ತುಳು ಕನ್ನಡ ಸಂಪರ್ಕವಿತ್ತಿನವು ಸಾಧ್ಯ. ಕೇಶಿರಾಜನ ಅಪಭ್ರಂಶ ಪ್ರಕರಣೊನು ತೂವನಗ ಪ್ರಾಕೃತ ವ್ಯಾಕರಣದ ಪ್ರತಿಬಿಂಬನೊ ಇನ್ಪಿನ್ ಲೆಕ್ಕೊ ಉಂಡು ಇನ್ತೆರ್ ಡಾ। ಎ.ಎನ್.ಉಪಾಧ್ಯೆಯೆರ್. ಮಹಾರಾಷ್ಟ್ರ, ಪ್ರಾಕೃತದ ಉತ್ತಮರೂಪ ಇಂದ್ದ್ ಮಹಾಕವಿ ದಂಡಿ ಕಾವ್ಯದರ್ಶನೊಡು ತೆರಿಪಾವೆ. ಪ್ರಾಕೃತ(ಅಪಭ್ರಂಶ) ಜನಮಾನಿನ ಪಾತೆರೊ ಆದಿತ್ತ್‌ದ್ ಗ್ರಾಂಥಿಕ ವಾಯಿನ ಕಾಲೊಡು ಸಂಸ್ಕೃತದ ಪ್ರಭಾವ ಪಡೆತ್ತ್‌ದುಂಡು.
1.73 ಪ್ರಾಕೃತದ ಧ್ವನಿಮೆಲು ಪಾಲಿದ ಲೆಕ್ಕೊ ಶ ಷ ಧ್ವನಿಮೆಲು ಸಕಾರವಾಪಾ, ಕೆಲವು ಸರ್ತಿ ಛಕಾರೊಗು ಬದಲಾಪಿನವಿಲಾ ಉಂಡು. ಉದಾ:- ಷಟ್ಪದ(ಸಂ.)= ಛಪ್ಪಯ(ಪ್ರಾ.) ಅಕಾರ ಆಕಾರ ಯಕಾರವಾಪಿನವು. ಯಶ್ರುತಿ ಇನ್ಸಿ ವೈಶಿಷ್ಟಲಾ ತೆರಿಪಾವೆರ್ ಡಾ। ಉಪಾದ್ಯೆಯೆರ್‌, ತುಳುವ- ಕನ್ನಡೊಡು ಇಂಚಿನ ಯಶ್ರುತಿವಾಪಿನ ರೂಢಿ ಉಂಡು. ತುಳುತ ಏನ್>ಯಾನ್, ಎಂಕುಳು >ಯೆಂಕುಳು, ಕನ್ನಡೊಡು ಆರ್>ಯಾರ್, ಆವನ್>ಯಾವನ್ ಇತ್ಯಾದಿ. ನನ ಒಂಜಿ ವೈಶಿಷ್ಟ್ಯ ಟ, ಠ > ಡ, ಢ ಆಪಿನವು, ತುಳು-ಕನ್ನಡೊಡು ಈ ರೂಪಾಂತರೊಲು ದಿಂಜ. ದ್ರಾವಿಡದ ಆಟ್ (to cook) >ಅಡ್, ಅಡು ಆಪುಂಡು.
ಪ್ರಾಕೃತಭಾಷೆಡ್ ಸಂಸ್ಕೃತದ ವ್ಯಂಜನಾಂತ ಶಬ್ದಲು ಸ್ವರಾಂತವಾಪಿನವು ನನ ಒಂಜಿ ರೀತಿ. ಲಿಂಗಲು ಮೂಜೆ. ಲಿಂಗ ಭೇಧ ಪುಲ್ಲಿಂಗ-ಸ್ತ್ರೀಲಿಂಗದ ಪದೊಲೆಡ್ ಸ್ತ್ರೀಲಿಂಗ ಪದಲು ದೀರ್ಘವಾಪಿನವು. ಈ ರೀತಿದ ವ್ಯಾಕರಣದ ಕೆಲವು ಅಂಶಲು ದ್ರಾವಿಡದಂಚ ಉಳ್ಳ.
ತುಳುವ ಭಾಷೆ ಸಾಮಾನ್ಯವಾದ್ ತಮಿಳ್ ಸಂಪರ್ಕದ ನಂತ್ರ ಇತ್ತೆ ಇಪ್ಪುನ ರೀತಿಗ್ ಬತ್ತಿನವು ಆಂಡಾ ಅಯೆಡ್ದ್ ದುಂಬುಡು (ಇನ್ನಗ ಕ್ರಿ.ಶ. ಒಂಜನೆ ರಡ್ಡನೆ ಶತಮಾನದ ಪಿರಾಕ್‌ಡ್) ಎವ್ವೇ ಒಂಜಿ ರೂಪೊಡು ಇತ್ತುದುಪ್ಪೊಡು. ತುಳು-ಕನ್ನಡ ಸುಮಾರಾದ್ ಕ್ರಿ.ಪೂ. ಮೂಜನೇ ಶತಮಾನೊಡ್ದ್ ಇಂಚಿ ಬೊಳ್ಪುಗ್ ಬತ್ತಿನ ಭಾಷೆಲು ಇಂದ್ದ್ ತೆರಿಪುಂಡು. ಇಂಚ ವಿಚಾರ ಮಾಳ್ಪನಗ ತುಳುವ-ಕನ್ನಡ ಭಾಷೆಲು ಪ್ರಾಕೃತದ ಸಂಬಂಧವಿತ್ತಿನಂಚ ತೋಜುವಾ.
56
