ಎಲಿಮಿನಿದ ತಟ್ಟಿಕುಡ್ಡು, ನುಪ್ಪು ಕಬಿಡೆರೆ ಸ್ಟೀಲ್ ಇಜ್ಜಾಂಡ ಪಿತ್ತಳೆದ ಒಟ್ಟೆ ಒಟ್ಟೆ ಇತ್ತಿ ತಾಳ, ಪ್ಲಾಸ್ಟಿಕ್ ಬೀಡಿ ಕಟ್ಟುನ ಸೂಪು ಬೈದ್ಂಡ್ ಉಂದು ಇತ್ತೆ ತಟ್ಟೆಲಾ ಆಪುಂಡು. ಚಾ ಗಾಲಿಪುನ ಪ್ಲಾಸ್ಟಿಕ್ ಚಾಲ್ನಿ ಎಲ್ಲಿಡ್ ಮಲ್ಲೆ ಮುಟ್ಟಲಾ ಇತ್ತೆ ತಿಕ್ಕುಂಡು ತಾರಾಯಿದ ಪೇರ್‌ಲಾ ನೆಟ್ಟ. ಅರಿಪೊಲಿ, ಮುಂಡೆವುದ ಪಜೆ ಬೇತೆ ಬೇತೆ ಸೈಜ್‌ ಬರೊಂದಿತ್ತ. ಇತ್ತೆ ಬಣ್ಣ ಬಣ್ಣದ ಪ್ಲಾಸ್ಟಿಕ್ ಪಜೆಕ್ಕುಲು ಬೈದ್ಂಡ್. ಪ್ಲಾಸ್ಟಿಕ್ ಇಜ್ಜಾಂಡ ಟಯರ್‌ದ ಪುಡಯಿ, ಕುರುವೆ, ಕಾಂಟ್ರೋಲು ಕಮ್ಮಿ ಬಿಲೆಕ್ಟ್ ತಿಕ್ಕುಂಡು, ತತ್ರದ ಜಾಗೆಗ್ ನಮೂನೆ ನಮೂನೆದ ಕೊಡೆಕ್ಕುಲು ಬೈದ, ಕೊರಂಬುದ ಬದಲ್‌ಗ್ ಪ್ಲಾಸ್ಟಿಕ್ ಶೀಟ್‌ನೇ ಪುದೆತೊನುವೆರ್ ಇಜ್ಜಾಂಡ ಪ್ಲಾಸ್ಟಿಕ್‌ದ ರೈನ್‌ ಕೋಟ್‌ನೇ ಕಂಡೊಗು ಪೋನಗ ಗಲಸುವೆರ್. ಇಂಚಾಂದ ಓಲುಂಡು ಬಿಲೆ ನಮ ಊರುದ ತಟ್ಟಿಕುಡುಪುಗು, ದೆತೊನುವೆರ್ ಏರ್ ಜೆಪೆರೆ ಒಲಿತ ಪಜೆ.
ಕರ್ಬ ಗುದ್ದುದು ಕೊಡಪಟ್ಯೊಡು ಮಲ್ಗೊಂದಿತ್ತಿ ಕತ್ತಿ, ಬಿಸತ್ತಿ, ಪಿಕ್ಕಾಸ್ – ಕೊಟ್ಟು, ಸಬ್ಬಲ್, ತಾಪಿ, ಬಾಜಿ, ಕುಡರಿ, ಸುತ್ತೆ, ಮುಟ್ಟಕತ್ತೆ, ಪೆರದನೆ, ಮಂಡಕತ್ತಿ, ಇಂಚಿತ್ತಿನವು ಒವು ಬೋಡಿಂತ್‌ಂಡಲಾ ಕೊಡಪಟ್ಟ ವಾ ಮುಲ್ಲೆಡ್ ಇತ್ತ್ಂಡಲಾ ನಾಡೊಂದು ಪೋದು ಮಲ್ಲಾವೊಂದಿತ್ತಿನ ಕಾಲ ಒಂಜಿ ಇತ್ತಂಡ್.
ಆಂಡ ಇತ್ತೆ ಪ್ಲಾಸ್ಟಿಕ್ ಪುಡಿ ಪಾಡ್ಡಿನ ಕಂಪೆನಿಡ್ ತಯಾರಾತಿನ ಸ್ಟೀಲ್ ಇಜ್ಜಾಂಡ ಕರ್ಬದ ಬಿಸತ್ತಿ, ಕತ್ತಿಲು ತಿಕ್ಕುಂಡು ಕೊಟ್ಟು ಪಿಕ್ಕಾಸ್ ಕಂಪೆನಿಡೇ ತಯಾರಾಪುಂಡು, ಓಲುಲಾ ಏಪಲಾ ತಿಕ್ಕುಂಡು, ಕರ್ಬದ ಬೇಲೆ ಮಲ್ಪುನಕುಲು- ಕಲ್ಪುನಕುಲುಲಾ ಇಜ್ಜೆರ್, ಕರ್ಬ ಗುದ್ದರೆ ಏಲ್ಲಾ ಇತ್ತೆ ತಯಾರ್‌ಲಾ ಇಚ್ಚೆರ್, ಪುಡಿ ಪಾಡ್ರೆ ಮರಲಾ ಎಡ್ಡೆ ತಿಕ್ಕುಜಿ ಪಂಡ್‌ ಉಂಡು. ಆಂಡಲಾ ಅಲ್ಪಲ್ಪ ಇತ್ತಿ ಕೊಡಪಟ್ರೊಲು ಬಂಗೊಡು ಬೇಲೆ ಮತ್ತೊಂದು ನಂಕ್ ತೂವರೆ ತಿಕ್ಕುಂಡು.
ಕರ, ಬಿಸಲೆ, ಅಡ್ಯರ, ಮಂಡೆ, ಓಡು, ಕಾವೊಲಿ, ಬಾವಡಿ, ಕಡ್ಡ, ಕೂಜೆ, ಬಟ್ಟಲ್ ಲೋಟೆ, ಇಂಚ ನಿಚ್ಚ ಇಲ್ಲಲೆಡ್ ಗಳಸುನ ವಸ್ತುಲು ಮಾತಲಾ ಮಣ್ಣಿಡೇ ಮಲ್ತಿನವು ತಿಕ್ಕೊಂದಿತ್ತಂಡ್. ಗ್ರಾಮೀಣ ಪ್ರದೇಶೂಲೆಡ್ ಇಡೀ ಊರೇ ಮಣ್‌ದ ಬಾಜನ ಮಲ್ತ್ದ್ ಊರಿಡೀ, ಜಾತ್ರೆ, ಸಂತೆಲೆಡ್ ಮಾರೊಂದಿತ್ತೆರ್. ಮಣ್ಣ ಬಿಸಲೆದ ಬಂಗುಡೆ ಪುಳಿಮುಂಚಿ ಎಡ್ಡೆ, ಕರಟ್ ಬೆಯಾಯಿನ ಉರ್ಪೆಲರಿತ್ತ ಗಂಜಿ ಎಡ್ಡೆ ಪನ್ನಿನ ಕಾಲಲಾ ಅಪಗ ಇತ್ತಂಡ್.
ಆಂಡ ಇತ್ತೆ ಮಾತಲಾ ಸ್ಟೀಲ್, ಅಲಿಮಿನಿದವು ಬೈದ್ಂಡ್. ಅಡಿ ಪತ್ತೆಂದಿನ, ಎಣ್ಣೆ ಪಾಡಂದೆ ದೋಸೆ ಮಲ್ಪುನ ನಾನ್ ಸ್ಟಿಕ್ ಕಾವಲಿ, ಅಪ್ಪದ ಕಾವಲಿಲು ಕಂಪೆನಿದವು ಬೈದ್ಂಡ್. ನಾನ್ ಸ್ಟಿಕ್, ಅಲಿಮಿನಿದ ಬಾಜನೊಲು ಆರೋಗ್ಯಗ್
198
ತುಳುನಾಡಿನಲ್ಲಿ ಬಾಸೆಲ್ ಮಿಶನ್ ಮತ್ತಿತರ ಲೇಖನಗಳು...
