ತಮೆರಿ ಮೀರಿ ಪೊಣ್ಣುಂದು ಪಂಡ್ದ್ ಪುಣೆದಾಂತಿ ಕಂಡದ ಲೆಕ್ಕಾಂದ್ ಪಂಡೆರ್. ತೊಟ್ಟರೆ ಆವಂದೆ ಪೋನಗ ಮುಟ್ಟರೆನೇ ಆವಂದಿನ ಮುಂಡೆ ಆದ್ ಪೋಯೆಲಾಲ್. ಉಂದು ನಮ್ಮ ಪಿರಾಕ್ದ ತೆರಿದಿನ ಜನಮಾನಿಲು ನಮ್ಮ ಅಪ್ಪೆ ಪೊಣ್ಣಗ್ ಕೊರ್ತಿನ ಮರ್ಯಾದಿ ಅತ್ತೇ? ಅಲೆಗ್ ಬೇನೆ ಬೆಸರ್ ಇಜ್ಜಿ. ಅಂಕ ಆಯನದ ಅಂಗಲಪ್ಪು ಇಜ್ಜಿ. ಕಡೆ ಕಣ್ಣಿಡ್ ಕೊಡಿ ದುಃಖ ದೆತ್ತೊಂದು ದಿಕ್ಕೆದ ಕೋಡಿಡ್ ಕುಲುದು ದುಃಖ್ಯುನನೇ ಅಲೆನ ದಿಂಜೆಲ್ ಬದ್ಕ್ಂದ್ ಎನ್ನಿಯೆರ್ ಅತ್ತಂದೆ ಪೊಣ್ಣು ಪಂಡ ದಾದಂಡ್ ತೆರಿಯಂದನೇ ಪೋಯೆರ್. ಇಂಚಿತ್ತಿನ ಅನ್ಯಾಯ ಪೊಣ್ಣಗ್ ದಾಯೆ ಆಂಡ್? ಅಲೆಗ್ಲಾ ಬೊಡಿ ಬೆಕ್ಕಾಸ್ ಉಂಡು. ಯಾನ್ಲಾ ಒಂಜಿ ನರಮಾನ್ಯಲೆಕ ಬದ್ಕೊಡು ಪನ್ಪಿನ ಮನಸ್ ದ ಅಂಗಮೆ ಉಂಡು, ಪನನ್ ದಾಯೆ ತೆರಿಯೊನುಜೆರ್? ಪಂಡ ಉಡಲ್ದ ಕಿಚ್ಚಿ ಮಚ್ಚರದ ಉಚ್ಚು ಜಿಡೆದೆತ್ತ್ ದ್ ಸುಯಿಂತೊಂದು ಇತ್ತಿನ, ಅಲೆನ ಬೆರಿಮುಲ್ಲುನು ಮಣ್ಣ್ ಗ್ ಊಂದರೆನೇ ಕಾತೊಂದಿತ್ತಿನ ಮೀಸೆ ತುಂಬೊಂದಿನ ಬಾಸೆ ತೆರಿದಿನ ಜನೊಕುಲು ಆಲ್ ಪೊಣ್ಣಾದೇ ಉಪೊಡುಂದು ದಗೆ ಮಲ್ತೆರ್. ಅಂಚಾಯಿನೆಟ್ಟಾತ್ರ ಆಲ್ನ ನಿಜರೂಪ ಮದೆ ಆದೇ ಒರೀಂಡ್.
ಇಂಚ ದೆಂಗ್ ತತ್ತ್ ದಿನ ಪೊಣ್ಣ ನಡಕದ ಗುಟ್ಟು ದಾದಂದ್ ತೆರಿಯೊಡಾಂಡ ಅಪ್ಪೆ ಮಣ್ಣ್ ದ ಉಡಲ ಒಸರಾದುಪ್ಪುನ ಜನಪದ ಪಾದ್ದೊನೊಲೆನ್ ಒಕ್ಕುದು ತೂವೊಡಾಪುಂಡು. ಪೊಣ್ಣ ಜನ್ಮದ ಬೇನೆ ಬೆಸರ್ದ ಕೆಸರ್ ದಿಂಜಿದಿನ ಬದ್ಕ್ನ್ ಪನ್ಪಿನ ಈ ಪಾಡ್ದನೊಲು ಪಂತಿನ ಬತ್ತಲೆ ಸತ್ಯೊನು ಇದಮುಟ್ಟ ಯೇರ್ಲಾ ಪಂಡ್ಜೆರ್. ಈ ಜನಪದ ಬದ್ಕ್ದ ಉಲಯಿ ಆಲ್ ಬಜೀ ಕಾಜಿ ದೀಪಿನ, ಸೀರೆ ನೆರಿ ಆಡಾವುನ ಮೇಲದ ಪೊಣ್ಣಾದ್ ಇಜ್ಜೊಲು, ತಂಕದರ್ಪುದ ಸುರ್ಪೊನು ಮಾಯಕದ ಅಂಕದ ಕಲಟ್ಟ್ ತೋಜಾವುನ ಬಿಂಕದ ಕಣ್ಣಾದ್ ತೋಜುವೊಲು. ಮೂಲು ತೂನಗ ತೋಜುಂಡು ಇರೆ ಮದೆ ಕಾಯಿ ಆದ್ ಇತ್ತಿನ ಪಗೆತ್ತ ಪುಗೆ. ಪೊಣ್ಣನ ಪಗೆನಕುಲು
24
