ಸುರೂತ ಪಾತೆರ
 |
 |
|
ಜೋಕುಲು ಪಂಡ ದೇವೆರೆ ರೂಪಾಂದ್ ಪನ್ಪ,ಅಂಚೆನೆ ಜೋಕುಲು ಚಂಡಿ ಮಣ್ಣ್‌ದ ಮುದ್ದೆಲೆಕಾಂದ್ಲಾ ಪನ್ಪೆರ್.ಚಂಡಿ ಮಣ್ಣ್ ಗ್ ವಾ ರೂಪ ನಮ ಕೊರ್ಪನಾ ಆ ರೂಪೊಡು ಅಯಿನ್ ಪಡೆವೊನೊಲಿ ಪನ್ಪುನ ಸತ್ಯ ಮಾತೆರೆಗ್ಲಾ ತೆರಿದಿನವೆ.
ಬದಲಾವಣೆ ಜಗದ ನಿಯಮ ಪಂಡ್ದ್ ಗೀತೆನೇ ಪನ್ಪುನ ಒಂಜಿ ಪಾತೆರದಲೆಕಾನೆ,ದಿನರ್ದ್ ದಿನ, ಗಲಿಗೆರ್ದ್ ಗಲಿಗೆಗ್ ಒರು ಪಗರುನ ಈ ಕಾಲಡ್ ಬಂಜಿದ ಪಡಿಕಾದ್,ಸೋಕು ದೇಕಿಗಾದ್,ಸಮಾಜದ ನಡುಟು ಮೇಲ್ಮೆಗಾದ್ ನಮ ತೆರಿದಾ ತೆರಿಯಂದೆನಾ ನಮ್ಮ ಅಪ್ಪೆ ಭಾಷೆನ್ ಬುಡ್ದು ಬೇತೆ ಭಾಷೆನ್ ತರ್ಕೊಂದುಲ್ಲ. ಭಾಷೆ ನಂಕ್ ಮಾತಲಾ ಬೋಡು,ಅಂಚ ಪಂಡ್ದ್ ನಮ್ಮ ಅಪ್ಪೆ ಭಾಷೆನ್ ಬುಡ್ಪುಲೆಕ ಇಜ್ಜಿ.ಅಯಿಟ್‌ಲಾ ಪರೆಂಗಿ ಭಾಷೆನ್ ಪತೊಂದು ನಮ ಇತ್ತೆ ಪಾಕ ದೂರ ಬತ್ತ್‌ದಾತ್ಂಡ್,ಪಿರ ಪೋಪುಲೆಕ ಇಜ್ಜಿ.ಇಂಚಿತ್ತಿ ಸಂದೆರ್ಪುಡು ನಮ್ಮ ಅಪ್ಪೆ ಭಾಷೆ ತುಲುನು ಒರಿತ್ ಬುಲೆಪಾವುನ ಅಂಗಲ್ಪುಡು ಒಂಜಾತ್ ಸಂಘ ಸಂಸ್ಥೆಲು ಬೇತೆ ಬೇತೆ ಸಾದಿಡ್ ಪೊರುಂಬಾಟ ಮಂತೊಂದುಲ್ಲ, ತುಲು ಭಾಷಗ್ ಎನ್ಮನೇ ತಾನಮಾನೊಗು ಎತ್ತೊಡು,ತುಲುನಾಡ್‌ಡ್ ತುಲು ಶಾಲೆಡ್ ಕಲ್ಪುನ ಭಾಷೆ ಆವೊಡು ಪನ್ಪುನವೇ ತುಲುವೆರೆನ ಮಲ್ಲ ಆಸೆ ಆದುಂಡು.
ಈತ್ ಮಾತಾ ಪೊರುಂಬಾಟದ ಒಟ್ಟಿಗೆ ಬೆಂಗ್ಲೂರುಡು ತುಳುವೆರೆ ಚಾವಡಿದ ಪದುಕೆರ್ ಅಪ್ಪೆ ಭಾಷೆ ಜೋಕುಲೆನ ನಾಲಯಿಡ್ ನಲಿತ್ಂಡನೇ ಅವು ಒರಿದ್ ಬುಲೆಯೆರೆ ಸೊಲಭ ಉಂಡೂಂದು ತೆರಿಯೊಂದು ಅಯಿಕಾದ್ ತುಲುನಾಡ್‌ದ ಕಬಿಕುಲು ಬರೆಯಿನ ಜೋಕುಲೆ ಪದೊಕುಲೆನ್ ಸಂಪೊಲಿತ್ದ್ ಜೋಕುಲೆ ಉಜ್ಜಾಲ್ ಪನ್ಪುನ ಜೋಕುಲೆ ಪದೊಕುಲೆನ ಜೊಂಕುಲಿನ್ ಮಸ್ತಿರೆಮಂತ್‌ದ್ ಲೋಕೊಗು ಕೊರ್ಯೆರ್.ಈ ಕೋಪೆದ ಪದೊಕುಲು ಇತ್ತೆ ಊರು ಪರವೂರುಡು ಅಂಗನವಾಡಿ,ಬೊಕ ಶಾಲೆದ ಜೋಕುಲೆನ ಬಾಯಿಡ್ ಕೇನೊಂದು ಉಂಡು, ತುಳುವೆರೆ ಚಾವಡಿ ಬೆಂಗ್ಲೂರುದ ಮಲ್ಲ ಬೇಲೆ ಇನಿ ಸಮಾಜೊಡು ಪುಗಾರ್ತೆದ ಪೊಲಿ ಪೊರ್ಲು ದಿಂಜಾದ್ಂಡ್. ಇತ್ತೆ ಅಕ್ಲೆನ ರಡ್ಡನೆ ಪಜ್ಜೆ ಆದ್ ಕನ್ನಡದ ಪುಗಾರ್ತೆದ ಕಬಿನಕುಲು ಬರೆಯಿನ, ಇನಿ ಕೋಡೆದ ದಿನಮಾನೊಡು ಜೋಕುಲೆ ಕೊಡಿನಾಲಯಿಡ್ ನಲಿತೊಂದುಪ್ಪುನ,ಅತ್ತಾಂದೆ ಒಂಜಾತ್ ಕನ್ನಡದ ಪೊಸ ಪದೊಕುಲು ತುಲು ಭಾಷೆಗ್ ಪಗತೊಂದು,ಕನ್ನಡ ಪದೊಕುಲೆನ ಸಬಿರುಚಿನ್ ತುಲುಟು ಪಟ್ಟುನ ಬೇಲೆಗ್ ಜಯಿದೆರ್.ಉಂದು ತುಳುವ ಜೋಕುಲೆಗ್ ಬೊಕ ತುಳು ಅಭಿಮಾನಿಲೆಗ್ ಪೊಸ ಉರ್ಕುಲ್ಲಾಸೊನು ಕೊರಡ್,ಈ ಪದೊಕುಲು ಉರಲಾದ್ ಪೊರುಲಾವಡ್ ಪಂಡ್ದ್ ಎಡ್ಡೆಪ್ಪುನು ಬಯಕುವೆ.
ಕುಶಲಾಕ್ಷಿ ವಿ. ಕುಲಾಲ್
ಕಣ್ವತೀರ್ಥ, ಮಂಜೇಶ್ವರ
ತುಳು ಜೋಕ್ಲೆ ಪದಕೋಪೆದ ಪರವಾದ್
