ವಿಷಯೊಡ್ಲಾ ಆರ್ ಚರ್ಚೆ ಮಲ್ತ್ದೆರ್. ನಾಥ ಪಂತೊ ತುಳುನಾಡ್ಗ್ ಬತ್ತಿ ವಿಷಯೊ ಬರೆದ್ 'ಶಿವೆ' ಎಂಚ ಮಂಜುನಾಥೆ ಆಯೆಂದ್ ವಿವರಿಸಾದೆರ್. ಕವಿಕೃಷ್ಣನ ಪರಮಭಕ್ತೆ. ಬಂಗಾಲಿ ಸಾಹಿತಿ ನವೀನಚಂದ್ರಸೇನ್ ಪೆನ್ಪಿನಾರ್ ಬರೆತಿನ 'ಕೃಷ್ಣ ಚರಿತೆ'ನ್ ಪೈಕುಲು ಕನ್ನಡೊಡು ತರ್ಜುಮೆ ಮಲ್ತ್ದೆರ್, ಕೃಷ್ಣೆ ಒರಿ ದೇವೆರ್ಂದ್ ಪನ್ಪಿನೆಡ್ದ್ಲಾ ಎಚ್ಚಾದ್ ಒರಿ ಮಹಾತ್ಮ ಪನ್ಪಿನೆಕ್ ಆರ್ ಎಚ್ಚ ಒತ್ತು ಕೊರ್ಪೆರ್.
ಪೈಕುಲು ಎಡಬುಡಂದೆ ಬರೆಯೆರೆ ಸುರುಮಲ್ತಿನೆ 1924ಡು. ಅಯಿಡ್ದ್ ಬೊಕ್ಕ್ 1947 ಮುಟ್ಟ ಬರೆಯೊಂದೇ ಪೋಯೆರ್. ಇಂಗ್ಲಿಷ್ಡ್ಲಾ ಆರ್ ಸುಮಾರ್ 20 ಲೇಖನೊಲೆನ್ ಬರೆತೆರ್. ಕೊಂಕಣಿ ಭಾಷೆ ಬೊಕ್ಕ ಗೌಡಸಾರಸ್ವತ ಭಾಷೆದಲ ಮೂಲೊದ ಬಗೆಟ್ ಸೋದನೆ ಮಲ್ತ್ದ್ ಇಂಗ್ಲಿಷ್ಡ್ Flashes from the past (ಪ್ಲಾಶಸ್ ಫ್ರಮ್ ದಿ ಪಾಸ್ಟ್) ಗ್ರಂತೊ ಬರೆತೆರ್. ಆರ್ ಗೌಡಸಾರಸ್ವತೆರೆನಕುಲೆ ಮೂಲೊ ಪಂಜಾಬ್ದ ಸರಸ್ವತೀ ಸುದೆ ಬರಿಂದ್ ಪನ್ವೆರ್. ಕೊಂಕಣಿ ಭಾಷೆ, ಮರಾಠಿಡ್ದ್ ಬತ್ತಿನವತ್ತ್ ಅವು ಮಾಗಧಿ ಬೊಕ್ಕ ಪ್ರಾಕೃತ ಭಾಷೆಲೆಡ್ದ್ ಬತ್ತಿನಂದ್ ಅಭಿಪ್ರಾಯ ಕೊರ್ಪೆರ್.
ಇತಿಹಾಸೊದ ಬಗೆಟ್ ಆರ್ ಮಲ್ತಿನ ಸಂಶೋಧನೆ ಬಾರೀ ಮಹತ್ತರವಾಯಿನ. ಗ್ರೀಕೆರ್ ಭಾರತೊಗು ಬತ್ತಿನೆಡ್ದಿಂ ಚಿದ ಇತಿಹಾಸ, ಅಯಿಟ್ ಬರ್ಪಿ ಎಲ್ಯ ಎಲ್ಯ ಸಂಗತಿಲೆನ್ಲಾ ಆರ್ ಪೆಜಿದ್ ಆಧಾರ ಕೊರ್ದು ಉಂದು ಅಂಚತ್ತ್ ಇಂಚಂದ್ ಬರೆತೆರ್. ಕರ್ನಾಟಕೊದ ಇತಿಹಾಸ ಬೊಕ್ಕ ತುಳುನಾದಡ್ದ ಇತಿಹಾಸೊಡು ಆರ್ ಅರಸು ಮನೆತನೊದ ವಂಶಾವಳಿನೇ ಪನ್ಪೆರ್. ತುಳುನಾಡ್ನ್ ಕ್ರಿಶ. 2ನೇ ಶತಮಾನೊಡ್ದೇ ಆಲೂಪೆರ್ ಆಳೊಂದಿತ್ತೆರ್. ಭೂತಾಳಪಾಂಡ್ಯೆ ಆಲೂಪ ವಂಶೊದ ಒರಿ ಸುರುತ ಅರಸುಂದು ಪನ್ತೆರ್. ಅಲೂಪೆರ್ 15ನೇ ಶತಮಾನ ಮುಟ್ಟ ತುಳುನಾಡ್ನ್ ಆಳೊಂದಿತ್ತೆರ್. ತುಳುನಾಡು ಪೂರ್ವಸ್ಕೃತಿ (1947) ಗ್ರಂತೊಡು ಆರ್ ನೆನ್ನ್ ಮಾತ ವಿವರಿಸದೆರ್. ಅರಸುಲೆನ ಮಾತ್ರ ಅತ್ತ್ ಕನ್ನಡೊದ ಪ್ರಾಕ್ದ ಕವಿಕುಲೆನ ವಿಷಯೊಡ್ಲಾ ಬರೆದ್ ಕಾಲ ನಿರ್ಣಯ ಮಲ್ತ್ದೆರ್. ಇಂಚ ಆರ್ ವರ್ಸೊಗು ಸುಮಾರ್ 7-8 ಸಂಶೋಧನೆಲೆನ್ ಮಲ್ತೊಂದಿತ್ತೆರ್. ಈಜಿಪ್ಟ್ದ ಆಕ್ಸಿರಿಂಕಸ್ಡ್ ತಿಕ್ಕಿನ ಪಪ್ಪರಿ ಬರವು ಕನ್ನಡೊಂದು ಗೋವಿಂದ ಪೈಕುಲೆನ ಅಭಿಪ್ರಾಯ ಆದಿತ್ತ್ಂಡ್. ಆಂಡ ಅವು ಕನ್ನಡೊ ಅತ್ತ್ ತುಳುಂದು ಸ್ಕ್ರಾಡ್ರನ್ ಲೀಡರ್ ಪಿ.ಎಸ್. ರೈಕುಲು ಪಂಡೆರ್. ಪ್ರಾಕ್ದ ಕನ್ನಡೊಲಾ ತುಳುಲಾ ತಮಿಳುಲಾ ಒಂಜೇಲೆಕ ತೋಜುನ ಸಹಜ. ಕಡವ ಶಂಭುಶರ್ಮೆರ್ ಒಂಜಿ ಕಡೆಟ್ ಅತಿ ಪ್ರಾಕ್ದ ಕನ್ನಡೊನೇ ತುಳುಂದು ಪಂಡಿನೆನ್ ಮೂಲು ನೆನೆತೊನೊಲಿ. ಪೈಕುಲು ಜಪಾನೀಸ್ ಬಾಸೆಲಾ ಕಲ್ತ್ದಿತ್ತೆರ್ ಪನ್ಪಿನವು ವಿಸೇಸ ಸಂಗತಿ. 7 (ಏಳ್) ಜಪಾನೀ ಬಾಸೆದ ನಾಟಕೊಲೆನ್ ಆರ್ ಕನ್ನಡೊಗು ತರ್ಜುಮೆ ಮಲ್ತ್ದೆರ್. ಅಯಿನ್ 'ನೋ' ನಾಟಕೊಲುಂದು ಪನ್ತೆರ್, ಇತಿಹಾಸೊಗು ಸಮ್ಮಂದ ಪಟ್ಟಿನ ದಿಂಜ ಲೇಖನೊಲೆನ್ ಆರ್ ಇಂಗ್ಲಿಷ್ಡ್ ಬರೆತೆರ್.
ಗೋವಿಂದ ಪೈಕುಲು 20ನೇ ಶತಮಾನೊದ ಮಾಮಲ್ಲ ಪಂಡಿತೆ. ಕವಿ, ಸಂಸೋದಕೆ. ಕವಿಯಾದ್ ಆರ್ ಸುಮಾರ್ 180 ಕವಿತೆಲೆನ್ ಬರೆತೆರ್. ಅವು ಸುವಾಸಿನಿ ಪತ್ರಿಕೆಡ್, ಗಿಳಿವಿಂಡು, ನಂದಾದೀಪ ಕಬಿತೆ ಕೋಪೆಲೆಡ್ ಅಚ್ಚಾತೊ.
ರಾಷ್ಟ್ರಕವಿ ಗೋವಿಂದ ಪೈ / 33
