ಸಾದಿ ಪತ್ಯೆರ, ಸಾದಿಡೆ ಬನ್ನಗ ಬೇತೆ ಬೇತೆ ವಿಷಯೊಲೆನ್ ಪಾತೆರ್ದ್ ಸ್ಟೇಶನ್ ಮುಟ್ಟ ಎತ್ತ್ ನಗ ಕಿಲ್ಲೆರ್ 'ಈ ಸರ್ತಿ ಮದ್ರಾಸ್ ಸರಕಾರ ಐನ್ ಬಾಸೆಲೆನ ಐನ್ ಮಲ್ಲ ಕವಿಕುಲೆಗ್ ರಾಷ್ಟ್ರಕವಿ ಪ್ರಶಸ್ತಿ ಕೊರ್ಯೆರೆ ರಡ್ಡ್ ತಿಂಗೊಳುದುಂಬೇ ನಿಗಂಟ್ ಮಲ್ತಿನ ವಿಷಯೊ ಈರೆಗೆ ಗೊತ್ತುಂಡತ್ತೇ? ಕನ್ನಡ ಬಾಸೆದ ಆಯ್ಕೆದ ಸಮಿತಿದಕುಲು ಈರೆನ ಪುದರ್ ಆಯ್ಕೆ ಮಲ್ತ್ದೆರ್' ಪಂಡ್ದ್ ಪೈಕುಲೆಡ ಪಂಡೆರ್. ಆತಾನಗ ರೈಲ್ದ ಕಯಿತಡೆ ಎತ್ಯೆರ್. ರೈಲ್ ಪಿದಾಡ್ಂಡ್.
ಒಂಜಿ ತಿಂಗೊಳ್ ಕರಿಂಡ್ ಮಾರ್ಚ್ 17, 1949 ಬೈಯ್ಯಗ್ ರೇಡಿಯೋಡು ಐನ್ ಜನ ಕಏಕುಲೆನ ಪುದರ್ ಪಂಡ್ದ್ ರಾಷ್ಟ್ರಕವಿಕುಲು ಆಯಿನ ಬಗೆಟ್ಟ್ ಘೋಷಣೆ ಮಲ್ತೆರ್. ಇಂಚ ಮಂಜೇಶ್ವರ ಗೋವಿಂದ ಪೈಕುಲು ಕನ್ನಡದ ಸುರುತ್ತ ರಾಷ್ಟ್ರಕವಿಕುಲಾಯೆರ್.
ಒಂಜಿ ತಿಂಗೊಳುರ್ದು ಬೊಕ್ಕ ಕುಡ್ಲಗ್ ಬತ್ತಿನಪಗ ದಾಮೋದರ ಬಾಳಿಗೆರ್ನ ಪುಸ್ತಕದ ಅಂಗಡಿಡ್ ಕಿಲ್ಲೆ ಪೈಕುಲೆಗ್ ತಿಕ್ಯೆರ್. ಅಪಗ ಪಂಡೆರ್ಗೆ 'ಪೈಕುಲೆ ಈರ್ ಒಪ್ಯರ್ ಅತ್ತ, ಅವ್ವೆ ಯಾವು' ಪಂಡ್ದ್ ಕಿಲ್ಲೆರೆನ ಕಣ್ಣ್ ದಿಂಜಿಂಡ್, ಪೈಕುಲೆನ ಕಣ್ಣ್ಡ್ ನೀರ್ ಬತ್ತ್ಂಡ್. ಅಪಗ ಕಿಲ್ಲೆರೆನ ಪಿರ್ತಿ ಎಂಚಿನ ಪಂಡ್ದ್ ಪೈಕುಲೆಗ್ ತೆರಿದ್ ಪೊಂಡ್ಗೆ, ಉಂದು ಪೈಕುಲು ಕಿಲ್ಲೆರೆನ ಬಗೆಟ್ಟ್ ಮನಸ್ ಬುಡುಪಾದ್ ಪಂಡಿನ ಪಾತೆರ.
ಪಂಜೆ ಬೊಕ್ಕ ಜೈಕುಲೆ ಸಮ್ಮಂದ
ಪಂಜೆ ಬೊಕ್ಕ ಪೈಕುಲೆನ ಆತ್ಮೀಯತೆ ಬುಲೆಯರೆ 1896ಟ್ ಪೈಕುಲು 'ಕರ್ನಾಟಕ ಗ್ರಂಥಮಾಲೆ' ಪನ್ಪಿ ತಿಂಗೊಳದ ಪತ್ರಿಕೆದ ಚಂದಾದಾರೆರ್ ಆಯೆರ್. ಆ ಪತ್ರಿಕೆದ ಒಂಜಿ ರಡ್ಡ್ ಸಂಚಿಕೆನ್ ತೂನಗನೇ ಬಾರಿ ಕುಸಿಯಾದ್ ದುಂಬುದ ಪೂರ ಸಂಚಿಕೆನೆಲೆನ್ ತರ್ಪಯೆರ್ಗೆ, ಆಯಿಟ್ಸ್ ಬತ್ತಿ ಸುಮತಿ ಮದನಕುಮಾರ ಚರಿತ್ರೆ, ಕನ್ಯಾವಿತಂತು, ಪ್ರಿಯಭಾರ್ಯೆ ಇಂಚ ಕಾದಂಬರಿ, ಕತೆ, ನಾಟಕಲೆನ ಪೊರ್ಲುದ ಅನುವಾದಲು ಕ್ರಮವಾದ್ ಬರೊಂದಿತ್ತ್ಂಡ್. ಈ ಪತ್ರಿಕೆನ್ ಪೈಕುಲ್ ಕನಪಾವೆರ್ ಪನ್ಪಿ ವಿಚಾರ ಪಂಜೆದಾರೆಗ್ ಎಂಚ ತೆರಿಂಡ್ಂದ್ ಪಂಡ್ದ್ ಪೈಕುಲೆಗ್ ತೆರಿಯಿಜಿಗೆ, ಪೈಕುಲು ಏರ್ಡಲಾ ಪತ್ರಿಕೆ ಕೊನಪವುನ ಬಗೆಟ್ಟ್ ಪಂತ್ಜೆರ್. ಪೈಕುಲು ಪತ್ರಿಕೆ ಕೊನಪವೊಂದುಪ್ಪುನ ವಿಚಾರೊ ಎಂಚನೋ ತೆರಿನ ಪಂಜೆದಾರ್ ಪೈಕುಲೆಡ ಆ ಪತ್ರಿಕೆನ್ ದೆತೊಂದು ಪೋದ್ ಓದ್ದ್ ಪಿರ ಕೊರೊಂದಿತ್ತೆರ್ಗೆ, ಆ ಪೊರ್ತುಡು ಪೈಕುಲು ಮಾತ್ರ ಈ ಜಿಲ್ಲೆಡ್ ಆ ಪತ್ರಿಕೆನ್ ಕೊನಪಾವೊಂದು ಇತ್ತೆರ್ಗೆ, ಅಂಚೆ ಬರೊಂದಿತ್ತಿ ಮಾತಾ ಪತ್ರಿಕೆನ್ ಓದ್ದ್ ಕೋರೊಂದಿತ್ತೆರ್ಗೆ. ಅಯಿರ್ದ್ ಬೊಕ್ಕ ಪಂಜೆ ಬೊಕ್ಕ ಪೈಕುಲೆನ ಸಮ್ಮಂದ ಬಿಗಿಯೊಂದು ಪೋಂಡ್ ಅಪಗ ಪೈಕುಲೆಗ್ 13 ವರ್ಷ ಪಂಜೆದಾರೆಗ್ 22ವರ್ಷ ಪ್ರಾಯ, ಪಂಜೆದಾರಡ ಪಾತೆರುನೆ ಪಂಡ ಅವು ಒಂಜಿ ಎಲ್ಯ ಮಟ್ಟ್ದ ಸಮಾರಾಧನೆದಲೆಕ್ಕಗೆ ಆರೆನ
ಪಾತೆರೊಡು ಕತೆ, ಕಟಕಿ, ಗಾದೆ, ಗಾನ, ಗೇಲಿ -ಇಂಚ ಮಾತಾ ರೀತಿದ ಚೀಪೆ, ಕೈಪೆದ ತಿಂಡಿ ತಿನಸ್ಲು ಇತ್ತೊಗೆ. ಪೈಕುಲೆಗ್ ಪಂಜೆದಾರೆಡ ಪಾತೆರುನವೇ ಒಂಜಿ ಪರ್ಬಗೆ. ಇಂಚ ಪಂಜೆ ಬೊಕ್ಕ ಪೈಕುಲು ಇತ್ತೆರ್ಗೆ
ರಾಷ್ಟ್ರಕವಿ ಗೋವಿಂದ ಪೈ / 11
