ಅಲ್ಪ ಮುಲ್ಪ ಚಾವಡಿ ಒರ್ಮೆ ತೂಯೆರ್. ಪಡ್ಡಾಯಿ ಅಂತರನಾಡಿಯೆರ್. ಜಾಲ್ ಜತ್ತೆರ್. ಕಣ್ಣೊರ್ಮೆ ತಿರ್ಗ್ ತೂಯೆರ್! ಬಾಲೆ ಕಣ್ಣ ಮದೆ ಆದ್ ಪೋತುಂಡು.
ಅಯ್ಯೋ ದೇವರೇ! ಬಾಲೇ ಎನ ಬಾಲೆ ಒಡೆ ಪೋಂಡು? ಅರ್ ಮುರೆಡಿಯರ್. ಬಾಯಿ ಜತ್ತ್ ಬುಲಿತೆರ್. ಲೆತ್ತೆರ್.
"ಅಯ್ಯೋ ದೇವರೇ! ಒಂಜಿ ಕೈಟ್ ಕೊರುದು, ನನೊಂಜಿ ಕೈಟ್ ಒಯ್ತ್ ದೆತ್ತರಾ? ಓ ಬೆಮ್ಮೆರೇ, ಎನ ಬಾಲೆಗ್ ದಾನೆ ಆಂಡ್, ಓಡೆ ಪೋಂಡು?”
ಚಂದ್ರಾವತಿಗ್ ಚಲ್ಲಪ್ಪೆ ಆನಿ ಪನ್ತಿನ ಕತೆ ನೆಂಪು ಮಲ್ತೊಂಡರ್..... ಕಣ್ಣೀರ್ಡ್ ಕೈ ದಕೊಂದು ನಿತ್ಯಲಾ ಕೊರಗ್ ದ್ ಕರಗ್ ದ್ ಪೋಯೆರ್!
ಅವ್ವೇ ದಿನ ಕಾನ ಬೊಟ್ಟದ ಅಜ್ಜೆ ಚಂದು ಬನ್ನಾರ್ ಒಕ್ಕೆಲ್ ಪಕ್ಕೆಲ್ದ ಇಲ್ಲ ಮರ್ಗಿಲ್ಗ್ ಪೋಯಿನಾರ್, ಅವೇ ತಾದಿಡ್ ಪಿರ ಬತ್ತೆರ್. ಬರ್ಪಿ ಪೊರ್ತು ಮರತ್ತ ಮುದೆಲ್ದ್ ಬಾಲೆ ಬುಲಿಪುನ ಸ್ವರ ಕೇನುಂಡು.
ಅಜ್ಜೆರ್ ಕಣ್ ಜತ್ತ್ದ್ ಸುತ್ತ ತೂಯೆರ್. ಕೆಬಿಕ್ ಕೇನುಂಡು, ಕಣ್ಣಿಗ್ ತೋಜುಜಿ.
ಅಜ್ಜೆರ್ ಕಲ್ಲಾದ್ ಉಂತಿಯೆರ್, ತಿರ್ಗ್ ತಿರ್ಗದ್ ತೂಯೆರ್. ಮರತ್ತ ಮುದೆಲ್ದ್ ಬಾಲೆ ಬುಲಿಪುನ ಸ್ವರ. ಪುದೆಲ್ದ ಇರೆ ಮದ ಪಂದಾಯೆರ್. ಬಾಲೆನ್ ತೂಯೆರ್.
ಬುಲಿಪು ಬಾಲೆನ್ ದೆರ್ತ್ ಪತಿಯೆರ್. ಮುತ್ತು ಕೊರಿಯೆರ್. ಕೊಂಡಾಟೊಡು ತರ್ಕ್ ಪತೊಂಡೆರ್. ಪುಗ್ಗೆಲ್ದ ಶಾಲ್ನ್ ಒಯ್ತೆರ್. ಬಾಲೆಗ್ ಮೈ ನಿಲ್ಕೆ ಪುದೆತ್ತೆರ್. ಇಲ್ಲಗ್ ಬತ್ತೆರ್.
ನಿರೆ ಕರೆತ್ತ ಪೊಂಜೆವೆನ್ ಲೆತ್ತೆರ್. ಬಾಲೆನ್ ಎಣ್ಣೆ ಸೀಗೆಡ್ ಮೀಪಾಯೆರ್.
ಏರ್ಲಾ ದಾತ್ವಾರಿ ದಾಂತಿನ ಬಾಲೆನ್ ಕಣ್ಣ್ ಡ್ ಕಣ್ಣ್ ದೀದ್ ತಾಂಕಿಯೆರ್.
ಊರ ಜೋಯಿಸೆರೆನ್ ಲೆಪುಡಾಯರ್. ಬಾಲೆದ ಪುಟ್ಟಿ ಪುದರ್ ಕೇಂಡೆರ್. ಜೋಯಿಸರ್ ಪಂಡಿ ವೇಳೆ ಗಳಿಗೆ ಸರಿಯಾದ್ ಬಾಲೆನ್ 'ಗಿಂಡಿ' ಪನ್ಪಿ ಪುದರ್ ದೀದ್ ಲೆತ್ತೆರ್.
ಬಾಲೆ ಕಾನ ಬೊಟ್ಟುಡು ಪುಣ್ಣಮೆದ ಚಂದ್ರನಂಚನೇ ದಿಂಜಿದ್ ಬುಲೆಂಡ್.
ದಿನ ಕರಿಂಡ್. ತಿಂಗೊಲು ದಾಂಟ್ಂಡ್. ವರ್ಸ ದಿಂಜಿಂಡ್. ಗಿಂಡಿಗ್ ವರ್ಸ ಪದ್ರಾಡ್ ದ್ಂಟ್ ಪೋತುಂಡು!
13
