- 8 -
4. ಜು ಮಾ ದಿ L
ಮೊಗರು ನಾಡ್ ಸಾರ ಸೀಮೆಡ್ದ್ ಬತ್ತಿನಿ, ಬಂಟ್ವಾಳಡ್ ನಂದನ ಬಿಲ್ ಕಡತಿನಿ, ಅಂಬಡಾಡಿ ಐಂದಾಲ ಪಟ್ಟೊಗು ಬತ್ತಿನಿ, ಐವರೆ ಭೂತೊಗು ಸ್ಥಾನೊ ವೊರಿ ಬೆರ್ಮೆರೆಗ್ ಮಾಡೊ ಅವುಳು ದೆತ್ತೊಂಡೆ. ಐಡ್ಡ್ ಬೊಕ್ಕೊ ಪಂಚನಡ್ಕದ ಗೋಳಿನ್ ಕಡತೆ. ಬೆಞ್ಞಣದ ಪದವು ಪತ್ತಿಯೆ, ಆಮಣಜಡ್ ಆದಿ ಬೊಟ್ಟು ಬೆರ್ಮೆರೆನ್ ತೂಯೆ, ಪೊಯ್ಯೆ ಪಿಲ ಪೊಡಿಕರ ಗೋಳಿ ಕಡತೆ, ಪುರಾಲ್ತ ಪರಮೇಶ್ವರಿ ಉಳ್ಳಾಲ್ದಿನ್ ತೂಯೆ, ಪುರಾಲ್ ಮೂಜಿ ಸಾರಾಳ್ ಕೂಡಿಯೆರ್, ಪುರಾಲ್ಡ್ ಗೋಪುರೊದ ಬಾಕಿಲ್ಡ್ ದೊಂಪೊದ ಬಲಿ ಡೆತ್ತೊಂಡೆ, ಸ್ಥಾನ ಬೋಡುಂದು ಪಂಡೆ, ಉರಿ ಪಾದೆದ ಸ್ಥಾನೊ ಅಂದ್ ಮಳ್ತೊಂಡೆ. ದೂರೊಗು ಯೆಡ್ಡೆನ ತೂಪೆಂದ್ ಪಂಡೆ. ಅಡ್ಡನದ ತುದೆ ಕಡತೆ. ಇಟ್ಟೆಯಿ ಬಾಕಿಲ್ ಕಡತೆ, ಕಳಬೊಳೂರು ಕಡತೆ, ಮೂಳೂರು ಮುಂಡಿ ತಾಯನ್ ತೂಯೆ, ಸಾಲೆದ ಕರಿಯ ಕಡತೆ, ಅಣಜ ಬಣ್ಣಾಕುಳೆನ್ ತೂಯೆ, ಬಲ್ಲಂಮಲೆತ ಗುಡ್ಡೆದ ಸ್ಥಾನ ಅಂದ್ ಮಳ್ತೊಂಡೆ. ಅಮೃತೇಶ್ವರ ದೇವೆರೆನ್ ತೂಯೆ, ದೇವರೆ ಶಿರಿಯಂಬಲೊಡು ಅಙಣೊಡು ಮೆಚ್ಚಬಲಿ ಬೋಡುಂದು ದೆತ್ತೊಂಡೆ. ಪಡು ಅಡಿತ ಸ್ಥಾನ ಬೋಡುಂದು ದೆತ್ತೊಂಡೆ, ಪಾಳತಿ ಕಟ್ಟೆಡ್ ದೊಂಪೊದ ಬಲಿ ದೆತ್ತೊಂಡೆ. ದೋಣಿಂಜ ಕಲ್ಲಮುಗೆರ್ ಕಡತೆ, ಐಂದಾಳೆ ಪಟ್ಟೊಗು ಬತ್ತ್ದ್ ಸಂಪೆಂಜದ ಬೂಡುಗು ಬತ್ತೆ, ಕರ್ತ್ತು ಸಾರಕುಳ್ಳಾಯನ್ ತೂಯೆ, ಸಮುಜಡ್ ಅರ್ಪಡ ಪರಿ ಕುತ್ತು ಕೊಣು ಪಾಡ್ಯೆ. ಇಂದು ದಾನೆ ಚೊದಿತ ಕಲಿಜಿಗ ಬತ್ತ್ಂಡ್ ಅಂದ್ದ್ ಪಂಚಾಂಗೊಡು ಕೇಂಡೆರ್, ಈ ರಾಜ್ಯೊಡು ದೇವೆರೆಗ್ ವತ್ತಿ ದೈವ ಬತ್ತೆ. ಬತ್ತಿ ದೈವೊಗು ದಾನೆಂದ್ ಕೇಂಡೆರ್. ತಂಪಿಂಜದ ಬೂಡುಡು ಮುತ್ತಿ ತೂಕುಚ್ಜಾಲ್ ಕಟ್ಟಾವೊಂಡೆ, ಐಂದಾಳ್ ಬಲ್ಲಾಳ್ ಪತ್ತಾಯಿಂಚಿತ್ತಿ ಪಾಣೆ ಮುಡಾರ ಸ್ಥಾನೊ ಯೇರಿ ಕೊಡಿ ವೈಪಿ ಬಂಡಿ ಬೋಡುಂದು ಪಂಡೆ. ದೇವೆರ್ಂದ್ ಪಣ್ಪಿನಿ ಆದಿನಾಥ ದೇವೆರ್, ಆದಿನಾಥ ಜುಮಾದಿಂದ್ ಪನ್ಪಾಯೆ.
5. ಸಾ ರಾ ಳ ಜು ಮಾ ದಿ II.
ಸಾರದ ಬೆಳಿ ಊರು, ಬೆಳಿ ಊರುದು ದೊಂಪೊ ಉಂಡು, ಅಳ್ಪ ಕಂಚಿದ ಕಲಸೊದ ನೀರ್ನ್ ಕಾರ್ಗ್ ಆರ್ತೆ, ಬೊಳ್ಳಿದ ಕೂಜಿಡ್ ಮುಗ ದೇವೆರೆನ್ ಕರಿತೆ. ಇಡೆ ತಡ್ಯಡ್ ದೀತಿ ಕಾಯಿನ್ ಬಾಯಿದ ಜಗ ಬೆಂದೊಂಡೆ (ತಿಂದೆ), ಸಾರ ದೊಂಪೊದ ಬಾಕಿಲ್ಡ್ ದೊಂಪೊಗ ಬಲಿ ದೆತ್ತೊಂಡೆ, ಸಾರ ಬೊಳಿ ಊರು ತಪ್ಪುನಾಗ ಬೆಳಿವೂರ್ ಡೆಮ್ಮೆಂದೇವೆರೆ ಸೂಕೆ ತೂದು ತಳ ಕಡತೆ. ಕರಿಯ ದೇವೆರೆ ತಳ ಕಡತ್ದ್, ಕಂದೆಲ್ಗುಂಡದ ಲೆತ್ತೇಸ್ಪರಿನ್ (ರಕ್ತೇಶ್ವರಿ) ತೂಯೆ, ಬಿರಮಣೆ ಕಟ್ಟಾಯಿ ದೇವಸ್ಥಾನ ಕಡತೆ, ಅಡ್ಡದ ಪದಾವು ಪತ್ಯೆ, ಮುಗೆರ್ನಾಡ್ ಸೀಮೆಡ್ ಆಯೆ, ಆಜ್ವೆರ್ ದೈವೊಂಗುಳು, ಇರುವೆರ್ ದೇವರ್ಕುಳನ್ ತೂಯೆ, ಬಾರ್ದಲದ ಬೂಡು ಕಡತೆ, ಮಂಟಮೆದ ಗೋಳಿ ಕಡತೆ, ಅಡ್ಡದ ಪಾದೆ ಕಡತೆ, ಇರಂದ ಬೊಟ್ಟಿ ಚಾವಡ್ಡ್ ಆಯೆ. ಅಲಂಗಾರದ ಮಾಡೊ ಅಂದ್ ಮಳ್ತೊಂಡೆ ಮಾಡೊಕ್ತಿ ಬರ್ಕೆ ತಿರ್ತ ಇಲ್ಲ್ ಭಾವೊ (ಸ್ಥಳ) ಕಡತೆ, ಪಾಣೆಮುಗೆರ್ ಪೊಯ್ಯೆಡ್ ಆಯೆ. ಪಡ್ಡಾಯಿ ಪನಂಬೂರು ದೇವೆರೆನ್ ತೂಯೆ, ಮೂಡಾಯಿ ನಂದಾರ ದೇವೆರೆನ್ ತೂಯೆ, ಉರಿ ಮಳೆಲ್ ಮೂವೆರ್ ಬೆರ್ಮೆರೆನ್ ತೂಯೆ. ಬೊಕ್ಕೊ ಪಾಣೆಮುಗೇರ್ ಪೊಯ್ಯೆ ಕಡತೆ, ಸೆಟ್ಟ ಕಟ್ಟಾಯಿ ಬಸ್ತಿ ಕಡತೆ, ಬ್ರಾಹ್ಮಣೆ ಕಟ್ಟಾಯಿ ದೇವಸ್ಥಾನೊ ಕಡತೆ, ಕಂಚಿಗಾರ ಕೇರಿ ಕಡತೆ, ಚಮುಕಾರ ಬೀದಿ ಕಡತೆ, ನಂದನದ ಬಿತ್ತ್ಲ್ಗ್ ಬತ್ತೆ, ಕುಜುಂಬೆ, ಕುಜುಂಬ ದೇರೆ, ತಂಕರ ಬೈದ್ಯೆ, ಮೋಕುಳೆ ಇಲ್ಲಗ್ ಜುಮಾದಿ ಪಾರೊ (ಸಂಕಡೊ) ಪಾಡ್ಯೆ, ಬಲಿಮೆಡ್ ಕೇಂಡೆರ್, ಜುಮಾದಿ ಉಪದ್ರೊಂದು ತೋಜಿಂಡ್. ಈ ಊರುಡು ನೇಮ ಮಳ್ತ್ಂಡ ಉಪಾದಿ ಉಂತುಂಡುಂದುದು ತೋಜಿದ್ ಬತ್ತ್ಂಡ್. ಪೇಟೆ ಮೂಜಿ ವರ್ಗದಾಕುಳು ಕೂಡ್ಯೆರ್,
