ಗುರ್ತ
[ ಮುಖ ಪುಟ ]
ಗುರ್ತ
ತುಳು ಕಬಿತೆಲೆ ಗೊಂಚಿಲ್
| ಡಾ.ಎಂ. ಪ್ರಭಾಕರ ಜೋಶಿ |
|
|
| ಕಲ್ಕೂರ ಪ್ರಕಾಶನ |
| ಶ್ರೀಕೃಷ್ಣ ಸಂಕೀರ್ಣ, |
| ಮಹಾತ್ಮಾ ಗಾಂಧಿ ರಸ್ತೆ, |
| ಮಂಗಳೂರು - 575 003 |
ಗುರ್ತ
ತುಳು ಕಬಿತೆಲೆ ಗೊಂಚಿಲ್
| ಡಾ.ಎಂ. ಪ್ರಭಾಕರ ಜೋಶಿ |
GURTHA (Identity) a collection of poems in Tulu by Dr. M. Prabhakara Joshy, Pintos Lane, Mangalore - 575 004.
Published by: Kallkura Prakashana, Mangalore
2008
ಬಿಲೆ: ರೂ. 24-00
ವಿತರಣೆ:
ಅತ್ರಿ ಬುಕ್ ಸೆಂಟರ್
ಬಲ್ಮಠ, ಮಂಗಳೂರು - 575 001
ದೂರವಾಣಿ: 2425161
ಅಚ್ಚಿ ಐತ್ತ:
ಆಕೃತಿ ಕಂಪ್ಯೂಟರ್, ಕೆ.ಎಸ್. ರಾವ್ ರಸ್ತೆ,
ಮಂಗಳೂರು - 575 001 ದೂರವಾಣಿ: 0824 2443002
ಶ್ರೀ ಗಣೇಶ್ ಪ್ರಿಂಟರ್
ಸಿಟಿ ಪೊಯಿಂಟ್, ಮಂಗಳೂರು - 575 003
ii
|
ರಡ್ದ್ ಪಾತೆರ
ಉಂದು ಒಂಜಿ ಬೇತೆನೆ ನಮೂನೆದ
ಕಬಿತೆಲೆ ಗೊಂಚಿಲ್, ಸಂಸ್ಕೃತದ ನಾಟಕಕಾರೆ
ಭಾಸ ಮಹಾಕವಿನ 'ಬಾಲಚರಿತ' ನಾಟಕೊದ
ಕೆಲವು ಶ್ಲೋಕೊಳೆನ ಪ್ರೇರಣೆಡ್ ಬರೆಯಿ
ಬರವುಳುಂದು. ಈ ಕವಿತೆಲು, ಅನುವಾದ ಅತ್ತ್,
ತರ್ಜುಮೆ ಅತ್ತ್, ರೂಪಾಂತರಲಾ ಅತ್ತ್.
ಅರ್ಥಾಂತರ, ಅನುಸೃಷ್ಟಿ ಅಂದ್ ಪಣೊಲ್ಯಾ
ದಾನ್ನ ಈ ರೀತಿದ ಒಂಜಿ ಪ್ರಯತ್ನ ತುಳುಟ್ಟು
ಉಂದೇ ಬಹುಶಃ ಸುರುತ್ತವು.
ಯಾನ್ ತುಳುಟ್ಟ್ ಬರೆಯಿನ ಕಡಮ್ಮೆ.
1970ನೇ ದಶಕೊಡೊಂಜಿ ನಾಲ್ ಪದ ಬರೆದಿತ್ತೆ.
ಒಂಜಿ ರಡ್ಡ್ ಲೇಖನ ಬರೆತೆ. ತುಳು ಮಹಾಕವಿ
ಮಂದಾರ ಕೇಶವ ಬಟ್ರ್ ರಾಮಾಯಣ
ಬರೆವೊಂದಿತ್ತಿ ಲೆಕ್ಕನೇ ಎಂಕ್ ಓದ್‌ದ್ ಪಂಡ್‌ದ್
ಅಭಿಪ್ರಾಯ ಕೇನೊಂದಿತ್ತೆರ್. ಅದಗ ಆರ್‌ಲಾ,
ದಿ. ಪೊಳಲಿ ಬಾಲಕೃಷ್ಣ ಶೆಟ್ರ್‌ಲಾ – ತುಳುಟ್ಟು
ಬರೆಲಾ, ನಿಕ್ಕ್ ಆ ಸಾಮರ್ತಿಗೆ ಉಂಡು
ಪಂಡೊಂದಿತ್ತೆರ್. ಅಕ್ಲೆನ್ ಈ ಸಂದರ್ಬೊಡು
ನೆನವರಿಕೆ ಮಲ್ಪುವೆ.
v
ಇಂಚಿತ್ತಿನವೇ ಕವಿತೆಲೆನ್ ಯಾನ್
ಕನ್ನಡೊಡು ಬರೆನಗ ಎಡ್ಡೆಪಾತೆರ ಪಂಡಿ ಇಷ್ಟೆರೆಗ್
ಋಣಿ. ಈ ಬರವುದ ಬಾಸೆನ್ ಪರಿಶೀಲನೆ ಮಲ್ತ್
ಕೊರಿನ ಪ್ರತಿಭಾವಂತ ಲೇಖಕೆ ಶ್ರೀ ಬೋಳ
ಚಿತ್ತರಂಜನ್‌ದಾಸ ಶೆಟ್ರೆಗ್ ಕೃತಜ್ಞತೆಲು.
ಈ ಪುಸ್ತಕೊ ಪೊರ್ಲುಡು ವಿನ್ಯಾಸ
ಮಲ್ತ್‌ದ್, ಅಚ್ಚಿಮಲ್ತಿನ ಆಕೃತಿ ಕಂಪ್ಯೂಟರ್ಸ್‌ದ
ಕಲ್ಲೂರು ನಾಗೇಶೆರೆಗ್ ಎನ್ನ ಸೊಲ್ಮೆಲು.
ಎನ್ನ ತುಳು, ಕಾರ್ಲದ ಬೊಕ್ಕ ಕುಡ್ಲದ
ತುಳುತ್ತ ಕಡ್ಲೆ ಬಜಿಲ್.
ಭಾಸ ಮಹಾಕವಿನ ನಾಟಕೊದ
ಶ್ಲೋಕೊಳೆನ್ ಪೂಜ್ಯೆರಾಯಿನ ಪ್ರೊ. ಎಸ್.ವಿ.
ಪರಮೇಶ್ವರ ಭಟ್ರೆನ ಭಾಸಮಹಾಸಂಪುಟೊಡ್ದ್
ಅಜತ್ತ್‌ದೆ.
ಈ ಗೊಂಚಿಲ್‌ನ್ ತನ್ನ ಕಲ್ಕೂರ
ಪ್ರಕಾಶನದ ಮೂಲಕ ಬೊಳ್ಪುಗು ಕೊಣತ್ತ್‌ದ್
ಪ್ರೋತ್ಸಾಹ ಕೊರೊಂದುಪ್ಪುನ ನಮ ನಾಡ್‌ದ ಒರಿ
ಮಲ್ಲ ಸಾಂಸ್ಕೃತಿಕ ಮುಂದಾಲು, ಎನ್ನ ಆತ್ಮೀಯೆ
ಶ್ರೀ ಪ್ರದೀಪಕುಮಾರ ಕಲ್ಕೂರೆರೆಗ್ ಉಪಕಾರೊದ
ಉಪಚಾರೊನು ಪನ್ಪುಜಿ.
ಯೆನ್ನ ಸಾಹಿತ್ಯದ ಕೆಲಸೊಡು
ಯೇಪೊಲಾ ಬೆರಿಸಾಯ ಮಲ್ತೊಂದು ಬರ್ಪಿ
ಯಜಮಾನಿ ಸುಚೇತಾ ಜೋಶಿಗ್ ಕೃತಜ್ಞತೆ
ಪಣಯೆ
ಎಂ. ಪ್ರಭಾಕರ ಜೋಶಿ
ಎನ್. 3, ಪೀಸ್‌ಲ್ಯಾಂಡ್
ಪಿಂಟೋ ಲೇನ್, ಕದ್ರಿಕಂಬಳ
ಮಂಗಳೂರು-575 004
email:joshymp@rediffmail.com
vi
| 1. | ದೇವರೆ ಬಣ್ಣ / 1 |
| 2. | ತೂವೆರೆ ಬತ್ತೆರ್ / 2 |
| 3. | ನಡು ನಡುಟ್ಟು / 3 |
| 4. | ಪೊರ್ಲು ಪಂಡ / 4 |
| 5. | ಅಯಿಡ್ದ್‌ಲಾ ಪೊರ್ಲು / 5 |
| 6. | ಬಯಲಾಟ / 6 |
| 7. | ಅಜ್ಜೆರ್ ಪಂಡಿನೆಕ್ಕಾದ್ / 7 |
| 8. | ನಾ ದಿನ್ನ ವಾ ತ್ರಾಣ / 8 |
| 9. | ಎಂಚೆಂಚ ಮಾತ ಉಳ್ಳೆ? / 9 |
| 10. | ಜತ್ತೊಂದು ಬರ್ಪಿ ಗೌಜಿ / 10 |
| 11. | ಈ ಸಾರಿ ಪೋವಂದ್ / 11 |
| 12. | ದೇವಕಿನ ಬಂಜಿದ ಮಹಿಮನೆ! / 12 |
| 13. | ತಿಂಗೊಲ್ದ ಲೆಕ್ಕ / 13 |
| 14. | ತೋಜಂದಿ ಕಣ್ಣ್ / 14 |
| 15. | ಮಾತಲಾ ಉಪರಾಟೆ / 15 |
| 16. | ಬಾಲೆದ ಬೊಳ್ಪು /16 |
| 17. | ಪೋವಂದೆ ಬುಡಯೆ / 17 |
| 18. | ಕಪ್ಪು ಸೀರೆ / 18 |
vii
| 19. | ದೇವರೆ ಗುರುತು / 18 |
| 20. | ಯಾನುಳ್ಳೆ / 19 |
| 21. | ಯಾನ್ಲ ಉಳ್ಳೆ / 20 |
| 22. | ಬೊಕ್ಕ ಯಾನಿಜ್ಜೆನ? / 21 |
| 23. | ಯೆನ್ನ ಸಬ್ದನೇ ಯಾವು / 22 |
| 24. | ಮಾತೆರೆನ ಬೇಲೆಗಾದ್ / 23 |
| 25. | ಒಂಜಿ ಒರಿಂದ ಯಾವು... / 24 |
| 26. | ಒಂಜೊಂಜಿ ಕೋಡಿಡ್ ಸೇರಿಗೆ / 25 |
| 27. | ಅಡಿಮೇಲಾಂಡ್ / 26 |
| 28. | ತೀರುವಾ? / 27 |
| 29. | ಬರ್ಪಿ ಗೌಜಿ / 28 |
| 30. | ಪೋವಂದೆ ಆವ? / 29 |
| 31. | ರಡ್ಡೆಕ್ಕ್ಲ ಒಂಜೇ / 30 |
| 32. | ಪಾಲ್ / 30 |
| 33. | ಒರಿಪುನಕುಲು / 31 |
| 34. | ಕೋಪೊಗು ಶಾಪೊ / 32 |
| 35. | ಒಂಜಿ ರವಿ / 33 |
| 36. | ಕುಡ ಕುಡ ಬರುವೊಲು / 33 |
| 37. | ಸಸಾರ ಮಲ್ಪೊಡ್ಚಿ / 34 |
| 38. | ಅಯ್ಟಯ್ಟ್ ಉಳ್ಳೆ / 35 |
| 39. | ಗಾತ ಕೊರುವೆ! / 36 |
| 40. | ಲಟ್ಟ ತಿರ್ಗಾದ್ ಹಾಕ್ಯೆ / 37 |
| 41. | ಇಸ್ಮಯ / 38 |
viii
ದೇವರೆ ಬಣ್ಣ
ದೇವರಾಂಡಲಾ, ಅತ್ತ್ ದೇವರೇ
ಅತ್ತ್ ದೇವೆರಾಯಿನೆಡ್ದೇ
ಬಣ್ಣ ಬಣ್ಣ ಬದಲಿಪುವೆರ್‌ಗೇ
ಒರೊ ಬೊಳ್ದು ಬೊಳ್ದು ಪಿರಾಕ್‌ಡ್
ಬೊಕ್ಕೊ ಬಂಗಾರ್‌ದಲೆಕ್ಕ ಮಂಜೊಲು ಮೆಂಚ್‌ಗೆ
ಬೊಕ್ಕೊ ಬೊಕ್ಕ ರಾವಣೆರ್ನಕ್ಲೆನ್ ಕೆರ್ರ
ಕಲ್ಜಿಗೊಡು ಕಪ್ಪು ಕಪ್ಪು ಕಸ್ತೂರಿ
ಆಯಿಜಿಡಾ ಒರಿವಾ
ಲೋಕೊಡ್ ಕಮ್ಮೆನ?
ತೂವೆರೆ ಬತ್ತೆರ್
ಓಳು ತೂಂಡಲಾ ಪೂತ ರಾಶಿ ರಾಶಿ
ಬೂರೊಂದುಂಡು ಪೊಡಿ ಪೊಡಿ ಬಂಗಾರ್‌ದ ಪೊಡಿ
ಮಿತ್ತಲೋಕೋದಕ್ಲೆನ್ ಕೊಂಬು ಬೆನಿ ಯಾವ?
ಕೈಕಂಜಿ ಮೇಪುನನ ನಡುಟ್ಟು
ಬತ್ತೆಗೆ ಆಯೆ
ನೇ ಆವಂದಿಪ್ಪಯೆ ಆಯೆ
ತೂವೊಂಡುಂದ್ ನಾರದೆರ್ ಪದ ಪನೊಂದು
ಪನೊಂದು ಬನ್ನಗ ಕತ್ತಲೆಕೋಣೆದುಳಯಿಡ್ ತೆಲಿತ್ತೊಂದಿತ್ತೆಗೆ
(ಪತತ್ಯಸಾ ಪುಷ್ಪಮಯೀಚ ವೃಷ್ಟಿಃ...)
ನಡು ನಡುಟ್ಟು
ಒರ ಉಂತುಂಡತ್ತ ಮೊಕ್ಲೆನ ಗಲಾಟೆ
ದೇವೆರೆ - ರಕ್ಕಸೆರೆ ವಿದ್ದ
ಬಾನೊಡೊಂತೆ ಸಬ್ದ ಕೇಣಿಲೆಕ್ಕ ಆಂಡತ್ತ
ಇತ್ತೆ ದೆಪ್ಪುವೆ ಎನ್ನ ವೀಣೆ
ವೇದೊಲೆನ್ ಪಂಡ್ ಪಂಡ್‌ದ
ಉರು ಆನಗ
ನಡು ನಡುಟ್ಟು ಬೋಡತ್ತೆ ಸಬ್ದ?
(ಕ್ಷೀಣೇಷು ದೇವಾಸುರ ವಿಗ್ರಹೇಷು...)
ಪೊರ್ಲು ಪಂಡ
ದಿಂಜಿದಿ ಸಂತೇಸ್
ಕಲಂಕ್‌ ದಾಂತಿ ತಾಮರದಂಚಿನ ಮೋನೆ
ಕಣ್ಣ್ ಬಂಗಾರ್‌ದ ಗೋರಂಟೆದ
ನೆಕ್ಕಿದ ಪೂತ್ತ ಮೈ
ಬೇತೆ ಬೇತೆ ಕುಂಟು ಎಚ್ಚ ಇಜ್ಜಿ ಪದ್ದೈ
ಪೊರ್ಲುದ ಪಾತೆರನೇ ಐತ
ಕಾಡ್‌ದ ದೆತ್ತ್‌ದ್ ಗೊಬ್ಬೊಂದು
ಗಿಲಿಗಿಲಿ ತೆಲ್ತೊಂದುಪ್ಪಿನ
ಹಳ್ಳಿದ ಪೊನ್ಜೆವೆನ ಪೊರ್ಲೇ ಪೊರ್ಲು
(ಏತಾಃ ಪ್ರಪುಲ್ಲಾಃ ಕಮಲೋತ್ಪಲ ವಕ್ರನೇತ್ರಾ...)
ಅಯಿಡ್ದ್‌ಲಾ ಪೊರ್ಲು
ತೂಯರಾ ನಿಕುಲು?
ಪತ್ತ್‌ದೊಯ್ತ್‌ದ ಅಡಿಟ್ಟಿತ್ತಿನ ಕಜವು
ಕಜನೆ ಮಾತ್ರ ಅಡಿಮೇಲ್ಮಲ್ತ್‌ದ್
ಕೆದು ಒರ ಇಡಿ ಗಾಲ್ ಮೇಲ್
ಅಡಿಟಿತ್ತಿ ಮಿತ್ತ್ ಇತ್ತಿ ಓಲೋಲ್ಲಾ
ದಿಂಜೊಂದಿತ್ತಿ ಮರಿಕ್‌ಲೆನ್
ನಾಲಿಡ್ ಪತ್ತ್‌ದ್
ಎಪ್ಪರೊಡುಂತುದು ಪೊರ್ಲ ತೆಲಿಕೆ ತಲ್ಪಿ
ದೇವರೆನ
ದೇವರ್ನಂಚಿ ನರಮಾನಿನ ಉಂತಾಟ
(ದಾಮೋದರೋಯಂ ಪರಿಗೃಹ್ಯನಾಗಂ...)
ಬಯಲಾಟ
ಈತ್ ಕಾಲೊಡ್ಡು ಆ ಕೆದುಟ್ಟಿತ್ತ್‌ದ್
ಜನಕುಲೆ ನೆತ್ತ‌ರ್ ಪರೊಂದು
ಪೋಡಿಪಾವೊಂದು ಮೆರೆವೊಂದಿತ್ತಿ
ಐನೈನ್ ಜಿಡೆತ್ತ
ಕಡ್ಪುದ ನಾಗನ್
ಕೈಕಂಜಿ ಮೇಪಿ ಬಾಲೆ
ಹದ ಮಲ್ತ್‌ದ್ ಅಮರ್ತ್ದ್ ಜಿಡೆ
ಸುದ್ದಿ ಸುಲೇಕದಾಂತಿ
ಲೆಕ್ಕ ಮಲ್ತಿ ಗೊಬ್ಬು ಉಂದು ವಾ ಆಟ
ನೆಡ್ದ್ ಮಲ್ಲ ಬಯಲಾಟ ವೊವು?
(ನಿರ್ಭರ್ತ್ಸ್ಯಕಾಲಿಯಮಿದಂ ಪರಿವಿಸ್ಫುರಂತಂ...)
ಅಜ್ಜೆರ್ ಪಂಡಿನೆಕ್ಕಾದ್
ಅಜ್ಜೆ ಪಂಡ ಆಂಡ್ ಎಂಕ್ ಆತೊಂಜಿ ಬಗ್ತಿ
ವೋಳೋಳು ಉಂಡಾ ನ್ಯಾಯೊಗಾದ್ ತತ್ತ್ವೊಗಾದ್
ಬೆನ್ಪುನಕ್ಲು ಅಂಚಿತ್ತಿ ಕಾಡುಲು ನಾಡುಲು
ಮಾತ ಎಂಕ್ ಎನ್ನವೇ ಊರು ಎನ್ನವೇ ತೋಟ
ಅಂಚನೇ
ಸಬ್ದ ಲಕ್ಕಾವುನ ಪಂಡ ಸಂಗೀತದ
ಅತ್ತಂಡ ಅಯ್ಟಯ್ಟೆ
ಲಡಾಯಿ ಮಲ್ಪಾದ್ ಚಟ್ಟ್ ದೆಪ್ಪೆರೆ
ಬಂಙ ಕೊರ್ಪಿ ಬಂಙದಕ್‌ಲೆನ್
ರಡ್ಡ್‌ಲಾ ಕೊಸಿಯೇ ಎಂಕ್ ದಾಲ
ಬೇಜರಿಜ್ಜಿ
ಬೊಕ್ಕೊಂಜಿ ಪನ್ಪೆ
ಎಡ್ಡೆ ಸಂಗೀತ ಮಲ್ಪೆರೆಂಚ
ಬಂಙನ ಆತೇ
ಬಂಙ ಎಡ್ಡೆಂದಿ ಒಂಜಿ
ಲಡಾಯಿ ಮಲ್ಪವರಲಾ
ಅಜ್ಜೆ ಪಂಡಿನೆಕ್ಕಾದ್, ಉಪಾಯ ಇಜ್ಜಿ
(ಭಕ್ತಿ: ಪರಾ ಮಮ ಪಿತಾಮಹಭಾಷಿತೇಷು...)
ಅಜ್ಜೆ: ನಾರದೆರೆ ಅಜ್ಜೆ ವಿಷ್ಣು
ವಾ ದಿನ್ನ ವಾ ತ್ರಾಣ
ಬೋಡು ಒರಿ
ಆಯಗ್ ಮಾತ್ರ ತೀರು
ಲೋಕ ಲೋಕೊಳೆಗೆ ಅಬಯ ಕೊರ್ಯೆರೆ
ಕೈಟ್ಟ್ ಪತ್ತೆರೆ ಗರ ಗರ ಗರ
ಉಂತಂದೆ ತಿರ್ಗು ಕಾಲಚಕ್ರ
ಅಂಚಿತ್ತನೆಯನ್
ತುಂಬ್ಯೊಳತ್ತ ಮೋಲು ದೇವಕಿ
ಆಪಂಡಾ ವಾ ದಿಣ್ಣ
ಅವ್ವನ್ ತುಂಬೆರೆ ವಾ ತ್ರಾಣ?
(ಲೋಕಾನಾಭಯಕರಂ)
ಎಂಚೆಂಚ ಮಾತ ಉಳ್ಳೆ?
ನಾರಾಯಣ ನಾರಾಯಣ ಬಲ್ಯಪ್ಪ
ಇಂಬ್ಯನ ಸಂಗತಿ ಪನ್ಯರೆ
ದೇವೆರಾಂಡಲ ಇಪ್ಪುನು ನರಮಾನಿನ ನಡುಟೇ
ಆ ಲೋಕೊಡಿತ್ತ್ಂಡಲಾ ಈ ಲೋಕದ ಯತೆಗೆ
ಲೋಕನೇ ಆಯನ ಮೊನೆಗೇ
ನಂಬಿನಯಗ್ ಲೋಕ ಇಜ್ಜಿಗೆ
ರಾಮ ರಾಮಾ
ರಾವಣನ್ ಬಲಿನ್ ಬಲಿದೆತ್ತೆಗೆ
ಬಾರೀ ಬೀರೆಗೆ
ಬೀರ ಪಂಡನೆ ಆಯೆ ಮಾತ್ರಗೆ
ಅಪಂಡ ನರಮಾನ್ಯನ ನಮಸ್ಕಾರ
ಒಡೆಗ್ ಯಾವು?
(ನಾರಾಯಣಾಯ ನರಲೋಕ ಪರಾಯಣಾಯ...)
ಜತ್ತೊಂದು ಬರ್ಪಿ ಗೌಜಿ
ವಾ ಮೆಂಚ್ ಕಣ್ಣ್ ಕಣ್ಣ್ ಹಾಕುನ ಬೊಳ್ಪು
ವಾ ತೆಡಿಲ್ ವಾ ಗಾಳಿ ವಾ ಲೋಕದವಾ?
ಬರ್ಸ ಪಂಡ ವಾಬರ್ಸ ಉಂದು ಬರ್ಸನ
ಬಾನ ಬೊಬ್ಬೆನ
ಲೋಕೊಡು ಮಾತ ಗಡಗಡ
ಮಲ್ಪಿನಕ್ಲೆಗ್ ಗಡಗಡ ಚಳಿ
ಪುಟ್ಟಾಯರೆಗಾದ್
ಪುಟ್ಟೊಂದು ಬರೊಂದುಳ್ಳೆಗೆ
ಜತ್ತೊಂದುಳ್ಳೆಗೆ
ಅಯ್ತನೇ ಗಡ್ಡ್‌ದ ವಾದ್ಯ ಉಂದು ಮಾತ
(ಭ್ರಮತಿ ನಭಸಿ ವಿದ್ಯುತ್‌ಚಂಡ ವಾತಾನುವಿದ್ದೈ...)
ಈ ಸಾರಿ ಪೋವಂದ್
ಆಜಿ ಜೋಕ್ಲೆನ್ ಕಳೆವೊಂದು
ಆ ಕಣ್ಣನೀರ್‌ದ ಕಡಲ್‌‌ಡ್ದೇ
ಬತ್ತಿಲೆಕ್ಕ ಬರ್ಪಳ್
ಏಳನೆದವು ಅಂಚ ಪೋವಂದ್
ಬುಡಯೆರ್
ಬುಡುದು ಪಾಡಯೆರ್ ದೇವೆರ್ಂದ್
ಗೆಂತೊಂದು ದೈರೊಡು
ತೋಜಿದಿ ಲಚ್ಚಣಡ್ ಆಸೆ ಬೊಕ್ಕಲ
ಕೊಡಿತ್ತ್ಂಡ್
ಗೊತ್ತಿಜ್ಜಂದೆ ದೇವೆರೆನೇ
ತುಂಬೊಂದು
ಬತ್ತಲತ್ತ ದೇವಕ್ಯಮ್ಮ
ಈ ಸಾರಿ ಪೋವಂದ್
ಪೋಂಡ ಈ ಸಾರಿ
ಆಯೆನೇ
ಈತ್‌ಜೊಕ್ಲನ್ ದೆತ್ತ್‌ನಾಯೆ
(ಅಗಣಿತ ಪರಿಖೇದಾ ಯಾತಿ ಷಣ್ಣಾಂ ಸುತಾನಾಂ...)
ದೇವಕಿನ ಬಂಜಿದ ಮಹಿಮೆನೆ!
ಲೋಕೊಡಿತ್ತ್‌ನ ದಾಂತಿನ ವಾ ವಾ ಗುಡ್ಡೆಲು
ನೀರುಲು ಮಣ್ಣುಲು ಮರಕ್ಕುಳು
ಬೊಕ್ಕ ಒವ್ವೊವು ಉಂಡ ಇಜ್ಜ
ಅರ್ಥ ಆಂಡತ್ತ
ಮಾತೆನ್ ಕೂಟುದು
ಮಾತೆನ್ ಬಿರಾದ್ ಸೇರಾದ್
ಮಲ್ತಿನ ಒಂಜಿ ರಾಶಿ
ಅವು ವಾ ತೂಕ ವಾ ದಿಣ್ಣ
ಅವ್ವೆನ್‌ಬಾಲೆ ಮಲ್ತ‌ದ್
ಒಂರ್ಬ ತಿಂಗೊಳು ಬಂಜಿಡ್
ದೀವೊಂಡಳತ್ತ
ಎಂಚಿನ ಅವು
ಅರ್ತ ಆವಾ ಎಂಕಲೆಗ್
ಅತ್ತ್ ಆಲೆಗೇ
ಅತ್ತ್ ಆ ದೇವೆರೆಗಾಂಡಲಾ?
(ವಿಂಧ್ಯಮಂದಾರ ಸಾರೋಯಂ...)
ತಿಂಗೊಲ್ದ ಲೆಕ್ಕ
ಸರ್ರ ಒಂಜಿ ಕೋಡಿಗ್
ಮನಸ್ಸ್ ಒಂಜಿ ಕೋಡಿಗ್
ಬುದ್ದಿ ಬೊಕ್ಕೊಂಜಿ ಕೋಡಿಗ್
ಅಂಚಿ ಇಂಚಿ ಆವೊಂದು
ಅಲ್ಮಾನೊಡು ಬತ್ತೊಲ್ ದೇವಕಿ
ತಿಂಗೊಳು ಬಾನೊಡ್ ಒಂಜಿ
ನೀರ್‌ಡ್ ಒಂಜಿ
ಅತ್ತ್
ಏತೇತೋ ತೋಜುಜ? ಅಂಚನಿ
ಪಂಡ
ಅಪ್ಪೆ ಪಂಡ ಮಾತ ಅಪ್ಪೆನಕುಲು
ಅಂಚನಿ ಅತ್ತ?
(ಹೃದಯೇನೇಹ ತತ್ರಾ೦ಗೈ ದ್ವಿಧಾಭೂತೇವ...)
ತೋಜಂದಿ ಕಣ್ಣ್
ಕತ್ತಲೆ ಪಂಡ ಕರ್ಗಂಡ ಕತ್ತಲೆ
ಮೈಯ್ಕ್ ಮಾತ ಮಜ್ಜಿದ ರಾಶಿ ಪತ್ತಿಲೆಕ
ಅತ್ತ್ ಮಜ್ಜಿದ ಪೊಡಿಟ್ಟೇ ಮುರ್ಕಾಯಿಲೆಕ
ಅಕ್ಕಸೊಡ್ಡು ದೊರಿ ದೊರಿದ್ ಬೂರ್ಲೆಕ
ಮೈಂದ್‌ದ ರಾಶಿ ರಾಶಿ
ಪಾಡಿಲೆಕ
ಈ ಕತ್ತಲೆ ಇಪ್ಪುನಗ
ತೋಜಂದ್
ಪಿರೆಜನ ಇಜ್ಜಿ ಕಣ್ಣ್
ಮೂರ್ಖೆರೆಗ್ ಮಲ್ತಿನ ಉಪಕಾರದ ಲೆಕ
ಬಾಸೆದಾಂತಿ ದನಿಕ್ ಚಾಕ್ರಿ ಮಲ್ತಿಲೆಕ
(ವಿಲಿಂಪತೀವ ತಮೊಂಗಾನಿ...)'
ಮಾತಲಾ ಉಪರಾಟೆ
ವಾ ಬರಿ ತೂಂಡಲಾ ಅಂಚಿಂಚಿ
ಮೂಡಾಯಿ ಪಡ್ಡಾಯಿ ಅದ್
ಬಡಕಾಯಿ ತೆನ್ನಾಯಿ
ಮಾತ ಕೋಡಿಡ್‌ಲ
ಬೊಲ್ಪಿಜ್ಜಿ ಉಲ್ಲಾಸ ಇಜ್ಜಿ
ಪುರ್ಕಾಸ್ ಮಾಯಕ
ಮರಕ್ಕುಲು ಮಾತ ಮರಕಟ್ಟ್‌ದ್ ಕುತ್ತ
ದುಂಪೋವರ್ಲತ್ತ್, ಉಂತರ್ಲತ್ತ್
ಮಿತ್ತ್‌ದ ತಿರ್ತ್ ಆತ್ಂಡ್
ತಿರ್ತಿಪ್ಪೊಡಯಿನ ಮಿತ್ತ್ ಕುಲ್ಲುದುಂಡು
ಎಲಕತೆನೆ
ಭವುಶ್ಯ ಆಯೆ ಬರೆರೆ ದುಂಬು
ಒರ ಇಂಚ ಮಾತ
ಉಪ್ರಾಟಿ ಆಪುಂಡ ದಾನ್ನ
(ಅಪ್ರಕಾಶಾ ಇವ ದಿಶಾ...)
ಬಾಲೆದ ಬೊಳ್ಪು
ಇಂಚ ಮಾತ್ರ ಒಂಜೆಕೊಂಜಿ ಆನಗ
ಮಲ್ಲೊಡು ದಾನೆ
ಎಂಚ ಕಾರ್ ದೀಪಿನೊಡೆಗ್
ವಾ ದಿಕ್ಕ್‌ಗ್ಂದ್
ಎಂಕ್ಲೆಗ್ ಮಲ್ಲೆಕ್ಲೆಗ್ ಗಜಿಬಿಜಿ
ಆನಗಾನಗ
ಆಡೇಗೆ
ಆಲಾ ಬಾಲೆದ ಬೊಳ್ಪು
ಬಾಲೆ ಕೊರ್ತಿನ ಸಾದಿ
ಪೊಸಬ್ಬೆರೆನ ಪೊಸ ಸಾದಿ
ಜಗ್ಗ ಅಂದ್ ಸಾದಿ ತೋಜಾಂಡ್
(ತಮಸಾ ಸಂವೃತೇ ಲೋಕೇ...)
ಪೋವಂದೆ ಬುಡಯೆ
ಈ ಮಲ್ಲ ಸುದೆ ಬಾರೀ ಬೊಳ್ಳ
ವಾ ಒಯ್ಲ್ ಒಯ್ಪಿ ರವಸ್ಸ
ಅಯಿತ್ತ ಇಡೆಟ್ಸ್ ಉಚ್ಚುಲು ಮುದಲೆಲು
ಅಯ್ಯಮ್ಮ
ಒಂಜೆದ್ದೊಂಜಿ ಬಲ
ನೀರ್‌ದ ತೆರೆ ನುರೆ
ಆಂಡಲಾ ಬುಡಯ
ಅಂಚಿಗ್ ಪೋವಂದೆ ಬುಡಯೆ
ಕೈಟ್ ಪತೊಂದೆ ದೇವರೆನ್
ಬಾಲೆನ್
ಅತ್ ಬಾಲೆ ದೇವೆರೆನ್
ಅಯಗ್ ಎನ್ನ ಕೈ
ಪತ್ತಂದೆ ಸಾದಿ ಇಜ್ಜಿ
(ಇಮಾಂ ನದೀಂ ಗ್ರಾಹ ಭುಜಂಗ ಸಂಕುಲಾಂ...)
ಕಪ್ಪು ಸೀರೆ
ತಿಂಗೊಳ್ದ ಬೊಲ್ದುದಾಂತಿ ಇ‌ರ್ಲ್
ದಾಂತೆಲಾ ತೋಜುಬಿ ಪರೆಲ್ಲ್‌ದ ಲೆಕ
ಅರ್ದ ಕಣ್ಣ್ ಬುಲಾದ್
ನೀಲಿದ ಕಪ್ಪುದ ನೀಲಿಕಪ್ಪುದ
ಸೀರೆ ರಾಕಿ ಸುತ್ತ್‌ದಿ
ಕೈಕಂಜಿ ಮೇಪುನಲೆ ಲೆಕ
ತೋಜುಂಡು ಈ ಇ‌ರ್ಲ್
ಬರ್ಪೆನಾ ಅಂದ್ ಒರಿ ಕಪ್ಪುದಾಯೆ
ಕಪ್ಪುಡ್ದೇ ಬೊಲ್ಡ್‌ದ ಬೊಲ್ಪುನ್
ಕನಪ್ಪುನಾಯೆ
(ದುರ್ದಿನ ವಿನಷ್ಟ ಜ್ಯೋತ್ಸಾ...)
ದೇವರೆ ಗುರುತು
ಇತ್ತ್ಂಡ ತರೆಟ್ಸ್ ಎನ್ನ ಕಾರ್‌ದ ಅಚ್ಚಿ
ವಾ ಗರುಡೆಲಾ ವಾ ಬೂತೊಲಾ ದಾಲ ಮಲ್ಪಂದೆ
ಅಬಯ ಕೊರು
(ಮಮ ಪಾದೇನ ನಾಗೇಂದ್ರ...)
ಯಾನುಳ್ಳೆ
ಯಾನುಳ್ಳೆ ಪೋಡ್ಯೊಡ್ದಿ ಪಕ್ಕಿ ಪಕ್ಕೀಂದ್
ಎಲ್ಯ ಮಲ್ಪೊಡ್ಚಿ
ಆಯನ್ ಯಾನೇ ತುಂಬುನಯೆ
ಆಯೆ ಎನನ್ ತುಂಬುದೆ ಮಂಡೆಡ್
ಇತ್ತೆಲ ಬುಡಯೆ
ಯೇಪಲ ಬುಡಯೆ
ತುಂಬೊಂದೇ ಪೋವೆ
ಒಡೆಮುಟ್ಟಲ ಒಯ್ನ್‌ಲಾ
ಇತ್ತ್‌ನೈನ್ಲಾ ಸೈತ್ತ್‌ನೈನ್ಲ
ದಾಂತಿನೆಲ್ಲ
ಆನಿ ತುಂಬುದಿಜೆನ ಯಾನ್
ದೇವೆರೆನ್
ಮಲ್ಲ ಮಲ್ಲ ವಿದ್ದೊಡು
ಆರೇ ಕೊರಿನ ಸಗ್ತಿಡೇ
ಅಪಂಡಾ
ಕೊರ್ನಯಡ ಕಡಮೆ ಆವ?
ಆಂಡಲಾ
ದೆತೊನ್ನಯಡ ಮುಗಿದ್ ಪೋವ?
(ಅಹಂ ಸುಪರ್ಣೋಗರುಡೋ ಮಹಾಜವ...)
ಯಾನ್ಲ ಉಳ್ಳೆ
ಏನ್‌ಲಾ ಉಳ್ಳೆ ಒಡೆಮಟ್ಟಲಾ
ಮದ್ಯನದ ದೊಂಬುದ ಲೆಕ್ಕ
ಉರಿ ಉರಿ ಗಿರ್ರನೆ ತೂ
ಒಂಜೊಂಜಿ ಕಾಲೊಡ್‌ಲ
ಎಂಚೆಂಚಿನಕ್ಲೆನ್
ನುರಿಪ್ಪಾದ್ ನುಂಗಾದ್
ಚಟ್ಟ್‌ದೆತ್ತನಾಯೆ ಯಾನೇ
ಪಂಡ ಆರೆನ ಕೈಟ್ ಇತ್ತದ್
ಗೊತ್ತಾಂಡ?
(ಚಕ್ರೋ ಕೃಷ್ಣಸ್ಯ ಕರಾಗ್ರ ಶೋಭೀ...)
ಬೊಕ್ಕ ಯಾನಿಜ್ಜೆನ?
ಬೊಕ್ಕ ನಡುಟ್ಟು ಯಾನಿಜ್ಜೆನ
ದೇವರೇ ಕೈ ಪತ್ತಿನ
ಪೊಣ್ಣಲೆಕ್ಕ ಇತ್ತಿನ ಆಣ್ಜೊವು
ಜುವೊ ಜುವೊ
ಎಡ್ಡೆಡ್ಡೆ ಬೇಲೆಗಡ್ಡಡ್ಡ ಬತ್ತಿನ
ಮಲ್ಲ ಮಲ್ಲ ಪೆಟ್ಟ್‌ದಕ್ಲೆನ್
ಪಿರಾಣಿಳೆನ್
ಮಾತ ಒಂಜೆನ್ಲಾ ಬುಡಂದೆ
ರಟ್ಟಾದೆ
ಒಲ್ತು ಒಡೆಮುಟ್ಟ
(ಶಾಂರ್ಗೋಸ್ಮಿ ವಿಷ್ಣುಕರಲಗ್ನ ಸುವೃತ್ತಮಧ್ಯಾ...)
ಯೆನ್ನ ಸಬ್ದನೇ ಯಾವು
ಪೇರ್‌ದ ಕಡಲ್‌ಡ್ದ್ ಬತ್ತಿ ಸಬ್ದ
ಬಜಿ ಶಂಕ ಅತ್ತ್
ಅವು ಉಡಲ್‌ದ
ನ್ಯಾಯನೀತಿದ
ಲೋಕ ಲೋಕದ ಜ್ಞಾನೊದ
ಸಂಕ
ಈ ಸಂಕ ದಾಂಟ್ಯರೆ ಬಲ್ಲಿ
ಓಂಕಾರ ಒಂಜೇ ಯಾವು
ದುರ್ಬುದ್ದಿಲು ಮಾತ ಏತೇ ಬರಡ್
ಕೇಂಡ ಯಾವು ಪದ್ರಾಡ್
(ಅಹಂ ಹಿ ಶಂಖ: ಕ್ಷೀರೋದಾದ್ವಿಷ್ಣುನಾ...)'
ಮಾತೆರೆನ ಬೇಲೆಗಾದ್
ಆಯಿನವು ಆವರಿತ್ತಿನವು
ಆವಾರಗೇ ಬಲ್ಲಿಂದಿತ್ತಿನವು
ಯತೇತೋ ಉಂಡು
ಅರ್ತೊಗು ಅನರ್ತ ಆವಂದಿಲೆಕ್ಕ
ದೇವರಾವಡ್ ಒಂತೆ ಹಗುರ
ಪೂಡ್ದ್‌ಲಾ ಹಗುರ
ಮಲ್ಲ ಮಲ್ಲ ಮಾತ ಬೊಡ್ಡಿ
ಎಲ್ಯ ಎಲ್ಯ ಆದ್ ಬೊಕ್ಕ ಮಲ್ಲ ಆಲೆ
ಮಲ್ಲ ಮಲ್ಲ ಇತ್ತಿನೆನ್ ಮಾತ ತೋಜಲೆ
ದಿನ್ನ ತಡತೊನೆರ ಬಲ್ಲಿ ನರಮಾನಿಗ್
ಹಗುರ ಹಗುರ ಆ
ದಿನ್ನದ ಪ್ರಸಾದೊನು
ಕೊರ್ಲೆ ಕೊರ್ಪಾಲೆ
ಮಾತೆರೆ ಬೇಲೆಗಾದ್
(ಕಾರ್ಯಾಣ್ಯಕಾರಮರಾಸುರಾಣಾಂ...)
ದಿನ ಇತ್ತಿಲೆಕ ದಿನ ಇಪ್ಪುಜಿ
ಇನಿತ್ತಲೆಕ ಎಲ್ಲೆ ಇಪ್ಪಂದ್
ದಿನ ಬರು ಎಡ್ಡೆ
ದಿನ ಪೋವು
ಆಂಡಲಾ
ಪೊತ್ತುದು ಪೋಯಿನೆ ಎಡ್ಡೆಪು
ಪೂರಾ ಪೋದಿಪ್ಪಂದ್ಂದ್
ಎಡ್ಡೆ ಮನಸ್ಸ್ ಒಂಜಿ
ದೀದ್
ಒರಿಪಾಂಡ ಯಾವು
ಅವು ಆವು
ದುಂಬುಗೊಂಜಿ ಮಾಮಲ್ಲ
ಮರಕ್ಕೊಂಜಿ
ಬೀಜ
(ಜಾನೇನಿತ್ಯಂ ತ್ವಾಂ ಪ್ರಕೃತ್ಯಾ...)
ಒಂಜೊಂಜಿ ಕೋಡಿಡ್ ಸೇರಿಗೆ
ಒಂಜಿ ಇಲ್ಲಡ್ ಪೇರ್
ಒಂಜಿ ಇಲ್ಲಡ್ ಕೊಜಪ್ಪು
ಬೊಕ್ಕೊಂಜೆಟ್ಟ್ ಬೊಳ್ನೈ
ನುಪ್ಪು ಪಾಯಸ
ಅಲೆ
ಇಂಚ ಸೇರ್‌ದ್‌ ಸೇರ್‌ದ್‌
ಊರೊರ್ಮೆದ
ಸೇರಿಗೆಡ್
ಆವೆ ಇಂಬ್ಯೆ
ಮಾತೆರೆನ ಬಾಲೆ
ಬಾಲೆಲೆಗ್ ಮಾತ
ಅರಸು
ಈ ಬಾಲೆ
(ಏಕೇಸ್ಮಿನ್ ಗೇಹೇ ಗಾ ಕ್ಷೀರಂ...)
ಅಡಿಮೇಲಾಂಡ್
ಉಂತುದಿ ನೆಲನೇ ಗಡಗಡ
ಮಿತ್ತ ಮಾಡ್ ಮಾಳಿಗೆಲು ದಡಬಡ
ಕಡಲ್‌‌ದ ಮುಗಿಯಂದಿ ಅಲೆತ್ತ ನುರೆ
ಓಡೊಡೆಗೋ ರಟ್ಟ್ಂಡ್ ಓಡ
ಉಂದು ವಾ ಲಚ್ಚಣ?
ಎಡ್ಡೆನಾ ಹಾಳಾ
ನನ ಸರಿಯಾವಾ? ದಾನ್ನ
(ಯನ್ನೇದಿನೀ ಪ್ರಚಲಿತಾ ಪತಿತಾಗ್ರಹರ್ಮ್ಯಾ...)
ತೀರುವಾ?
ಗಟ್ಟಿಕಲ್ಲುಳು ಬಂಗಾರ್ ಕರ್ಬ ರಾಶಿ ರಾಶಿ
ಗುಡ್ಡೆ ಗುಡ್ಡೆದ ಸಾಲ್ ಸೇರಿಗೆದ
ಪರ್ವತೊನು ಕಕೈದ ರೆಂಕೆದ ಗಾಳಿ
ನಡ್‌ಗಾವ?
ಬಾರಿ ಬಾರಿ ಮುದಲೆ ಮೀನ್ ಉಚ್ಚುಲು
ಉಪ್ಪುನೀರ್‌ದ ರಾಶಿ ರಾಶಿ
ಇತ್ತಿ ಕಡಲ್‌ನ್ ಕೈನೀ‌ರ್
ತೀರುವಾ?
(ಸೌವರ್ಣಕಾಂತ ತರಕಂದ ಕೂಟ ಕುಂಜಂ...)
ಬರ್ಪಿ ಗೌಜಿ
ಏಪೊಲಾ ಏಪೊಡ್ದ್‌ಲಾ ಬಾನೊಡೇ ಇಪ್ಪಿನೊಂಜಿ
ಮಾಮಲ್ಲ ಬೂತೊ
ಊರುದೊಂಜಿ ಕೆಲಸೊಗ್ ಜತ್ತ್‌ದ್ ಈ ಲೋಕೊಗು
ಬನ್ನಗ ಈತ್‌ಮಾತ ಒಂಜಿ ಗೌಜಿ
ವಾದ್ಯನಗಾರಿ ದುರುಸು
ಬೋಡೇ ಬೋಡು
ಅತ್ತ್ ಅವು ಇಪ್ಪುನವೇ
ಅವು ಪೋನಗ ಮಾತ್ರ
ಉಂಡತ್ತೇ
ಅಂಚ ಮಾತ ಇಜ್ಜಿ
ಪೋಯಿ ಬೊಕ್ಕ ಮಾತ್ರ
(ಭೂತಂ ನಭಾಸ್ಥಲನಿವಾಸಿ ನರೇಂದ್ರನಿತ್ಯಂ...)
ಪೋವಂದೆ ಆವ?
ಆಜಿ ಬಲಿ ಕೊರ್ದು
ದಾತ್ ದಾಂತೆ
ಬಸ ಇಜ್ಜಂದೆ
ಸೋತ್ ಸೋತ್‌ದ
ಕುಡ ಕುಡಲಾ
ದೊಂಕ್‌ದ್‌ ಹಳಿ ಹಂತಾರ
ಮಲ್ತ್‌ನಾಯನ
ಬಾಕಿಲ್‌ಗೇ ಪೋವೊಡೇ
ಪೋವಂದೆ ಆವಾ
ಬದ್ಕೊಡತ್ತೆ?
(ಷಣ್ಲಾಂ ಸುತಾನಾಂ ಸಮವೇತ್ಯನಾಶಂ...)
ರಡ್ಡೆಕ್ಕ್ಲ ಒಂಜೇ
ಪೋಡಿಗೆ ಆಂಡಲಾ ಅರಸು ಇಲ್ಲೇ ಗತಿ
ಪೋಡಿಗೆ ಇಜ್ಜಂಡಲಾ ಅಡೆಗೇ
ಪೋವೊಡುಗೆ ಉಲ್ಲಾಸ್‌‌ಡ್
ಅಂಚಂಡಲಾ ಇಂಚಂಡಲಾ
ರಡ್ಡೆಕ್ಕ್‌ಲಾ ಒಂಜೇಗತಿ
ಪಾಪದಾಯಗ್
(ಸ್ಮರತಾಪಿ ಭಯಂ ರಾಜಾ, ಭಯಂ ನಾ ಸ್ಮರತಾಪಿವಾ...)
ಪಾಲ್
ಒಂಜಿ ನೆಲಕ್ಕ್ ಒಂಜಿ ಬಾನೊಗು
ಒಂಜೆತ್ತನೇ ರಡ್ಜ್ ತುಂಡಾಂಡಲ
ಸಾದಿದ ಮೈಮೆ ಬೇತೆನೇ
ಯಾನ್ ಕಡ್ತಿನವು ಕತ್ತಿ ಬಿರು ಕಡ್ತಲೆ ಕುಡಾರಿ
ಪತೊಂದೆನ್ನನೇ
ಪೋಡಿಪಾವೊಂದು ಬರ್ಪುಂಡು
(ಏಕಾಂಶಃ ಪತಿತೋ ಭೂಮೇ...)
ಒರಿಪುನಕುಲು
ಗೊತ್ತುಂಡೆಂಕ್ ಯೇಪಲಾ ಈ
ಸುಬಾವೊಡೇ ಅರ್ತಿದಾಯೆಂದ್
ಅಂಚ ಕೆಲವೆರೆಗ್ ಎಡ್ಡೆಪ್ಪು ಪನ್ನುನವು
ಮಲ್ತೊಂದಿಪಿನವತ್ತ್
ಇತ್ತಿನವೇ
ಇಂಚಿತ್ತಿನಕುಲೇ ಆಪೊತ್ತುದ ಕಾಲೊಡು
ಒಂಜಿ ಇಲ್ಲದ ದೇಸೊದ
ಬಿತ್ತೇ ಪೊತುದು ಪೋಪಿ
ಸಂಕಟೊಗ್ ತರೆಕೊರ್ದು
ಯೆಂಚಂಡಲಾ ಅವ್ವೇನ್ ಉಳತ್ತುಳಯಿ
ಬಂಗೊಡು ಒರಿಪಾವೊಂದು ಸಾಂಕ್‌‍ದ್
ರಕ್ಷಣೆ ಮಲ್ಟಿನಕುಲು
ಬೋಡು ಯೇಪಲ
ನಿನ್ನಂಚಿನಕುಲು
(ಜಾನೇ ನಿತ್ಯಂ ವತ್ಸಲಂ ತ್ವಾಂ ಪ್ರಕೃತ್ಯಾ...)
ಕೋಪೊಗು ಶಾಪೊ
ಎನ್ನ ಎದ್‌‌ರ್‌ಗ್ ಯೇರುಂಡು
ಯಾನ್ ಪಂಡಿಲೆಕ್ಕೊನೇ ನಡಪುಂಡು ಮಾತಾ
ಯಾನ್ ಪಂಡಿಲೆಕ್ಕೊನೆ ಉಳ್ಳ ಮಲ್ಲ ಮಲ್ಲಕ್ಲು
ವಾಮಲ್ಲ ಸಂಗತಿ?
ಕೊಂಡು ಪೋಪುನಯನೇ
ಯೇರ್ ಆಯ್ ಅಂದ್ ಕೇನ್ವೆ
ಪಣ್ಣಗನೇ
ಕೈಟ್ಟ್ ಮೆಂಚಿ ತೆಡಿಲ್ ಪತೊಂದು
ಕರಿಕಪ್ಪು ಮಜ್ಜಿದ ರಾಶಿ
ಪೊತ್ತೊಂದು ಬತ್ತ್ಂಡ್ ಮಸಣ
(ಕ್ರೋಧೇನ ನಶ್ಯತಿ ಸದಾ... ಸ್ಮಶಾನ ಮಧ್ಯಾದಹಮಾಗತೋಸ್ಮಿ...)
ಒಂಜಿ ರವಿ
ಭೂಮಿಗ್ ಬತ್ತ್ಂಡ್, ಅತ್ತ್ ಇತ್ತ್ಂಡ್
ಒಂಜಿ ಮಿತ್ತಲೋಕೊಡುಂಡು
ಕಂಸೆರೆನ್ ಚಟ್ಟ್ ದೆಪ್ಪರಾ
ಬೇತೆ ಬೇತೆ ಹತ್ಯಾರಿ ಪತೊಂದು
ಅಪಗಪಗ ಬರು
ಶುಂಬೆ ನಿಶುಂಬೆ ಗೋಣೆ ಮಾತ ಪೋಯೆರ್
ಈ ಸಾರಿ ಕಪ್ಪುದಯನ ಒಟ್ಟುಗು
ಜತ್ತ್‌ದ್ ಬತ್ತ್‌ದ್
ಮುಗಿಪೆರೆಗುಂಡು ಮೊಕ್ಲೆನ ಅಬತ್ತಾರ
(ಏಕಾಂಶಃ ಪತಿತೋ ಭೂಮೇ... ಶುಭಂ ನಿಶುಂಭಂ...)
ರವಿ-ತುಣುಕು, ಶಾಖ, ತುಂಡು
ಕುಡ ಕುಡ ಬರುವೊಲು
ಸೈತ್ತಿನಾಲಂಡಲಾ ಜೂವೊ ಜೂವೊ
ಕುಡ ಕುಡ ಬರುವೊಲು
ಜೋಕ್ಲೆನ ಮೈಮೆಡ್ ಬದ್‌ಕ್‌‌ದ್ ಉಂತುವೊಲು
ದಾನೆ ಮಲ್ತ್ಂಡಲಾ
ಅಪ್ಪೆನ್ಪಿನೆನ್ ಕೆರ್ಯರ ಆವ?
(ದಾರಿಕೇಯಂ ಮೃತಾಪೂರ್ವಂ ಪುನರೇವ...)
ಸಸಾರ ಮಲ್ಪೊಡ್ಚಿ
ಯಾನತ್ತ್ ಕಿಷ್ಣಸರ್ಪೆ ತುಚ್ಂಡ ವಾವಾ ರಕ್ಕಸೆಲಾ ಸೈಪೆ
ಈಸರ ದೇವೆರೆ ಬಾಲೆ ಕೆರ್ತಿಜೆನ
ತಪ್ಪೆ ಕಿರೀಟದಕ್ಲೆನ್
ಉಳಿತ್ತ ಒಂಜಿ ನಿನೆ ಯಾವಂದಾ
ಸಪಾಯಿ ಮಲ್ಪೆರೆ
ವೇಷ ಮಲ್ತೊಂದು ಬತ್ತ್ಂಡ
ಗುಮ್ಮೆ ಅಮ್ಮೆ ಆವ?
(ಕಿಂ ದಷ್ಟಂ ಕೃಷ್ಣ ಸರ್ಪೇಣಾ...
ಅಪೀದಂ ಶೃಣು ಮೂರ್ಖ ತ್ವಂ...)
ಅಯ್ಟಯ್ಟ್ ಉಳ್ಳೆ
ಪಾಪದಕ್ಲೆನ್ ಅಮರ್ತ್ದ್
ಮಲ್ಲ ಮಲ್ಲ ಕಂಸೆರಾದ್
ಅರೆಮರ್ಲೆರೆನ್
ಒಟ್ಟುಗು ತೈನಾತಿ ದೀವೊಂದು
ಓಲೋಲು ಬುದ್ದಿ ತೋಜಾಪೆರೋ
ಆಡೆ ಮಾತ
ಬರ್ವೆ ಗಾಳಿಯಾದ್ ಚಕ್ರ ಚಕ್ರ
ತಿರ್ಗಾದ್ ಗದೆತ ಶಬ್ದ ಶಂಕ
ಆದ್ ನಡ್‌ಗಾದ್ ಕೆರ್ವೆ
(ಗಿರಿತಟ ಕಠಿನಾಂಸಾವೇವ...
ರುದ್ರೋ ವಾಯಂ ಭವೇಚ್ಚಕ್ರೋ ಯತ್ರ ಯತ್ರ..)
ಗಾತ ಕೊರುವೆ!
ಗೊತ್ತುಂಡೆಂಕ್ ಹಳ್ಳಿಡ್ ಹಳ್ಳಿ ಹಳ್ಳಿಡ್
ತಯಾರಾತೆಗೆ ಒರಿ ಒರ್ಯೊರಿ
ಕೈಕಂಜಿ ಮೇಪೆಲೆಗೆ ಕಪ್ಪುದಾಯೆಗೆ
ಒಟ್ಟುಗೆ ಒಪ್ಪಪುಟ್ಟಿ ಬಲ
ರಾಮೆಲಾ ಉಳ್ಳೆಗೆ ಉಪ್ಪಡ್
ಮಲ್ಪೆ
ಹತ್ಯಾರಿ ತಯಾರ್ ಮಲ್ಪೆ
ಬಿರುಪಗರಿ ಕತ್ತಿ ಕುಡ ಕುಡ ಕುಡರಿ
ಮಲ್ಲ ಮಲ್ಲ ಮರ್ಲೆರೆನ್
ಕಡಪುಡ್ವೆ ಉಲ್ಲೇರತ್ತ
ಪೊಡಿಕಾಸ್‌ಗ್ ಓಂಜೊಂದು ಬರ್ಪಿನಕ್ಲು
(ಶ್ರುತ್ವಾವ್ರಜೇ ವಿಪುಲ ವಿಕ್ರಮ...)
ಲಟ್ಟ ತಿರ್ಗಾದ್ ಹಾಕ್ಯೆ
ಮೇಲ್ ಬೂರ್ದು ಬರ್ಪಿ ಆನೆಲು
ನಡತ್ತಿನವ್ವೆ ಸಾದಿ
ಮಲ್ತ್‌ನವೆ ಸೈಂದ್ ನುರ್ಕ್‌ದ್
ಬರೊಂದಿತ್ತಿಲೆಕೊನೇ ಒಂಜೇ
ದಾಡೆಡ್ ಪತ್ತ್‌ದ್
ಲಟ್ಟ ತಿರ್ಗಾದ್ ನಿಲಕ್ಕ್ ಹಾಕಿನ್ನೇ ಹಾಕಿನಿ
ಸುದ್ದಿ ಇಜ್ಜಿ
(ತಮಾಪತಂತು ಸಹಸಾ ಸಮೀಕ್ಷ್ಯ...)
ಇಸ್ಮಯ
ಇಸ್ಮಯದ ರೂಪೊ
ಅರ್ಥ ಆವಂದಿ ವೇಷೊ
ಮಂಜಲ್‌ ಕುಂಟು
ಕಡಲ್‌‌ದ ಮೈ
ಕೋಪದ ಕಣ್ಣಾಂಡಲಾ
ಅಗೆಲ ಅಗೆಲ ನೋಟೊ
ನುಗ ನಾಯರ್ ಪತ್ತಿನಾಯನ
ಒಟ್ಟುಗೇ ಬರ್ಪೆ
ಕಡಪ ರಾಜ್ಯೋಗ್ ಸೇರಾಪಿ ಬಲತ್ತ ಬಾಲೆ
(ಆಪೀಡದಾಮ ಶಿಖಿ ಬರ್ಹವಿಚಿತ್ರ ವೇಷ...)
ಬೇತೆ ಬರವುಲು
| ಜಾಗರ | ಭಾರತೀಯ ತತ್ವಶಾಸ್ತ್ರ |
| ಕೇದಗೆ | ಮಂದಾರ ಕೇಶವ ಭಟ್ |
| ಮಾರುಮಾಲೆ | |
| ಪ್ರಸ್ತುತ | |
| ತಾಳಮದ್ದಳೆ | |
| ವಾಗರ್ಥ | |
| ಕೃಷ್ಣ ಸಂಧಾನ | ಪ್ರಸಂಗ ಮತ್ತು ಪ್ರಯೋಗ |
| ಮುಡಿ |
| ಒಟ್ಟುಗು ಬರೆತಿನವು | ಜತೆ |
|---|---|
| ಮಣೇಲ್ ಶ್ರೀನಿವಾಸನಾಯಕರು | ಎನ್. ಮಾಧವಾಚಾರ್ಯ |
| ಭಾರತೀಯ ತತ್ವಶಾಸ್ತ್ರಪರಿಚಯ | ಪ್ರೊ. ಎಂ.ಎ. ಹೆಗಡೆ |
| ಕುಮಾರಿಲ ಭಟ್ಟ | ಪ್ರೊ. ಎಂ.ಎ. ಹೆಗಡೆ |
| ದಕ್ಷಿಣ ಕನ್ನಡ | ಗುರುರಾಜ ಮಾರ್ಪಳ್ಳಿ |
| ಸಂಪಾದಿತ | ಜತೆಟ್ಟ್ ಸಂಪಾದಿತ |
|---|---|
| ಅರ್ಥಗಾರಿಕೆ | ಯಕ್ಷಗಾನ ಮಕರಂದ |
| ಯಕ್ಷಗಾನ ಚಿಂತನ | ಯಕ್ಷಕರ್ದಮ |
| ಕುಕ್ಕಿಲ ಸಂಪುಟ | ಗಾನಕೋಗಿಲೆ |
| ಸ್ವರ್ಣರೇಖೆ | |
| Vision 21st Century |
ಗುರ್ತ
ನಲ್ಪತ್ತೊಂಜಿ ಅರ್ಥಾಂತರ - ಅನುಸೃಷ್ಟಿ ಕಬಿತೆಲು