ಶ್ರೀಮತಿ ಎಚ್. ಶಕುಂತಳಾ ಭಟ್ ಮೇರ್ ತುಳು ಕನ್ನಡದ ಹಿರಿಯ ಲೇಖಕಿ, ತುಳು ಕನ್ನಡದ ಮಾತಾ ಕಳೊಟ್ಟಾ ಎಡ್ಡೆ ಬೆಂದಿನಾರ್ ತುಳುಟು ಇಂಚ ಸುಮಾರು ಕಾದಂಬರಿನ್ ಬರೆತೆ, ಉಡುಪಿ ತುಳು ಕೂಟದಕುಲು ಮೇರೆನ ಕಾದಂಬರಿಲೆಗ್ ಪಣಿಯಾಡಿ ಮೆಚ್ಚಲೆ' ಪ್ರಶಸ್ತಿ ಕೊರೆರ್, 27 ಸರ್ತಿ ತುಳು ನಾಟಕಗಾದ್ ಧರ್ಮಸ್ಥಳದ 'ರತ್ನ ವರ್ಮ ಹೆಗ್ಡೆ' ಪ್ರಶಸ್ತಿ ಪಡೆತೆರ್. ಮೇರೆನ ನಾಟಕೊಲೆಗ್ 3 ಸರ್ತಿ 'ಕಲ್ಪನಾ' ಪ್ರಶಸ್ತಿ ಬಯಿದ್‌ಂಡ್. ಇಂಚ ಕತೆ ಕಾದಂಬರಿಗಾರಿಯಾದ್, ನಾಟಕಗಾರಿಯಾದ್, ಕವಯತ್ರಿಯಾದ್ ತುಳು ಸಾಹಿತ್ಯದ ಬುಳೆಚ್ಚಿಲ್‌ಗಾದ್ ಬೆಂದಿನ ಶ್ರೀಮತಿ ಎಚ್. ಶಕುಂತಳಾ ಭಟ್ ಇತ್ತೆ ತುಳು ಜಾನಪದ ಕಳೂಕು ಜತ್ತದೆ ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ ಪನ್ನಿನ ಈ ಗ್ರಂಥೋನು ಪ್ರಾಕ್‌ದ ಕಾಲೊಡ್ಡು ತುಳುನಾಡ ಪೊಂಜೊವು ಬಂಜಿನಲೆನ್ ಎಂಚ ತೂಪಾದ, ಪೆದಿನ್ ಎಂಚ ತೂವೊಂದಿತ್ತೆರ್, ಪುರುಬಾಲೆನ್ ಎಂಚ ತಾಂಕೊದಿತ್ತೆರ್, ಪನ್ನಿನೆನ್ ಸಂಶೋಧನಾತ್ಮಕವಾದ್ ಬಂಜಿನಾಲ್, ಪೆದ್ಮದಿ, ಬಾಲೆ, ಮೊಕ್ಲನ ಆರೈಕೆ, ತೂವೊನ್ನಾ ರೀತಿ ನಿಯಮ ಕಟ್ಟೆ ಕಟ್ಟಲೆ, ಪರಂಪರಾಗತವಾದ್ ಎಂಚ ನಡತೊಂದು ಇತ್ತ್ಂಡ್, ತೊಟ್ಟಿಲ್ಲ ಬಾಲೆನ್ ಜೋಯಿ ಪಂಡ್‌ದ್ ಪದ ಪಂಡ್‌ದ್ ಎಂಚ ಮಾನಾವೊಂದಿತ್ತೆ, ಪುಲಮರ್ದ್‌ ಎಂಚ ಆರೈಕೆ ಮಲ್ಲೊಂದು ಇತ್ತೆರ್ ಪನ್ನಿ ವಿವರಣೆ ಕೊರ್ತೆರ್. ಈ ಗ್ರಂಥ ನಿಜವಾದ್ ದುಂಬುದ ಕಾಲದ ಅಪ್ಪೆ ಬಾಲೆನ್ ತಾಂಕನದ ಒಂಜಿ ಕೈಗನ್ನಡಿ ನನಲಾತ್ ನನಲಾತ್ ಸಂಶೋಧನೆ ಮಲ್ಪುನಕ್ಲಗ್‌ ಆಕಾರ ಗ್ರಂಥ. 1 - ಡಾ. ಪಾಲ್ತಾಡಿ ರಾಮಕೃಷ್ಣ ಆಚಾರ್
