ದಿನ ಕರಿನಂಚ ಅಕುಲು ಒಂಜಿಕರತ್ತ ಗಂಜಿ ಉನ್ಪಿನ ಮೆಗಿದಿ ಪಲಿ ಆದ್ ಒಂಜಾಯೆರ್. ಸಿರಿ ಬಂಜಿನಾಲ್ ಆತೊಲು.
ಒಂಜಿ ದಿನ ಸಾಮುನ ತಗೆ ಅಂಗರಾಜ ಬರ್ಕೆದ ಬಾಮು ಕಿಲ್ಲೆ ಕೊಟ್ಟ ರಾಡಿಗ್ ಬತ್ತೆರ್. ಸಿರಿ ದಿಂಜಿದಿ ಬಂಜಿನಾಲ್ಂದ್ ತೆರಿಯೆರ್. ಅಲೆನ್ ತಮ್ಮನದ ಒಣಸ್ಗ್ ಬರ್ಕೆಗ್ ಬರೊಡುಂದು ಪನ್ಪೆರ್.
ಆನಿ ಬೊಲ್ಪುಗು ಸಿರಿ ಸಾಮು ಒಟ್ಟಾದ್ ಬರ್ಕೆಗ್ ಪೋಯೆರ್. ಬಾಮು ಕಿಲ್ಲೆ ಸಿರಿ ಸಾಮುನು ಮೋಕೆಡ್ ಎದುಕೊಂದು, ತಮ್ಮನ ಉಡಿಗಿರೆ ಮಲ್ತೆರ್.
ಬೈಯ್ಯದ ಪೊರ್ತು. ತಟ್ಟ್ ತಡೆವು ಮಲ್ಪಂಗೆ ಅಕುಲು ಕೊಟ್ಟರಾಡಿಗ್ ಪಿರ ಬತ್ತೆರ್. ಪೋನಗ ಎಲಿ ಕುಂಜಗಾದ್ ಪೋಯಿನ ಸಿರಿ, ಸಾಮು ಬನ್ನಗ ಪಿಲಿಕುಂಜದ ತಾದಿ ಪತ್ದೆರ್.
ಸಾದಿಡ್ ಸಿರಿಕ್ಕ್ ತಟ್ಟ್ಂಡ್ ತಡೆವುದಾಂತಿ ಬೇನೆ. ಪೆದ್ದುನ ಬೇನೆ ಒತ್ತೊತ್ತುಗು ಬತ್ತ್ಂಡ್. ಸಿರಿ ಮರ್ಕ ಸಂಕಡೊಡು ಅಲ್ಪನೇ ಕಾರ್ ನೀಡ್ದ್ ಕುಲ್ಲಿಯಲ್. ಸಾಮುನು ಕೈ ಬಾಸೆಡ್ ಕೈತಲ್ ಲೆತ್ತಲ್.
"ಅಕ್ಕ! ಒಂಜಿ ಪಜ್ಜೆಲಾ ದುಂಬು ದೀವಯೆ. ಕಟ್ಟ್ ನಿಟ್ಟ್ ದ ಬೇನೆ. ಓ ಬೆಮ್ಮೆರೇ! ಓ ಅಕ್ಕಾ" ಪಂಡಿನ ಸಿರಿ - ಬೇನೆ ತಡೆವಂದೆ ಮಟ ಮರಂಕನೆ ಜೆತ್ತಲ್.
ಕೈತಲ್ ಇಲ್ಲ್ ಜ್ಜಿ. ತಾದಿಡೇ ಪೆದ್ದುನ ಬೇನೆ. ದಾಲಾತೆರಿಯಂದೆ ಸಾಮು ಕೈಕಾರ್ ಬುಡಿಯಳ್.
ಸಿರಿನ್ ಬಾಮಿದ್, ಬಂಜಿ ಪೂಜಿಯಲ್. ಮೋಕೆಡ್ ತರ್ಕೊಂಡಲ್. ಒಂತೆ ಪೊರ್ತಾನಗನೇ ಸಿರಿ ತನ್ನೆ ತೋಡುಡು ಪೊಣ್ಣು ಬಾಲೆ ಪೆದ್ದ್ ದ್ ಉಸುಲು ಬುಡಿಯಳ್.
"ಅಕ್ಕಾ! ಬಾಲೆನ್ ಪಾಲೆಡ್ ಪಾಡಿ. ಐಕಾದ್, ಅಲೆ! ಅಂಚಿ ತೂಲೆ. ಎದಂಗ್ಗೊಂಜಿ ಜೀವ ಕೊರ್ತೆ. ಐಕ್ ಪಾಲೆ ಕನಲೆ. ಬಾಲೆನ್ ಪಾಲೆಡ್ ಪಾಡ್ಲೆ ಪಂಡಲ್ ಸಿರಿ.
ಬಾಲೆ ನಾಲಯಿ ದೊಂಡೆಡ್ ದೀವಂದೆ ಬುಲಿತೊಂದಿತ್ತ್ಂಡ್. ಸಿರಿ ಮೈತ ಬೇನೆ ಮದತ್ತಲ್. ಬಾಲೆದ ಮೋನೆ ತೂದು ಕೈ ನಿಲ್ಕೆ ಅರಾದ್ ಪತಿಯಲ್. ಮೋನೆ ನಿಲ್ಕೆ ಮುತ್ತು ಕೊರಿಯಲ್.
ಸಾಮುನು ಲೆತ್ತ್ ದ್, ಬಾಲೆನ್ ಅಲೆ ಕೈಟ್ ಕೊರುದು ಪಂಡಲ್
4
