ಮಂಗಳಾವತಾರ
ಮಾಮಲ್ಲ ಭೂಮಾತೆ ಭೂಮಿಭಾರೊಗು ಭೀತೆ
ಗೋಮಾತೆ ತಾನಾದ್ ಸುರನಿಕರ ಸೇರಾದ್
ಸ್ವಾಮಿದೇಬೆರೆ ವಿಷ್ಣುವೈಕುಂಠೊಗೇ ಪೋದ್
ಪಾದೊಪತ್ಡ್ಡಬೂರ್ದ್;
“ಶ್ರೀ ಮಾಧವಾ, ದೇವ, ನಾರಾಯಣಾ, ಕೇನ್ಲೆ
ಆಮಹಾರಕ್ಕಸೆರ್ ಪಾಕೊಜನ ಲಕ್ಕ್ದೆರ್
ತಾಮಸೀಚರೆರಕುಲು ಅನ್ಯಾಯ ಆಪತ್ತ್
ಕಷ್ಟೊನೇ ಕೊರಿಯೆರೆಂಕ್"
2
“ದಿನನಿತ್ಯೊ ಲೋಕಕಂಟಕೆರಾದ್ ಬಲತೊಂದು,
ಜನಮಾನಿಕಂಟೆಲ್ಗ್ ಕತ್ತಿನೇ ಕೋತೊಂದು,
ಪನಿತ್ ದಯೆದಾಕ್ಷಿಣ್ಯ ಮಾತಲಾ ಮದತೊಂದು,
ನೆನೆಪಂದೆ ರೀತಿ ನೀತಿ,
ಎನ ಪುಣ್ಯ ಪೊನ್ನುಲೆನ್ ಕಂಡೊಂದು ಕೊಂಡೊಪೆರ್,
ಎನಮಾನ ಮರ್ಯಾದಿ ನಿಟ್ಟ್ ನಿಲೆ ಸೆಟ್ಟಯೆರ್,
ಎನ ಬಂಜಿಬಾಲೆಲೆಗ್ ಬಂಙೋನೇ ಕೊರ್ಕೊರ್ದ್
ಎನಕರ್ಲ್ ಕುರೆಕುರೆಯೆರ್;
3
“ಈ ರಕ್ಕಸೆರೆನ್ ಗಿಡೆದೇರೆನನ್ ಕಾತೊನೊಡು?
ಈರೆ ಸಿರಿದಯೆದೀದ್ ಮಾರಿಲೆನ್ ಮಾಜವೊಡು
ಈ ರೀತಿನೀತಿ ಪತ್ದೆನ್ನನುದ್ದರಿಪುನಾರ್
ಈರೊರಿಯೆ ಮಂಗಳಾತ್ಮ,
ಈರೆನೇ ನಂಬೊಂದೆ ನಿತ್ಯ ನಿಲೆ ನೆನೆತೊಂದೆ
ಈರೆಡನೆ ಪಂಡೊಂಡೆ, ಎನಕಷ್ಟ ಕೇಂಡೊಂದು
ಈ ಅಧರ್ಮೊನು ಕಲೆದ್ ಧರ್ಮಸಂಸ್ಥಾಪನೆಗ್
ಅವತಾರ ಪತ್ದ್ ಬರೊಡು”
ಕಯ್ಯಾರರ ಕಬಿತೆಲು / 23
