ಓದು-ಬರವು
ದಕ್ಷಿಣ ಕನ್ನಡ ಜಿಲ್ಲೆ ಆ ಪೊರ್ತುಡು ಮದ್ರಾಸ್ ರಾಜ್ಯೋಗು ಸೇರ್ದಿತ್ತಂಡ್. ರಾಜಧಾನಿಷ್ ಡಿಗ್ರಿ ಮಲ್‌ಪೊಡು ಪನ್ನಿ ಕನ ಆ ಪೊರ್ತುದ ಜೋಕುಲೆಡ ಮಾತಾ ಇತ್ತಂಡ್. ಅಂಚನೆ ಪೈಕುಲು ಮದ್ರಾಸ್‌ಡ್ ಬಿ.ಎ.ಗ್ ಸೇರಿನ ಪೊರ್ತು ಅವುಲು ಡಾ. ಎಸ್ ರಾಧಾಕೃಷ್ಣನ್ (ನಮ್ಮ ದೇಶದ ರಾಷ್ಟ್ರಪತಿ ಆದಿತ್ತಿನಾರ್) ಬೊಕ್ಕ ಪೈಕುಲು ಒಟ್ಟಿಗೆ ಓದಿನಕುಲು, ಮದ್ರಾಸ್ ಕ್ರಿಶ್ಚಿಯನ್ ಕಾಲೇಜಿದ ಮಲ್ಲ ಮಟ್ಟದ ಶಿಕ್ಷಣ ಅಂಚನೆ ಮದ್ರಾಸ್‌ದ ಬದ್‌ಕ್ ಪೈಕುಲೆನ ಅನುಭವನ್ ಬಾರಿ ಎತ್ತರೊಗು ಕೊನೊಂಡು, ಬಿ.ಎ.ಡ್ ಉಪ್ಪುನಗನೇ ಪೈಕುಲು ಬೇತೆ ಬೇತೆ ಬಾಸೆಲೆನ್ ಓದ್ಯೆರೆ ಸುರು ಮಲ್ತೆರ್. ಲ್ಯಾಟಿನ್, ಫ್ರೆಂಚ್ ಇಂಚಿನ ಪಿದಯಿ ಊರುದ ಬಾಸೆಲೆನ್, ಸಂಸ್ಕೃತ, ಬಂಗಾಳಿ, ಪಾಲಿ ಇಂಚಿತ್ತಿ ಭಾರತೀಯ ಬಾಸೆಲೆನ್ ಕಲ್ತೊಂಡೆರ್. ಬಿ.ಎ. ಪರೀಕ್ಷೆಗ್ ಕುಲ್ಲುದು ಇಂಗ್ಲಿಷ್ ಬಾಸೆದ ಪರೀಕ್ಷೆದ ಪ್ರಶ್ನೆಗೆ ಉತ್ತರ ಬರೆದ್ ಆನಗ ಅಮ್ಮೆ ಹುಶಾರ್ ಇಜ್ಯಂದಿ ಸುದ್ದಿ ಬತ್ತಂಡ್. ಅಂಚಾದ್ ಪರೀಕ್ಷೆಲೆನ್ ಅರ್ದಡೆ ಬುಡುದು ಊರುಗು ಬತ್ತೆರ್ ಅಂಚ ಬತ್ತಿನಾರ್ ಬಿ.ಎ. ಪದವಿನ್ ಅರ್ದೊಡೆ ಬುಡಿಯರ್. ಪರೀಕ್ಷೆಗ್ ಬರೆಯಿನ ಸುರುತ ಬಾಗೊಗ್ ವಿಶ್ವವಿದ್ಯಾನಿಲಯ ಮಟ್ಟಡೊ ಬಂಗಾರ್‌ದ ಪದಕ ತಿಕ್ಕ್ಂಡ್. ಆಯಿಡ್ ಬೊಕ್ಕ ಬಾಸೆಲ್ ಮಿಶನ್ ಬುಕ್ ಡಿಪೋರ್ದ್ ಬೋಡಾಪಿನಂಚನೆ ಬೂಕುಲೆನ್ ದೆತೊನಿಯರೆ ಆರೆನ ಹಿರಿಯಕುಲು ಪಂಡೆರ್, ಆರ್ ಬೋಡಾಯಿ ಬೂಕುಲೆನ್ ಕನತ್‌‌ದ್ ಓದ್ಯೆರೆ ಸುರು ಮಲ್ತೆರ್, ದೇಶ ವಿದೇಶೂಲೆರ್ದೆಲಾ ಬೋಡಾಪಿ ಮಲ್ಲ ಮಲ್ಲ ಬೂಕುಲೆನ್ ಕನಪಾದ್ ತೆರಿಯೊನೊಡು ಪನ್ಪಿನ ಬಾಜೆಲ್‌ನ್ಲಾ ಕಮ್ಮಿ ಮಲ್ತೊಂಡೆರ್. ಇಂಚ ಓದ್ದ್ ಓದ್ದ್ ಮಾಮಲ್ಲ ತಿಳಿವಳಿಕೆ ಬುಳೆಪವೊನ್ನಾರ್ ಪೈಕುಲು.
ಬೂಕುಲೆನ ಸಂಗ್ರಹ, ಓದುನ ಅಭ್ಯಾಸ ಈ ವಿಷಯೊಲೆಗ್ ತಾರ್ಕಣೆ ಮಲ್ಪರೆ ಗೋವಿಂದ ಪೈಕುಲೆನೊಟ್ಟಿಗೆ ಬೇತೆ ಜನ ತಿಕ್ಕುಜೆರ್, ಎಂಚ ಕಡಲ್‌ಗ್ ಕಡಲೇ ಉಪಮೆನೋ ಅಂಚನೆ ಪೈಕುಲೆಗ್ ಪೈಕುಲೆ ಹೋಲಿಕೆ ಆದಿತ್ತೆರ್. ಒಂಜಿ ಬೂಕು ದೆತೊಂಡೆರ್ಂಡ ಆಯಿನ್ ಸುರುರ್ದ್ ಕಡೆ ಮುಟ್ಟ ಓದ್ದ್ ಅಯಿಟ್ಸ್ ನೇರಳೆಶಾಯಿಡ್ ಪ್ರಶ್ನಾರ್ಥಕ ಚಿನ್ನೆ, ಅಡಿಗೆರೆ ಪಾಡ್ದ್ ಅರೆನ ಯೋಚನೆನ್ ಪಂಡೊಂದಿತ್ತೆರ್. ಉದಾರ್ಮೆಗಾದ್ ತೂಂಡ ಆರ್ ಕಿಟ್ಟೆಲ್ ಕೋಶ'ಡ್ ಪ್ರತಿ ಸಬ್ದೊಗ್‌ಲಾ ಪನ್ಪಿಲೆಕ ಅಕ್ಷರ ಬುಡಂದೆ ಅಡಿಕ್ ಗೆರೆ ಪಾಡ್ದ್, ಪ್ರಶ್ನೆ ಮಲ್ತ್‌ದ್ ಗುರ್ತ ಪಾಡ್ದ್ ದೀತೆ‌ರ್. ಸುರುರ್ದ್ 1752 ನೆ ಪುಟ ಮುಟ್ಟ ನೇರಲೆ ಶಾಯಿಡ್ ಗುರ್ತ ಪಾಡ್‌ನ್ ತೂಂಡ ಆರ್ ಬೂಕು ಓದುನ ವಿದಾನೊ ಎಂಚಂದ್ ತೆರಿದ್ ಬರ್ಪುಂಡು. ಏರ್‌ಲಾ ಒಂಜಿ ಅರ್ಥಕೋಶನ್ ಇಂಚ ಸುರುರ್ದ್ ಕಡೆ ಮುಟ್ಟ ಅಕ್ಷರ ಅಕ್ಷರ ಓದ್ದ್ ಗುರ್ತ ಮಲ್ವುನ ನಮ್ಮ ಚರಿತ್ರೆಡ್ ಬೇತೆ ತಿಕ್ಕಂದ್. ಉಂದು ಒಂಜೆ ವಿಷಯೊಡು ಪೈಕುಲೆನ ಓದುದ ಗಾಂತ್, ಬಿತ್ತರ ವಾ ಮಟ್ಸ್‌ಡ್ ಇತ್ತ್ಂಡ್ ಪನ್ಪಿನೆನ್ ನಮ ತೆರಿಯೊನೊಲಿ.
ಪೈಕುಲು ಸಂಸ್ಕೃತ, ಪ್ರಾಕೃತ, ಪಾಲಿ, ಹಿಂದಿ, ಬಂಗಾಳಿ, ಉರ್ದು, ಗುಜರಾತಿ ಇಂಚಿತ್ತಿ ಆರ್ಯ ವರ್ಗದ ಬಾಸೆಲೆನ್, ಕನ್ನಡ, ಮಲೆಯಾಳ, ತಮಿಳ್ - ಇಂಚಿತ್ತಿ ದ್ರಾವಿಡ ವರ್ಗದ ಬಾಸೆಲೆನ್, ಗ್ರೀಕ್, ಲಾಟೀನ್, ಇತಾಲಿಯನ್, ಫ್ರೆಂಚ್, ಜಪಾನ್
ರಾಷ್ಟ್ರಕವಿ ಗೋವಿಂದ ಪೈ / 5
