿ ಎಡ್ಡೆ ಜನತ್ತ ಸೋಲ್-ಗೇಲ್ ಕತೆ, ಮಲ್ಲಾದಿಗೆದ ಕತೆ. "ಗೇಲಿತ್ತಿನವುಲು ಪೋಡಿಗೆ ಇಜ್ಜಿಂದ್ ಗಾದೆ, ಸೋಲ್ ಇತ್ತ್ಂಡಲಾ ಪೋಡಿಗೆ ಇಜ್ಜಿ ಪಣ್ಪಿನ ಜನ ಪಣಿಯಾಡಿದಾರ್.
ಅನಂತೇಶ್ವರ ದೇವಸ್ಥಾನ ಉಡ್ಪಿದ ಒಂಜಿ ಪ್ರಾಕ್ದ ದೇವಸ್ಥಾನ, ಎಸ್.ಯು. ಪಣಿಯಾಡಿದಾರೆನ ಕುಟುಂಬದಗಲು ಈ ದೇವಸ್ಥಾನದ ಪೂಜೆ ಮಲ್ಗೊಂದಿತ್ತೆರ್. ತುಳು ಪಾತೆರ್ಪಿನ ಈ ಶಿವಳ್ಳಿ ಬ್ರಾಣರೆನ ಕುಟುಂಬೊದಗಲೆನ ಗೋತ್ರ ಆಂಗೀರಸ. ಉಡುಪಿದ ಕೈತಲ್ದ ಕೊರಂಕ್ರಪಾಡಿದ ವಿಷ್ಣುಮೂರ್ತಿ ಈ ಕುಟುಂಬದ ಕುಲದೇವೆರ್. ಉಡುಪಿ ರಥಬೀದಿಡ್ದ್ ಪಿದಾಡ್ದ್ ಸೋದೆಮಠತ ಓಣಿಡ್ ಜತ್ತ್ಂಡ ಮುಡಾಯಿಡ್ ತಿಕ್ಕುನ ಬೈಲ್ ಪಣಿಯಾಡಿ ಬೈಲ್. ಈ ಬೈಲ್ಡ್ ಒಂಜಿ ಕಿ.ಮೀ. ನಡತ್ಂಡ ಎಸ್.ಯು. ಪಣಿಯಾಡಿದಾರೆನ ಕುಟುಂಬದ ಇಲ್ಲ್ ತಿಕ್ಕುಂಡು.
ಎಸ್.ಯು. ಪಣಿಯಾಡಿದಾರೆನ ಅಜ್ಜೆ ಸುಬ್ರಾಯ ಉಪಾಧ್ಯೆರ್. ಅನಂತೇಶ್ವರ ದೇವಸ್ಥಾನೊದ
1
