ಸೊನ್ನೆ ದುಃಖಿ ದುಃಖಿದ್ ಬುಲ್ತಲ್.
"ಅಯ್ಯೋ! ಈರ್ ಪಂಡಿನ ಪಾತೆರನೇ ನಡತ್ತ್ ಪೋಂಡು ಸ್ವಾಮಿ! ಎಂಕ್ ಕಷ್ಟ ಕೊರಡೆ. ಕೋಟಲೆ ಕೊರಡೆ. ಈರ್ ಪಂಡಿನ ಗೌಡಿ ಚಾಕರಿ ಮಲ್ತೊಂದು ಈರೆ ಕಾರ ಮುದೆಲ್ದ್ ಬದ್ಕೊಂದುಪ್ಪುವೆ..."
ಸೊನ್ನೆ ಕಣ್ಣೊರಸೊಂದು ಕಿದೆಕ್ ಪೋಯಲ್. ಕಂಜಿ ಕೈಕಂಜಿಗ್ ಬಾಜೆಲ್ ದೀಯಲ್. ಕೊಟ್ಯಗ್ ಪೋಯಲ್ ಪುಂಡಿ ನಿಲ್ಕೆ ಬೈ ಕನತ್ತದ್ ಪಾಡಿಯಲ್!
ಇಂಚೆನೇ ದಿನ ದಿನ ಕರಿದ್ ಪೋತುಂಡು. ಸೊನ್ನೆ ಕಿದೆ ಕೊಟ್ಯಡ್ ಚಾಕರಿ ಮಲ್ತೊಂದು ದಿನ ನೂಕೊಂದು, ಬೇನೆ ಬೇಸರ್ಡ ಕಾಲ ಕರಿತೊಂದುಲ್ಲಲ್!
ಒಂಜಿ ದಿನ ಸೊನ್ನೆ, ತನ ಕಂಡನಿ ಗುರು ಮಾರ್ಲನ ಪಲಯೆ ಕೆಂಜಪರಾಡಿ ಜಾರು ಮಾರ್ಲಗ್ ಜನ ಕಡಪುಡ್ದಲ್!
ಸುದ್ದಿ ತೆರಿನ ಜಾರು ಮಾರ್ಲೆ ಪಾಡ್ದಿ ದುತ್ತೈತೊಡೇ ಎರ್ಕಿದೊಟ್ಟುಗು ಪಿದಡ್ದ್ ಬೈದೆರ್!
ಆ ಪೊರ್ತುಗು ಸೊನ್ನೆ-
ಬಾವೆ ಗುರು ಮಾರ್ಲನ್ ಲೆತ್ತಲ್. ಇಲ್ಲ್ ದುಂಬುದ ತಿರುಪತಿ ತಿಮ್ಮಪ್ಪ ಕಟ್ಟೆದ
ದುಂಬು ಬತ್ತಲ್.
ದುಂಬು ಬತ್ತಿ ಸೊನ್ನೆ ಕಂಡನೆನ ಎಡ ಭಾಗೊಡು - ಭಾವನ್ ಬಲ ಭಾಗೊಡು ಉಂತೊಂದು ಪಂಡಲ್ -
"ಭಾವಾ! ಈ ಪೊರ್ತು ಮುಟ್ಟಲಾ ಯಾನ್ ಪೊಣ್ಣು ಪೊಂಜೋವು ಆಯಿನಿಜ್ಜಿ. ಎನ್ನ ಬದ್ಕ್ದ ಬೊಲ್ಪು ತೂಯಿನಿಜ್ಜಿ. ಊರು ನಿರೆತ್ತ ಜನ ತೂಯಿನಲ್ಪ, ಕೇಂಡಿನಲ್ಪ ಕೊಂಗಿ ಕಟ್ಟುವೆರ್ ! ಕಪಿತನ ಪನ್ಪೆರ್.
ಕಾನ ಬೊಟ್ಟು ಮಾನ ಬೊಟ್ಟುದ ಜನ ಯಾನ್ ಕೂಡಿ ಕಲಟ್ಟ್ ಕೂಡಯಂದ್ ಪಂಡೆರ್!
ದುಡುಕೊಂದು ಪಾತೆರಿಯೆರ್!ಮಾನೊಗು ಕೋರೆ ಪಂಡೆರ್!
19
