ಓವ್ವ ಬೇಲೆ ಬೆನ್ಪುನ ಅಗತ್ಯ ಪೈಕುಲೆಗ್ ಇಜ್ಯಂಡ್ ಇಲ್ಲಲ್ ಅರೆನ ಮನಸ್‌ಗ್ ಬೋಡಾಪಿಲೆಕ ಉಪ್ಪುನ ಬುಡೆದಿ. ಅಂಚನೆ ಅರೆನ್ ಅರ್ತಿಪಿರ್ತಿಡ್ ತೂಪುನ ಮೆಗ್ಯ ಮೆಗ್‌ದಿನಕುಲು ಇತ್ತೆರ್. ಅಂಡ ಅರೆನ ಗೃಹಸ್ಥ ಜೀವನ ಮಾತ್ರ ದಿಂಜ ಸಮಯ ಪೊರ್ಲುಡೆ ಸಾಗ್‌ದಿಜಿ. 1910ಟ್ ಪುಟ್ಟಿನ ಪೊಣ್ಣು ಬಾಲೆ ತೀರ್ದ್ ಪೊಂಡು. ಪೈಕುಲೆನ ನಲ್ವತ್ತನಾಲನೆ ವರ್ಷ ಪ್ರಾಯೊಡು ಪಂಡ 1927ಟ್ ಅರೆನ ಬುಡೆದಿ ಕೃಷ್ಣಾಬಾಯಿ ಉಬ್ಬೆಸ ರೋಗೊರ್ದ್ ತೀರ್ದ್ ಪೋಯೆರ್. ಪೈಕುಲೆಗ್ ಜೋಕುಲುಲಾ ಇಜ್ಯಂಡ್, ರಡ್ಡನೆ ಮದಿಮೆ ಆಪಿನ ಪ್ರಾಯ ಇತ್ತ್ಂಡಲಾ, ಆರೋಗ್ಯ ಇತ್ತ್ಂಡಲಾ ಆರ್ ರಡ್ಡನೆ ಮದಿಮೆ ಆಯಿಜೆರ್. ತೀರ್ದ್ ಪೋಯಿನ ಬುಡೆದಿನೇ ಇಡೀ ಜೀವನ ಪೂರ್ತಿ ನೆನೆತೊಂದು ಇತ್ತೆರ್. ಬೊಲ್ಪು ಮೂಡುನೆರ್ದ್ ದುಂಬೇ ಲಕ್ಕ್‌ದ್ ನಿಚ್ಚೊದ ಕೆಲಸ ಮುಗಿತ್‌‌ದ್ ಮೀದ್, ಪೂ ಕನತ್‌‌ದ್ ಬುಡೆದಿನ ಪೋಟೊಕ್ಕು ದೀದ್ ಮೌನ ಪ್ರಾರ್ಥನೆ ಮಲ್ತೊಂದಿತ್ತೆರ್. ಬೊಕ್ಕದ ಮುಪ್ಪತ್ತಆಜಿ ವರ್ಷಲಾ ತನ್ನ ತೀರ್ದ್ ಪೋಯಿನ ಬುಡೆದಿನ್ ನೆನೆತೊಂದೇ ಇತ್ತೆರ್. ಆರೆನ ನೆನಪುಗಾದ್ ಪದ್ಯೊಲೆನ್ ಬರೆಯೆರ್. ಆ ಪದ್ಯೋನೆ - 'ನಂದಾದೀಪ'
ಆಯಿತ್ತ ಸಾಲ್‌ಲ್ ಇಂಚ ಉಂಡು -
ನೀನಿನ್ನೆವರಮೆನ್ನ ಬಾಗಿಲಿಗೆ ಬಂದಿಲ್ಲ
ಬಾರೆಂದು ಕರೆದೆನಿಲ್ಲ
ನಿನ್ನ ನೆನವಂ ಗೂಡುಗೊಳದನ್ನ ದಿನವಿಲ್ಲ
ನೀ ನಲ್ಲಗಳೆದುದಿಲ್ಲ .
***
ಸಂದುವಾದಿನ ನನ್ನ ಕತ್ತಲೆಯ ಸೆರೆ ಎಲ್ಲಿ?
ನಿನ್ನ ಮಿರು ಮೋರೆಯೆಲ್ಲಿ?
ನನ್ನಕ್ಕರೆಯ - ಕೆರೆಯ ಹೆರೆಯ ಲಕ್ಷ್ಮಿಯನಿಲ್ಲಿ
ನಂದೆವೊಯಿದೊಯಿದೆ ಎಲ್ಲಿ?
* * *
ಇದೋ ನಂದಿದಳಿಯ ಗಡಾ ನಂದದದುತಾಪ
ದಿಂದ ಬೆಳ್ಳುರಿವ ನೆನಸು
ಸ್ನೇಹದೆದೆ ಬಟ್ಟಲಲಿ ಬೇಯೆ ನಂದಾದೀಪ
ಮಾದುದಿನ್ನೆನ್ನ ಮನಸು
(ಉಂದೆನ್ ತುಳುಕ್ಕು ತರ್ಜುಮೆ ಮಲ್ತ್ಂಡ ಅರ್ಥ ವ್ಯತ್ಯಾಸ ಆಪುಂಡು ಪನ್ಪಿ ದಿಟ್ಟಿಡ್ ಕನ್ನಡದ ಪದೊನು ಅಂಚನೆ ಕೊರ್ತೆ)
ಈ ಪದೊಟ್ಟು ಲಕ್ಷ್ಮಿ ಪಂದ್ ಬರ್ಪಿನ ಪುದರ್ ಕೃಷ್ಣಾಬಾಯಿಗ್ ಅಪ್ಪೆ ಇಲ್ಲಲ್ ದೀತಿನ ಪುದರ್.
ರಾಷ್ಟ್ರಕವಿ ಗೋವಿಂದ ಪೈ / 8
