ಬೆನ್ನಿ ಬೇಲೆ, ಉನ್ಪಿ ನುಪ್ಪು, ತಿನ್ಪಿ ತೆನಸ್, ಮಲ್ಪು ನುರ್ಕಟ್ಟಿಕೆದ ಕತೆನ್ ದುಂಬು
ದೀಪಿಲೆಕ್ಕನೇ ತುಳುವೆರೆ ಬದ್ಕ್, ತೆಲಿಕೆ, ನಲಿಕೆ, ಬೇನೆ ಬೆಸರ್, ಅಂಗ್ ಅಂಗಮೆ,
ಬೆಂಗ್ ಬೇಪುಲೆನ್ ತಪ್ಪಂದೆ ಪನ್ನುಂಡು. ಉಂದೆಟ್ಟ್ ನಮ್ಮ ಸಂಸ್ಕೃತಿ ಉಂಡು. ತುಳುತ್ತ
ಸಿರಿತಪ್ಪೆ ಪಾಡ್ಡನ ಪನ್ಪಿನೆಕ್ಕ್ ನಿಜ ಅರ್ಥ ಉಂಡು.
ನಮ್ಮ ಹಿರಿಯಾಕ್ಲು ಉರ್ಯಾಯಗ್ ವಂಚನೆ ಮಲ್ದಿನಕುಲತ್ತ್. ನಟ್
ತಿಂತಿನಕುಲು, ಪಟ್ ತಿಂತಿನಕುಲು, ಅಕ್ಲ್ದ ಇತ್ತಿನ ನೆತ್ತೆರ್ಡ್ ತುಳು ಅಪ್ಪೆನ ನೆಂಪು
ಉಂಡು. ಅವು ಸಿರಿ ತುಪ್ಪೆ, ಸಂಪೊತ್ತುದ ತುಪ್ಪೆ. ಆ ಸಂಪೊತ್ತು ಅಕಲೆ ನಾಲಯಿದ
ಕೊಡಿಟ್ಟ್ ಬಾಸೆದ ಒರುಟ್ಟು ಜೋವಕೊಂದು ಪುಟ್ಟುಂಡು. ಬದ್ಕ್ ಬಂಗಾರ್, ಪೊರ್ಲು
ಸಿಂಗಾರ್ ಮರ್ಲು ಪೊಂಗಾರ್ದ ಅಜೆಟ್ಟ್ ಉಂಡು ಪಾಡ್ದನದ ಪೊರ್ಲು. ಬಾಸೆ
ಒಂಜಿ ಶಕ್ತಿಯಾದ್ ಮುಲ್ಪ ಕೆಲಸ ಮಲ್ತ್ಂಡ್. ಕರಿದ್ ಪೋತಿನ ಕತೆನ್ ಒರಿದಿನ
ಕಲೆಗ್ ತೆರಿಪಾವುನ ಬೇಲೆನ್ ಪಾಡ್ಡನ ಮಲ್ತೊಂದುಂಡು. ಇನಿ ತುಳು ಜನಪದ ಸಾಹಿತ್ಯ
ಲೋಕೊಡು ಒವೇ ಒಂಜಿ ಬೇಲೆ ಆತ್ಂಡಲಾ ಅವು ಪಾಡ್ಡನದ ನಿರೆಲ್ಡ್ ಆತ್ಂಡ್.
ದೈವ ದೇವೆರೆನ ಕತೆ, ಬಿರ್ದ್, ಬೇರೆರೆನ ಎತೆ, ಅಂಕ, ಆಯನದ ಬಿಂಕ ಸೋಬನದ
ಪೊರ್ಲು ಪೊಲಿಕೆಲು ಮುಲ್ಪ ಅರು ಕಟ್ದ್ ಉಂಡು. ಬೇಲೆದ ಕಂಡೊಡು ಬಾಲೆದಪ್ಪೆನ
ಬೆಗರ್ದ ಬೆಸರ್ ಕನನೀರ್ದ ಒಸರ್ ಉಂಡು. ಸತ್ಯದ ಪೊಣ್ಣುಲೆನ ಸತ್ಯ. ಬೆನಾಟಿಕೆದ
ಮೋಕೆದ ಸೂಕೆದ ಸೊರ ಉಂಡು.
ಒರುಂಬ ತಿಂಗೊಲ್ದ ಬಂಜಿದ ಪಿಂಡ ಅಪ್ಪೆ ಬಂಜಿಡ್ದ್ ಪೂವೊಲ್ದ ಕೊಡಿ ಕಡ್ತೊಂದು ಭೂಮಿಗ್ ಬೂರಿನಲ್ತ್ಡ್ದ್ ಪತಿನ ದಿಂಜೆಲ್ ಬದ್ಕ್ದ ಒಕ್ಕನೂಲು ಕಡಿತೊಂದು ಚಟ್ಟೊಗು ಮಿತುರುನಡೆ ಮುಟ್ಟದ ನಿಚ್ಚ ಬದ್ಕ್ ಸೊಚ್ಚ ಸುರ್ಪೊನು ತುಳುತ್ತ ಸಿರಿತುಪ್ಪೆ ಪಾಡ್ಡನ ಪನ್ನುಂಡು. ಇನಿತ್ತ ಕಾಲೊಡು ಪದ್ದೊಲ್ದಿ, ಪೆದ್ದು ಸಂಕಡ, ಪೆದ್ದು ಬೇನೆಗ್ ಕೊರ್ತಿ ಕುದ್ದು ಬೇನೆ ಪಂಡ ದಾದಂದ್ ತೆರಿಯಂದಿನ ನಮಕ್ ಬಂಜಿ ಕುತ್ತುದು ಬಾಲೆದೆಪ್ಪುನ ಗತಿಕೆಟ್ಟ್. ಆಂಡ ಆನಿ ತೂಲೆ (ಬಾಲೆ ಪೆದ್ದುನ ಪೊರ್ಲು)
8
