ಪೈಕುಲು ಬರೆತಿನ ಗ್ರಂತೊಲೆ ಸಂಕೆ ಕಮ್ಮಿ. ಆಂಡ ಬರೆಯಿನ ಪೂರ ಮಹತ್ತರವಾಯಿನ ಸಾದನೆದವು. 1924ಡ್ ಬೆಳಗಾವಿಡ್ ಅಖಿಲ ಭಾರತ ಸಾಹಿತ್ಯ ಸಮ್ಮೇಳನ ಆನಗ ಆರ್ ಪಾಲ್ ಪಡೆದಿತ್ತೆರ್, 1950ಡ್ ಮುಂಬಯಿಡ್ ನಡತಿ 34ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನೊಗು ಆರೇ ಅಧ್ಯಕ್ಷರಾದಿತ್ತೆರ್.
ಕಡತ ದಿನೊಕುಲು
ಗೋವಿಂದ ಪೈಕುಲು ಪುಟುದಿನಿ ಮಂಗಳೂರು (ಕುಡಲ)ಡ್. ಆರೆನ ಅಪ್ಪೆ ಇಲ್ಲ್ ಮಂಜೇಶ್ವರೊಡು. ಅಕುಲುಲಾ ಮಲ್ಲ ತರವಾಡ್‌ ಇಲ್ಲದಕುಲು, ಪೈಕುಲು ಎಂ. ಗೋವಿಂದ ಪೈ ಪಂಡ್‌ದ್ ಬರವೊಂದಿತ್ತೆರ್. ಅವು ಮಂಗಳೂರುಗ್ಲಾ ಆಪುಂಡು, ಮಂಜೇಶ್ವರೊಗ್ಲಾ ಆಪುಂಡು. ಆಂಡ ಆರ್ ಎಚ್ಚ ಉಪ್ಪೆದಿನಿ ಮಂಜೇಶ್ವರೊಡು. ಕುಡಲದ ಗಜಿಬಿಜಿ ಇಕ್ಕಟ್ಟ್‌ದ ನಗರೊದ ಬದ್ಕ್‌ಡ್ಧ್ ಆರೆಗ್ ಕಡಲ ಬರಿತ ಸುದ್ದಿ ಗಾಳಿ ಬೀಜೊಂದು, ಪಚ್ಚೆ ಪಜಿರ್ ಹಿಂಜೊಂದುಪ್ಪಿನ ಮಂಜೇಶ್ವರೊನೇ ಆರೆಗ್ ಎಡ್ಡೆಂದ್ ತೋಜಿಂಡ್. ಆರೆನ್‌ ಮಂಜೇಶ್ವರೊಡೇ ಜನೊಕುಲು ಎಚ್ಚ ತೂಯಿನೆಡ್ಡಾದ್ ಮಂಜೇಶ್ವರ ಗೋವಿಂದ ಪೈ ಪಂಡ್‌‌ದೇ ಆರೆಗ್ ಪುದರ್ ಕಾಯಂ ಮಲ್ತೆರ್.
ಕವಿ ಆಯಿನಾಯಗ್ ಉಡಲ್‌ಡ್ ಭಕ್ತಿ, ಮೋಕೆ ದಿಂಜಿದುಪ್ಪೊಡು, ವಿವೇಕ ಬೋಡು, ಸಮಾಜೊದ ಬಗೆಟ್ ಪ್ರೀತಿ ಬೋಡು, ಇಸ್ಟೆರೆನಕುಲು ಬೋಡು, ಆಯೆ ಸ್ವಾತಂತ್ರ್ಯ ಪ್ರೇಮಿಯಾದುಪ್ಪೊಡು, ಕಾವ್ಯರಚನೆಗ್ ಆಯಗ್ ಉಮೇದುಪ್ಪೊಡು, ಮನುಷ್ಯತ್ವೊದ ಗುಣೋಕುಲು ಬೋಡು, ಸಾಧನೆ ಬೋಡು, ಆಯಗ್ ದಿಂಜ ಗ್ರಂಥೊಲೆನ್ ಓದುನ ಮರ್ಲ್ ಬೋಡು ಇಂಚಿನ ಮಾತ ಎಡ್ಡೆ ಗುಡೊಕುಲು ಆರಡ ಇತ್ತ್ಂಡ್.
ಆರ್ ಅಚ್ಚಕನ್ನಡೊದ ಪದೊಕುಲೆನ್ ಗಳಸಯೆರ್, ಪೊಸ ಪೊಸ ಪದೊಕುಲೆನ್ ಸೋದೊ ಮಲ್ತೆರ್. ದಕ್ಷಿಣ ಕನ್ನಡದ ಅಚ್ಚಕನ್ನಡದ ಶೈಲಿಡೇ ಆರ್ ಬರೆಯೆರ್. ಬರವುಡು ಆರ್ ಎರೆನ್ಲಾ ಅನುಕರಣೆ ಮ‍ಲ್ತ್‌ಜೆರ್. ಅಂಚಾದೇ ಆರ್ ಸಾಹಿತ್ಯ ಲೋಕೊಡು ಮೆರೆಯೆರ್.
ಪೈಕುಲು ತನ್ನ ಬುಡೆದಿನ್ ಕಳೆವೊನ್ನೆಡ್ದ್ ಬೊಕ್ಕ ಬಾರಿ ಅಸ್ಕ್‌ದ್ ಪೋಯೆರ್. ಆರೆಗ್ ಬಾಲೆಲು ಇಜ್ಜಿಂಡಲಾ ಪಿರ ಮದಿಮೆ ಆಯಿಜೆರ್. ಆರೆ ಇಲ್ಲಲ್ ಇತ್ತಿ ಜೋಕುಲೆನ್ ತನ್ನ ಜೋಕುಲೆಲೆಕನೆ ತೂಯೆರ್, 1947ಡ್ದ್ ಬೊಕ್ಕ ಆರ್ ದಿಂಜ ಬರೆತಿಜೆ‌ರ್. ಆರೆಗ್ ಬರೆಯೆರೆಗ್ ಮನಸ್ಸ್‌ದ ಏಕಾಗ್ರತೆ ಇಜ್ಜಾಂಡ್. ಆರೆನ ಕಡೇತ ಬರವು ಪಂಡ ಆರ್ 1962ಡ್ ಮಂಜೇಶ್ವರ ದೇವಸ್ತಾನೊದ ಬಗೆಟ್ ಬರೆಯಿನ ಒಂಜಿ ಬೂಕು.
1947ಗ್ ಸ್ವಾತಂತ್ರ್ಯ ತಿಕ್ಕ್ಂಡ್‌‌ಂದ್ ಆರೆಗ್ ಬಾರಿ ಸಂತೋಸ ಆಂಡ. ದಾಯೆ ಪಂಡ ಆರ್ಲಾ ಒರಿ ಸ್ವಾತಂತ್ರ್ಯ ಹೋರಾಟಗಾರೆ ಆದಿತ್ತೆರ್. ಅಯಿಡ್ದ್ ಬೊಕ್ಕ ಆರ್ ಕರ್ನಾಟಕ ಏಕೀಕರಣಗ್ಲಾ ಪೊ‌ರಂಬಾಟ ಮಲ್ತೆರ್. ಆಂಡ ದಾನೆ 1956ಡ್ ಭಾಷಾವಾರು ಪ್ರಾಂತ್ಯ ರಚನೆ ಆನಗ ಆರೆನ ಮಂಜೇಶ್ವರೊನೇ ಕೇರಳಗ್ ಸೇರ್ಂಡ್. ಉಂದು ಆರೆನ ಉಡಲ್‌ಗ್ ಮಲ್ಲ ಚಿಂತೆ ಕೊರ್ಂಡ್. ಅಯಿಡ್ದ್ ಬೊಕ್ಕ ಬರವಣಿಗೆನೇ
ರಾಷ್ಟ್ರಕವಿ ಗೋವಿಂದ ಪೈ / 34
