ಒವ್ವಾಂಡಲಾ ಒಂಜಿ ಮರ್ಗಿಲ್ಡ್ ತುಳುಬಾಸೆ ಸಂಸ್ಕೃತಿ, ತುಳು ಸಂಪೊತ್ತುದ ಬುಳೆಚಿಲ್ಗಾದ್ ಅಕುಲೆ ಸೇವೆ ಸಂದ್ದಿತ್ತ್ಂಡ ಅಂಚಿನ ಪುಣ್ಯಾತ್ಮೆರೆನ ಬದ್ಕ್, ಸಾಧನೆಲೆನ್ ನೆಂಪುಡು ಒರಿತೊನುನವು ನಮ್ಮ ಧರ್ಮೊ. ಈ ನಿಲೆಟ್ ಕರಿದ್ ಪೋಯಿನಕುಲೆನ ಪುದರ್ಡ್ ಅಕಾಡೆಮಿ ಬೂಕುಲೆನ್ ಬರೆಪಾದ್ ಮದಪ್ಪೆರಾವಂದಿ ತುಳುವೆರ್ ಪನ್ಪಿ ಗ್ರಂತ ಮಾಲೆಡ್ ಬೊಳ್ಪುಗು ಕನವೊಂದುಂಡು.
ಮಂಜೇಶ್ವರ ಗೋವಿಂದ ಪೈಕುಳು ಮದ್ರಾಸ ಸರಕಾರೊಡ್ಧು ಸುರುತ ರಾಷ್ಟ್ರಕವಿ ಪ್ರಶಸ್ತಿ ಪಡೆಯಿನ ಸಾಹಿತಿ. ಕನ್ನಡದ ಮಾತ ಕವಿ ಸಾಹಿತಿಲೆಗ್ ಆರ್ ಹಿರಿಯಾರ್. ಆರ್ ಮಲ್ಲ ಸಂಶೋಧಕೆ, ಕನ್ನಡ ಸಾಹಿತ್ಯದ ಬಗೆಟ್, ಸಾಹಿತಿಲೆನ್ ಬಗೆಟ್, ದಿಂಜ ಸಂಶೋಧನೆ ಮಲ್ತ್ದೆರ್. ಆತೆ ಅತ್ತ್ ತುಳುನಾಡ್ದ ಬೆಗೆಟ್ಲಾ ಸುರುತ ಸಂಶೋಧನೆ ಆರೆನವೆ. ಪುರಾಣ ಕಾಲೊಡ್ಧಿಂಚಿ ಈ ಪೊಸಯುಗ ಮುಟ್ಟ ತುಳುನಾಡ್ ಎಂಚ ಪುದರ್ ಬದಲ್ತೊಂದು ಬತ್ತ್ಂಡ್ ಪನ್ಪಿ ವಿಚಾರ ಆರೆನ ಬೂಕುಲೆಡ್ ತಿಕ್ಕುಂಡ್. ಆರ್ ಮಲ್ಲ ಭಾಷಾ ಪಂಡಿತೆ. ಜಗತ್ತ್ದ 22 ಭಾಷೆಲೆನ್ ಓದಿಯೆರೆ, ಬರೆಯರೆ, ಪಾತೆರಿಯರೆ ಆರೆಗ್ ತೆರಿದಿತ್ತಂದ್. ಈತ್ ಭಾಷೆಲೆನ್ ಕಲ್ತ್ದ್ ಪಾತೆರುನಂಚಿನ ನರಮಾನಿ ಬೆತೆರ್ಲಾ ಲೋಕೊಡೆ ತಿಕ್ಕುನ ಅಪರೂಪ.
ಡಾ. ಕಿಶೋರ್ ಕುಮಾರ್ ರೈ ಶೇಣಿ ಮೇರ್ ಸಂತೋಸುಡು ಒತ್ತೊಂದು ಪೊರ್ಲುದ ಬೂಕು ಬರೆದ್ ಕೊರ್ತೆರ್. ಉಳ್ಳಾಲ್ತಿ ಆರಾಧನೆ-ಇತಿಹಾಸ, ಪುರಾಣ ಮತ್ತು ಪ್ರದರ್ಶನ ಪನ್ಪಿ ವಿಷಯೊಡ್ ಮಹಾಪ್ರಬಂಧ ಬರೆದ್ ಡಾಕ್ಟರೇಟ್ ಪಡೆಯಿನಾರ್, ಜನಪದ ನಲಿಕೆಲೆನ ಮಿತ್ತ್ ವಿಶೇಷ ಆಸಕ್ತಿ ತೋಜಾಯಿನಾರ್. ಮಸ್ತ್ ಕಮ್ಮಟಲೆಡ್ ತುಳು ಕನ್ನಡ ವಿಷಯದ ಮಿತ್ತ್ ಪ್ರಬಂಧ ಮಂಡನೆ ಮಲ್ತಿನಾರ್ ಅತ್ತಂದೆ ಮಸ್ತ್ ಬೂಕುಲೆಡ್, ಪತ್ರಿಕೆಲೆಡ್ ಲೇಖನೊಲೆನ್ ಬರೆಯಿನಾರ್.
ಡಾ. ಪಾಲ್ತಾಡಿ ರಾಮಕೃಷ್ಣ ಆಚಾರ್
(ಗುರ್ಕಾರೆ ಪಾತೆರೊದ ತಿರ್ಲ್)
