ಮಂಜೇಶ್ವರ ಗೋವಿಂದ ಪೈಕುಳು ಮದ್ರಾಸ ಸರಕಾರೊಡ್ಡು ಸುರುತ ರಾಷ್ಟ್ರಕವಿ ಪ್ರಶಸ್ತಿ ಪಡೆಯಿನ ಸಾಹಿತಿ. ಕನ್ನಡದ ಮಾತ ಕವಿ ಸಾಹಿತಿಲೆಗ್ ಆ ಹಿರಿಯಾರ್. ಆರ್ ಮಲ್ಲ ಸಂಶೋಧಕೆ, ಕನ್ನಡ ಸಾಹಿತ್ಯದ ಬಗೆಟ್, ಸಾಹಿತಿಲೆನ್ ಬಗೆಟ್, ದಿಂಜ ಸಂಶೋಧನೆ ಮಲ್ತ್ದೆರ್. ಆತೆ ಅತ್ತ್ ತುಳುನಾಡ್ದ ಬಗೆಟ್ಲಾ ಸುರುತ ಸಂಶೋಧನ ಆರೆನವೆ. ಪುರಾಣ ಕಾಲೊಡ್ಡಿಂಚಿ ಈ ಪೊಸಯುಗ ಮುಟ್ಟ ತುಳುನಾಡ್ ಎಂಚ ಪುದರ್ ಬದಲ್ತೊಂದು ಬತ್ತ್ಂಡ್ ಪನ್ಪಿ ವಿಚಾರ ಆರೆನ ಬೂಕುಲೆಡ್ ತಿಕ್ಕುಂಡ್. ಆರ್ ಮಲ್ಲ ಭಾಷಾ ಪಂಡಿತೆ. ಜಗತ್ತ್ದ 22 ಭಾಷೆಲೆನ್ ಓದಿಯೆರೆ, ಬರೆಯರೆ, ಪಾತೆರಿಯರೆ ಆರೆಗ್ ತೆರಿದಿತ್ತ್ಂಡ್. ಈತ್ ಭಾಷೆಲೆನ್ ಕಲ್ತ್ದ್ ಪಾತೆರುನಂಚಿನ ನರಮಾನಿ ಬೆತೇರ್ಲಾ ಲೋಕೊಡೆ ತಿಕ್ಕುನ ಅಪರೂಪ.
ಗೋವಿಂದ ಪೈಕುಲು ಮಲ್ಲ ಕವಿ. ಪಿರಾಕ್ದ ಕವಿಕುಲೆನ ಸಾಲ್ಗ್ ಮೆರೆನ್ಲಾ ಸೆರ್ಸಾವೊಲಿ, ಕನ್ನಡೊಡು ಕೆಲವು ಸಂಕಲನೊಲೆನ್ ಆರ್ ಬೊಲ್ಪುಗ್ ಕನತ್ತೆರ್. ಆರೆನನೆ ರೀತಿದ ಶೈಲಿಡ್ ಚಂದಸ್ಸ್ಡ್ ಬೆರೆಯೆರೆ ಸುರು ಮಲ್ತೆರ್.
ಗೋವಿಂದ ಪೈಕುಲು ಸಾಹಿತ್ಯದ ಜೊತೆಟ್ ಸ್ವಾತಂತ್ರ್ಯ್ ಹೋರಾಟದ ಕೆಲಸಲೆನ್ಲಾ ಮಲ್ತೊಂದಿತ್ತೆರ್. ಅಸ್ಪೃಶ್ಯತ ನಿವಾರಣೆಗ್ ಪೇಚಾಡೊಂದಿತ್ತೆರ್. ಸ್ವಾತಂತ್ರ್ಯ ಹೋರಾಟಗಾರೆ ಎನ್. ಎಸ್. ಕಿಲ್ಲೆರ್ ಆರೆನ ಒಟ್ಟಿಗೆನೆ ಬೆಂದೊಂದಿತ್ತೆರ್. ಇಂಚಾದ್ ಆರ್ ಒರಿ ಕವಿ ಸಾಹಿತಿ ದೇಶಾಭಿಮಾನಿ ಪನ್ಪುನೆಟ್ಟ್ ದಾಲಾ ತೊಂದರೆ ಇಜ್ಜಿ.
ಇತ್ತೆ ಮಂಜೇಶ್ವರ ಕೇರಳ ರಾಜ್ಯೋಗ್ ಸೇರ್ದಿತ್ತ್ಂಡಲಾ ಒಂಜಿ ಕಾಲೊಡು ಅವು ತುಳುನಾಡ್ದ ಒಂಜಿ ಭಾಗ. ಗೋವಿಂದ ಪೈಕುಲೆನ ಅಪ್ಪೆ ಭಾಷೆ ಕೊಂಕಣಿ ಆಂಡಲಾ ಆರ್ ನಾಡ್ದ ಭಾಷೆ ತುಳುತ್ತ ಬಗ್ಗೆ ವಿಶೇಷ ಮೋಕೆ ಅಭಿಮಾನ ದೀವೊನ್ನಾರ್. ಎನ್ನಪ್ಪೆ ಕೊಂಕಣಿತಿಗ್ಲಾ, ಈ ಮಣ್ಣ್ದಪ್ಪೆ ತುಳುವೆದಿಗ್ಲಾ ಸಾಹಿತ್ಯದ ಮಿರೆ ಪೇರ್ ಕಮ್ಮಿ ಆಯಿನೆಡ್ಡಾವರ ಯಾನ್ ಸಾಂಕಣದಪ್ಪೆ ಕನ್ನಡೆತಿನ ಮಟ್ಟೆಲ್ಗ್ ಬೂರೊಡಾಂಡ್ಂದ್ ಪಂಡ್ದ್ ಆರ್ ಒಂಜಿ ತಿಕ್ಕ್ಡ್ ಬರೆತೆರ್. ತೌಳವ ಮಾತೆಂದ್ ಒಂಜಿ ತುಳುವಪ್ಪೆನ ಸುಗಿಪುದ ಗೀತೆನ್ ಕನ್ನಡೊಡು ಬರೆತ್ತೆರ್. ಅಂಚಾದ್ ಗೋವಿಂದ ಪೈಕುಲು ಸುದ್ದ ತುಳುವೆ.
ಇಂಚಿನ ರಾಷ್ಟ್ರಕವಿನ ಬಗೆಟ್ ಬೂಕು ಬರೆಯೊಡುಂದು ಕೆಂಡೊನ್ನಗ ಡಾ. ಕಿಶೋರ್ ಕುಮಾರ್ ರೈ ಶೇಣಿ ಮೇರ್ ಸಂತೋಷೊಡ್ ಒಪ್ಪೊಂದು ಪೊರ್ಲುದ ಬೂಕು ಬರೆದ್ ಕೊರ್ತೆರ್.
iv
