ಬಿರಣೆ ಮಾತ್ರ ಅತ್ತ್ ಬೇತೆ ಮಾತಾ ಜಾತಿದಗುಲುಲಾ ಉಲ್ಲೆರ್. ತುಳುವೆರ್ ಪಂಡ ಒಂಜಿ ಜಾತಿದಗುಲೂಂದ್ ತೆರಿಯೊಂದಿನಗುಲುಲ್ಲೆರ್ ; ಅವು ಬಜೀ ಸುಳ್ಳು, ತುಳು ಪಾತೆರ್ಪಿನಗುಲು ಒಂಜೇ ಜಾತಿದಗುಲತ್ತ್, ಮಸ್ತ್ ಜಾತಿದಗುಲು ಉಲ್ಲೆರ್. ಬ್ರಾಹ್ಮಣ, ಬಂಟ, ವಿಶ್ವಕರ್ಮ, ಮೊಗವೀರ, ಬಿಲ್ಲವ, ಪರಿಶಿಷ್ಟ ಇಂಚಿನ ಮುಖ್ಯ ಜಾತಿದಗುಲು, ಬೇತೆ ಮಸ್ತ್ ಜಾತಿದಗುಲು ಉಲ್ಲೆರ್. ತುಳುವೆರ್ ಪಂಡ ಒಂಜೇ ಧರ್ಮದಗುಲೂಂದ್ ಪಣರೆಗ್ ಆಪುಜ್ಜಿ. ತುಳುವೆರೆನ ಪೈಕಿ, ಶೈವ, ವೈಷ್ಣವ, ಮಾಧ್ವ, ಭಾಗವತ, ಶಾಕ್ತ, ಜೈನ, ಬೌದ್ಧ, ಕ್ರೈಸ್ತ, ಮಹಮ್ಮದೀಯ ಇಂಚಿನ ಧರ್ಮದಗುಲು ನಂಬುಗೆದಗುಲು ಉಲ್ಲೆರ್. ತುಳು ಪಾತೆರ್ಪಿನಗಲೆನ ಬೇತೆ ಒಂಜಿ ದೇಶ ಇತ್ತ್ದ್ ಅಲ್ ಈ ಜನೊಕುಲು ಇಡೆಗ್ ಬತ್ತ್ದ್ ಮೂಲು ಬದ್ಕೊಂದು ಉಪ್ಪುನಿಲಾ ಅತ್ತ್. ನಾಡ್ಗ್ ಪ್ರಾಕ್ದ ಕಾಲೊಡ್ಡುಲಾ ತುಳು ಪನ್ಪಿನ ಪುದರ್ ಇತ್ತ್ಂಡ್. ಆಯಿನೆಡ್ಡಾವರ ತುಳುನಾಡ್ ಇತ್ತ್ದ್, ತುಳು ಬಾಸೆ ಪಾತೆರ್ಪಿನಗಲೆಗ್ ತೌಳವ ಅತ್ತಡ ತುಳುವ ಇನ್ಪಿನ ಪುದರ್ ಬೈದ್ಂಡ್. ಪ್ರಾಕ್ದ ಕಾಲೊಡ್ ಮುಲ್ತುಡ್ದು ಪೋದು ತಮಿಳುನಾಡ್ ಬಡ್ಕೊಂದಿತ್ತ್ಂಡಲಾ, ತುಳು ಬಾಸೆನ್ ಬುಡುದು ತಮಿಳ್ ಬಾಸೆನ್ ಪಾತೆರೊಂದಿತ್ತ್ಂಡಲಾ ಒಂಜಿ ಜಾತಿದಗುಲು ತುಳುವವೆಲ್ಲಾಳ ಇನ್ಪಿನ ಪುದರ್ನ್ ಮದತ್ತ್ದಿಜ್ಜೆರ್.
ತುಳುನು ಇಲ್ಲಡ್ ಪಾತೆರ್ಪಿನಗುಲೆನ ಸಂಖ್ಯೆ 1921ನೆ ಇಸ್ವಿದ ಖಾನೇಷ್ಮಾರಿಡ್ 5,79,342 ಇತ್ತ್ಂಡ್. ಅಯ್ಟ್ 41,517 ಮಾತ್ರ ನಮ್ ಜಿಲ್ಲೆನ್ ಬುಡ್ಡು ಬೇತೆ ಕಡೆಟ್ಟಿಪ್ಪುನಗುಲು. ಮೊಗುಲು ಹೆಚ್ಚಾದ್ ಹಾಸನ, ಕಡೂರು, ಶಿವಮೊಗ್ಗ, ಮಲಬಾರ್, ಕೊಚ್ಚಿ, ತಿರುವಾಂಕೂರು, ಬೊಂಬಾಯಿ ಮದ್ರಾಸ್ಡುಲ್ಲೆರ್. ತುಳುವೆರೆನ ಸಂಖ್ಯೆ ಕಮ್ಮಿ ಆವೊಂದು ಬರ್ಪಿನ ಕೆಲವು ಕಾರಣೋಲುಂಡು. ೧. ಬೇತೆ ಊರುಗು ಪೋದು ಇಪ್ಪುನಗುಲು ಹೆಚ್ಚಾದ್ ತಂಕುಲ್ನ ಅಪ್ಪೆ ಬಾಸೆ ಕನ್ನಡಂದ್ ಪಣ್ಪೆರ್. ೨. ತುಳುವೆಂದ್ ಪಣೆರೆ ನಾಚಿಕೆ ಆದ್ ಕೆಲವರ್ ಇಲ್ಲಡ್ಲಾ ಕನ್ನಡ ಬಾಸೆನೇ ಪಾತೆರ್ದ್ ಕನ್ನಡದಗುಲಾಪೆರ್. ೩. ಬಾಸೆಲ್ ಮಿಶನ್ ಕರ್ನಾಟಕ ಮಿಶನ್ಂದ್ ಬದಲಾಯಿಬೊಕ್ಕ ಮಿಶನ್ದಗುಲೆನ ಪೈಕಿ ಮಸ್ತ್ ಜನ ತುಳುಬಾಸೆನ್ ಬುಡ್ದು ಕನ್ನಡ ಬಾಸೆನ್ ಪಾತೆರೊಂದುಲ್ಲೆರ್. ೪. ಕೆಥೋಲಿಕ್ ಕ್ರಿಶ್ಚಿಯನ್ ಧರ್ಮೊಗು ಸೇರಿನಗುಲು ತುಳುಬಾಸೆನ್ ಪೂರ್ತಿ ಬುಡ್ದು ಕೊಂಕಣಿ ಭಾಷನೇ ಪಾತೆರ್ವೆರ್, ೫. ಇಸ್ಲಾಂಗ್ ಸೇರಿನಗುಲು ಹೆಚ್ಚಾದ್ ಹಿಂದುಸ್ಥಾನಿ ಬಾಸನಿ, ಮಲೆಯಾಳಿ ಬಾಸನಿ ಪಾತೆರ್ವೆರ್. ಇಂಚಿನ ಇಚಿತ್ರ ಸ್ಥಿತಿಡ್ಡಾವರ ತುಳುಬಾಸೆ ಪಾತೆರ್ಪಿನಗಳನ ಸಂಖ್ಯೆ ಹೆಚ್ಚಾವಂದೆ ಇಪ್ಪುನ ಆಶ್ಚರ್ಯ ಅತ್ತ್. ಆಂಡ, ತುಳುನಾಡ್ಡ್ ಇತ್ತೊಂದು ಬೇತೆ ಬಾಸೆನ್ ಪಾತೆರ್ಪಿನಗಲೆಗ್ಲಾ ಹೆಚ್ಚಾದ್ ತುಳುಬಾಸೆ ತರಿದೇ ಇಪ್ಪುಂಡು.
8
