ಮೂಜಿ ಕಬಿತೆಲೆಡ್ ಆರ್ ತನ್ನ ಮೂಜಿ ವಿಧತ್ತೊ ದೇಶಭಕ್ತಿನ್ ತೋಜದ್ ಕೊರ್ತೆರ್. ಆರ್ ಭಾರತೊದ ಸ್ವಾತಂತ್ರ್ಯದ ಬಗೆಟ್ ಮಾತ್ರ ಚಿಂತೆ ಮಲ್ತಿನಾರತ್ತ್. ಇಡೀ ಜಗತ್ತ್‌ದ ಮಾನವ ಜನಾಂಗೊದ ಎಡ್ಡೆಪುದ ಬಗ್ಗೆ ಚಿಂತೆ ಮಲ್ತಿನಾ‌ರ್. ಇಟೆಲಿ ದೇಶೋದಕುಲು ಟೈಪೋಲಿದ ಮಿತ್ತ್ ಆಕ್ರಮಣ ಮಲ್ಪುನಗ ಆರ್ ಸಹಿಸಯಿಜೆರ್. ಟರ್ಕಿಯ ಪರವಾಗಿ ದೇವರೊಡನೆ ಪ್ರಾರ್ಥನೆ' ಪಂಡ್‌ದೊಂಜಿ ಕಬಿತೆ ಬರೆಯೆರ್. ಆರ್ ವಿದ್ಯಾರಣ್ಯರೆನ ಮಿತ್ತ್ ಕುಮಾರವ್ಯಾಸನ ಮಿತ್ತ್ ದಿಂಜ ಮಾನಾದಿಗೆ ದೀವೊಂದಿತ್ತೆರ್. ಮಹಾತ್ಮಾಗಾಂಧಿ ಉಪವಾಸ ಸತ್ಯಾಗ್ರಹೊಗು ಆರೆನ ಬೆಂಬಲ ಇತ್ತ್ಂಡ್. ಗಾಂಧ್ಯೆರೆನ ಅಸ್ಪೃಶ್ಯತಾ ನಿವಾರಣೆಡ್ ಪೈಕುಲು ಪಾಲ್ ಪಡೆದ್ ಕೊರಗೆರೆನ ಒಟ್ಟುಗು ಕುಲ್ಲುದ್ 'ಸಹಭೋಜನ' ಮಲ್ತ್ ದಿತ್ತೆರ್.'ಹೊಲೆಯನಾರು' ಕವಿತೆಡ್ ಅಸ್ಪೃಶ್ಯೆರ್ ಏರ್ ಪಂಡ್‌ದ್ ತೆರಿಪದ್ ಕೊರ್ಯೆರ್. ಆರೆನ 'ಉದ್ಘೋಷ' ಕಬಿತೆದ ಗೊಂಚಿಲ್ಡ್‌ಪ್ಪಿನ 'ಒಲ್ಲದಜೋಡುಗೆ' ಬೊಕ್ಕ 'ಬಿಡುಗಡೆಗೆ' ರಡ್ಡ್ ಕಬಿತೆಲೆಡ್ ಆರ್ ದಾಸ್ಯ ಸಂಕೋಲೆಡ್ದ್ ಮುಕ್ತಿ ಪಡೆದ್ ನಮ ಸ್ವತಂತ್ರೆರಾಕೊ ಪಂಡ್‌ದ್ ಲೆಪ್ಪು ಕೊರ್ತೆರ್. ಚಿತ್ತಬಾನು ನಾಟಕೊಡು ಆರ್ ಹುತಾತ್ಮೆ ಆಯಿನ ಸ್ವಾತಂತ್ರ್ಯಯೋಧನೊರಿಯಗ್ ಶ್ರದ್ದಾಂಜಲಿ ಅರ್ಪಿಸಬೆರ್. ಬಂಗಾಳಡ್ ಒರೊ ಬರಗಾಲ ಬತ್ತ್ಂಡ್ ಅಪಗದ ಪರಿಸ್ಥಿತಿದ ವಿಷಯೊಡು ಕವಿತೆ ಬರೆತೆರ್.
ಪೈಕುಲೆನ ಕಬಿತೆಲು ಹಿಂದೂ ಧರ್ಮದ ಅಡಿ ಪಂಚಾಂಗದ ಮೌಲ್ಯೊಲೆಡ್ದೇ ಕಟ್ಟಿನವಾಂಡಲಾ ಹಿಂದೂ ಧರ್ಮೊಡು ಸಮಕಾಲೀನ ಬದಲಾವಣೆಲೆನ್ ಆರ್ ಒತ್ತೊನ್ವೆರ್. ಬದಲಾಯಿನ ಸಮಾಜೊಗು ಧಾರ್ಮಿಕ ಆಚರಣೆಲು ಕೂಡ ಬದಲಾವೊಂಡುಂದು ಆರೆನ ಅಭಿಪ್ರಾಯ. ಆರ್ ಬರೆತಿನ ನಾಟಕ 'ಹೆಬ್ಬೆರಳು' (1946) ಒಂಜಿ ಪ್ರಯೋಗಶೀಲ ನಾಟಕ. ಅಯಿಟ್ ಬರ್ಪಿ ಕೋಗಸ್ ಆರ್ಯ ಬೊಕ್ಕ ಅನಾರ್ಯ ಜನೊಕುಲು ನಮ್ಮ ಸಮಾಜೊದ ಸಾಂಕೇತಿಕ ಆಂಡಲಾ ಅವು ಗ್ರೀಕ್ ನಾಟಕೊದ ಶೈಲಿಡ್ ಬರೆತಿನ ನಾಟಕ. ಆರ್ಯ ಅನಾರ್ಯೆರೆನ ಮಧ್ಯೊಡ್ದೇ ಬತ್ತದ್ ಸಮನ್ವಯ ಮಲ್ಪುವೆರ್. ಆಂಡ ಅವು ಓಡೆ ಮುಟ್ಟ ಸರಿಯಾತ್‌ಂಡ್ ಪನ್ನಿನವು ಬಂ‌ಙ್. 'ಗೋಲ್ಗೊಥಾ'ಡ್ ಜೀಸಸ್ ಕ್ರೈಸ್ತನ ಅಕೇರಿದ ದಿನೊಕುಲೆನ ಕತೆ ಇತ್ತಂಡ 'ವೈಶಾಖಿ'ಡ್ ಬುದ್ದನ ಕಡೇತ ದಿನೊಕುಲೆನ ಕತೆ ಉಂಡು.
ಉಂದು ರಡ್ಡ್ ಎಡ್ಡೆ ಪುಗರ್ತೆ ಪಡೇಯಿನ ಕೃತಿಕುಲು. ಈ ಖಂಡ ಕಾವ್ಯೊಲೆಡ್ ಕವಿನ ಸ್ಪೂರ್ತಿ ಬೊಕ್ಕ ಸೃಜನಶೀಲ ಕೌಶಲ ನೆಗತ್ತ್ ತೋಜುಲೆಕಾತ್ಂಡ್. ರಡ್ಡ್‌ಲಾ ಸಾಮರಸ್ಯ ಪಡೆತ್ಂಡ್. ಸತ್ಯದ ಶೋಧೆ ಬೊಕ್ಕ ಕವಿನ ದೂರದೃಷ್ಟಿ ಸಾರ್ಥಕ ಆತ್ಂಡ್.
ಆರ್ ಜೈನಧರ್ಮೊದ ಬಗೆಟ್ ಬರೆತೆರ್. ಆತೇ ಆತ್ತ್ ವೀರಶೈವ ಅಂಚನೆ ನಾಥ ಪಂಥೊದ ಬಗೆಟ್ಲಾ ಬರೆತೆರ್, ಸಿಗಾಲಸುತ್ತ ಪುತ್ರ ಪನ್ಪಿನಾಯೆ ಬರೆಯಿನ ಬೌದ್ದ ಸೂತ್ರಗಳು (1917) ಪನ್ಪಿನೆನ್ ಕನ್ನಡೊಗು ಅನುವಾದ ಮಲ್ತೆರ್.
ಜೈನಧರ್ಮ ತುಳುನಾಡ್‌‌ಗ್ ಬತ್ತಿ ವಿಚಾರೊಡು ಸೋದನೆ ಮಲ್ತ್‌ದ್ ಶ್ರವಣಬೆಳ್ಗೊಳಗ್ ಬತ್ತಿನ ಜೈನ ಸನ್ಯಾಸಿ ಮೌರ್ಯ ಚಕ್ರವರ್ತಿ ಚಂದ್ರಗುಪ್ತ ಅತ್ತ್ಂದ್ ಪನ್ತೆರ್. ಆಯೆ ಮಧ್ಯಭಾರತೊಡು ಒಂಜಿ ರಾಜ್ಯೊದ ರಾಜೆ ಸಂಪ್ರತಿ ಚಂದ್ರಗುಪ್ತೆ. ಬೊಕ್ಕ ಆಯೆ ಕ್ರಿ.ಪೂ. 520ಗ್ ಬೆಳ್ಗೊಳಗ್ ಬತ್ತೆಂದ್ ಬರೆತೆರ್. ಜೈನ ತೀರ್ಥಂಕೆರೆರೆನ
ರಾಷ್ಟ್ರಕವಿ ಗೋವಿಂದ ಪೈ / 32
