ಅಧ್ಯಕ್ಷರೆನ ಪಾತೆರೊ
ಕರ್ನಾಟಕ ಸರಕಾರ ತುಳು ಸಾಹಿತ್ಯ ಅಕಾಡೆಮಿನ್ ಪುಟ್ಟು ಪಾಡಿಬೊಕ್ಕ ತುಳು ಬರವು-ಸರವುದ ಬೇಲೆಗ್ ರಾಜಗದ್ದಿಗೆದ ನಿರೆಲ್‌ ಆಯ ರೂಪು ತಿಕ್ಕ್ಂಡ್. ತುಳುತ್ತ ಬೇಲೆ ಬಜೀ ದಿಕ್ಕೆದ ಕೋಡಿಡ್, ಕಂಡದ ಕಲಟ್ಟ್ ಕಾಡ್‌ದ ಪುಡೆ ನೀ‌ರ್‌ದ ಬರಿಟ್ಟ್ ಆವೊಂದಿತ್ತಿನವು ಪೇಂಟೆದ ಮರ್ಜಿದ ನಡುಟ್ಟು ಆಪಿನಲಕ್ಕಾಂಡ್. ಸಾರಸಾರ ವರ್ಸೊದ ಪಿರಾಕ್‌ದ ತುಳು ಜನೊಕುಲು ಬೆಂತಿ ಬೇಲೆಲೆನ್ ಬೊಲ್ವುಗು ಕನಪಿನ ಅಕೆನ ನೆಂಪು ಮಲ್ಪುನ ಬೇಲೆಲಾ ಸುರು ಆಂಡ್. ಅಂಚ ಅಕಾಡೆಮಿದ ನಿರೆಲ್‌ಡ್ ನಡತ್‌ಬತ್ತಿನ ಮಾಮಲ್ಲ ಬದ್‌ಕ್ ಬರವುಲೆನ್ ಕಾಯಿ ಕಡೆಪಿನನೇ ಮದಪ್ಪೆರಾವಂದಿ ತುಳುವೆರೆ ಮಾಲೆ. ರಾಷ್ಟ್ರಕವಿ ಗೋವಿಂದ ಪೈಕುಲು ಒಂಜಿ ಲೆಕ್ಕೊಡು ತುಳು ಅಪ್ಪೆನ ಕಡೀರ ಮಗೆ ಮದ್ರಾಸ್ ಸರಕಾರದ ಕಾಲೊಡು ಕನ್ನಡಪ್ಪೆನ ಬಾಲೆಗೆ ಸೇರಿನ ಸುರುತ್ತ ರಾಷ್ಟ್ರಕವಿ ಬಿರ್ದ್. ಬಹುಭಾಷಾ ವಿದ್ವಾಂಸೆ ಆದ್ ಲೋಕದ 22 ಭಾಸೆಲೆನ್ ಪಾತೆರ್ರೆ, ಬರೆಯರೆ, ಓದರೆ ತೆರಿದಿನಾರ್. ಕವಿ, ವಿದ್ವಾಂಸೆ, ಸ್ವಾತಂತ್ರ್ಯ ಹೋರಾಟಗಾರೆ, ಇಂಚಿತ್ತಿ ತುಳುವೆ ಮಂಜೇಶ್ವರ ಗೋವಿಂದ ಪೈಕ್ಲೆನ್ ತುಳುವೆರ್ ಮಾತ್ರ ಅತ್ತ್ ತುಳು, ಕೊಂಕಣಿ, ಕನ್ನಡ ಈ ಮೂಜಿ ಬಾಸೆದಕ್ಲುಲಾ ಮದಪ್ಪಂದೆ ಮಾನಾವೊಡು.
Vii
