ಬುಳೆ ಕಾಣಿಕೆ ಜ್ಞಾನಪೀಠ ಪ್ರಶಸ್ತಿ ಪಡೆಯಿನ ಡಾ. ಕೋಟ ಶಿವರಾಮ ಕಾರಂತೆರ್ ನಮ್ಮ ತುಳು ನಾಡ್ಡ್ ಪುಟ್ಟುದು ಬಳತಿನಾರ್ ಪನ್ನಿ ವಿಷಯೊ ಈ ಜಿಲ್ಲೆದಕುಲೆಗ್ ಮಾತ ಹೆಗ್ಗದ ಸಂಗತಿ. ಆರೆನ ಜನ್ಮ ಶತಮಾನೊದ ಆಚರಣೆ 2002 - 03ನೇ ವರ್ಸೊ ಪೂರ್ತಿ ರಾಜ್ಯೋದ ಬೇತೆ ಬೇತೆ ಕೋಡಿಡ್ ನಡತ್ಂಡ್, ಅಯಿಟ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಲಾ ಬಾರಿ ಶ್ರದ್ಧೆಡ್ ಪಾಲ್ ಪಡೆಂಡ್. ಕಾರಂತೆರೆನ ಬಗೆಟ್ ತುಳು ಬಾಸೆಡ್ ಈತ್ರಾಸಿ ಒಂಜಿ ಬೂಕುಲಾ ಬೈದ್, ಈ ವರ್ಸೊ ಡಾಂಡಲಾ ಆರೆನ ಬಗ್ಗೆ ತುಳುಟೊಂಜಿ ಬೂಕು ಬರೊಡು ಪನ್ನಿ ಆಸೆಡ್ ಅಕಾಡೆಮಿದ ಅಧ್ಯಕ್ಷೆರಾಯಿನ ಡಾ. ವಾಮನ ನಂದಾವರೆ ಎಂಕ್ ಬೂಕು ಬರೆಯರ ಅಪ್ಪಣೆ ಕೊರೆ. ಕಾರಂತೆರೆಗ್ ತುಳುತ ಮಿತ್ತ್ ದಾಲ ಅಭಿಮಾನ ಇಜ್ಜಿ ಪನ್ನಿನವು ಈ ಬಗೆಟ್ ಆರೆನ್ ತೆರಿಯಂದಿನಕುಲೆನ ಸಾಮಾನ್ಯ ಅಭಿಪ್ರಾಯ. ಕಾರಂತೆರ್ ಅಚ್ಚ ತುಳುವೆದಿ ಪೊಣ್ಣನ್ ಮೆಚ್ಚಿದ್ ಮದಿಮೆ ಆಯಿನಾರ್. ತುಳುತ ನೆಲೆಯಾಯಿನ ಪುತ್ತೂರುಡು ಸುಮಾ ನಲ್ಪ ವರ್ಸೆ ಕಾಲ ಕಳೆಯಿನಾ, ಮುಲ್ಪದ ಹಳ್ಳಿ ಹಳ್ಳಿಗ್ ಪೋದು ಕನ್ನಡ ತೆರಿಯಂದಿ ತುಳುವೆರಡ ಪಾತೆರಕತೆ ನಡಪಾದ್ ಅಕುಲೆ ಏಳಿಗೆಗಾದ್ ಬೆಂದಿನಾರ್. ತುಳುವೆರೆನ ಒಡನಾಟೊಡಿತ್ತ್ದ್, ತುಳುವೆರೆನ ಬಗ್ಗೆನೇ ಕೆಲವು ಕಾದಂಬರಿ ಬರೆಯಿನಾರ್, ತುಳು ಜಾನಪದ ಅಧ್ಯಯನ ಮತ್ತಿನಾರ್. ಆರ್ ಬರೆಯಿನ 'ಚೋಮನ ದುಡಿ' ಕಾದಂಬರಿನ್ ಕೆದಂಬಾಡಿ ಜತ್ತಪ್ಪ ರೈಕುಲು ತುಳುಕು ತರ್ಜುಮೆ ಮಲ್ಪುನ ಪೊರ್ತುಗ್ ಕೆದಂಬಾಡಿದಾರೆಡನೇ ಅಯಿನ್ ಓದದ್
