ಪನ್ಪುನೆಕ್ ದಾಲಾ ಸಂಶಯ ಇಜ್ಜಿ.
ಇಂಚ ತುಳುನಾಡಪ್ಪೆಗ್ ಸುಗಿತೊನು ಬರೆತಿನ ರಾಷ್ಟ್ರಕವಿ ಮಂಜೇಶ್ವರ ಗೋವಿಂದ ಪೈಕುಲು ಒಂಜಿ ಕಡೆಟ್ಸ್ ಎಂಕ್ ದಿಂಜ ಅಪ್ಪೆ ಅಡಿಕುಲು. ಅವು ಎನ್ನ ಪುಣ್ಯ ಪನ್ತೆರ್. 'ಕೊಂಕಣಿ ಎನ್ನ ಪೆದ್ದಿ ಅಪ್ಪೆ, ತುಳು ಎನ್ನ ಭೂಮಿಯಪ್ಪೆ ಕನ್ನಡ ಎನ್ನ ತಾಂಕನದ ಅಪ್ಪೆ" ಪಂತೆರ್, “ಎನ್ನ ಪೆದ್ಯಪ್ಪೆ, ಭೂಮಿಯಪ್ಪೆನಕಲೆಗ್ ಒಂತೆ ಸಾಹಿತ್ಯೊದ ಮಿರೆಪೇರ್ ಇತ್ತುದುಂಡ ಎಂಕ್ ತಾಂಕನದ ಅಪ್ಪೆ ಬೊಡ್ಡಿತ್ಂಡ್, ಅಂಚಾದೇ ಮೊಕುಲು ಬಾಲೆಬದುಕೊಡ್ಂದ್ ಕನ್ನಡಪ್ಪೆನ ಜಕ್ಕೆಲ್‌ಗ್ ಪಾಡೈ‌ರ್. ಈ ಅಪ್ಪೆ ಪಯಸ್ವಿನಿ. ಏತೋ ಕಾಲರ್ದ್ ಏತೋ ಕವಿಕುಲೆನ್ ತನ್ನ ಜಕ್ಕೆಲ್‌ಡ್ ಪಾಡ್ದ್ ಮಾನಾಯಿನಾಲ್. ಅಲೆನ ಮಿರೆಪೇರ್ ಏಪೊಲಾ ಆಜುನೆಂದೇ ಇಜ್ಜಿ. ಆಲ್ ಎನನ್ ಮೋಕೆಡ್ ತೂಯಲ್. ಅಲೆನ ಅರ್ತಿ ಪಿರ್ತಿದ ಕೊಂಡಾಟೊನು ಯಾನ್ ಏಳೇಲ್ ಜನ್ಮೊಗುಲಾ ಮದಪ್ಯರೆ ಸಾಧ್ಯ ಇಜ್ಜಿ" ಪಂಡ್‌ದ್ ಆರ್ ಕೊಂಕಣಿ, ತುಳು, ಕನ್ನಡದ ಮಿತ್ತ್ ಇತ್ತಿನ ಮೋಕೆ ಅಭಿಮಾನೊನು ತೋಜಾದ್ ಕೊರ್ತೆರ್.
ಮಂಜೇಶ್ವರ ಇತ್ತೆ ಕೇರಳಗ್ ಸೇ‌ರ್‌ದ್ ಇತ್ತ್ಂಡಲಾ ದುಂಬು ದಕ್ಷಿಣ ಕನ್ನಡ ಜಿಲ್ಲೆದ ಒಂಜಿ ಭಾಗ. ತುಳುನಾಡ್ಂದ್ ಪನ್ನಗ ನಮ ಬಜಿ ಉಡುಪಿ, ದಕ್ಷಿಣ ಕನ್ನಡ ಜಿಲ್ಲೆಲೆನ್ ಮಾತ್ರ ಪನ್ಪುಜ. ಕಾಸರಗೋಡು ಜಿಲ್ಲೆನ್‌ಲಾ ಸೇರ್ಸವನೊವ. ಗೋವಿಂದಪೈಕುಲು ಮಂಜೇಶ್ವರೊಡು ಪುಟ್ಟಿನಾ‌ರ್ ಅಂಚಾದ್ ಆರ್ ತುಳುನಾಡ್ದ ಒರಿ ಪೆರ್ಮೆದ ಸಾಹಿತಿ, ಕವಿ, ಸಂಶೋಧಕೆ, ಚಿಂತನಕಾರೆ ಆತೇ ಅತ್ ಸ್ವಾತಂತ್ರ್ಯ ಹೋರಾಟಗಾರೆ. ಆರ್ ಭಾರತದ ಮಾತ್ರ ಅತ್ತಂದೆ ದೇಶ ವಿದೇಸೊಲೆನ ಬಾಸೆಲೆನ್ ಮಾತ ಓದುದು ಬರೆಯೆರೆ ತೆರಿಯೊನ್ನ ಮಲ್ಲ ಬಹುಭಾಷಾತಜ್ಞೆ ಇರ್ವತ್ತರಡ್ಡ್ ಬಾಸೆಲೆನ್ ತೆರಿನಾರಾಂಡಲಾ ಆರ್ ತುಳುವಪ್ಪೆನ ಮಗೆ. ಅಂಚಾದ್ ಆರ್ ತುಳುವೆ. ತುಳು ಬಾಸೆ, ತುಳುನಾಡ್, ತುಳುನಾಡ್ ಚರಿತ್ರೆ, ತುಳುನಾಡ್ದ ಸಂಸ್ಕೃತಿದ ಬಗೆಟ್ಟ್ ಸುರುತ ಸಂಶೋಧಕೆ, ಇತ್ತೆ ಏರ್ ತುಳು ಕನ್ನಡದ ವಿಷಯೊಡು ಸಂಶೋಧನೆ ಮಲ್ಪುನಗಲಾ ಆರ್ ಬರೆತಿನ ಬೂಕುಲೆನ್ ಓದಂದೆ ಸಂಶೋಧನೆಗ್, ವಿಮರ್ಶೆಗ್, ನಿರ್ನಯೊಗು ಬರಿಯೆರೆ ಸಾಧ್ಯನೇ ಇಜ್ಜಿ.
ಗೋವಿಂದ ಪೈಕುಲು ಸುರುತ ರಾಷ್ಟ್ರಕವಿ ಮಾನಾದಿಗೆದ ಬಿರ್ದ್‌ನ್ ಮದ್ರಾಸ್ ಸರಕಾರೊಡು ಪಡೆಯಿನಾರ್. ಆರ್ ಜಗತ್ತೇ ಇರ್ವತ್ತರಡ್ಡ್ ಬಾಸೆಲೆಡ್ ಬರೆಯೆರೆ ಓದ್ಯರೆ ತೆರಿನ ಜಗತ್ತ್‌ದನೇ ಒರಿ ಮಲ್ಲ ವಿದ್ವಾಂಸೆ. ಕನ್ನಡೊದ ಮಲ್ಲಸಾಹಿತಿ.
ಪೊಲಬು
ಮಂಜೇಶ್ವರದ ಊರುಡು ಇತ್ತೆಲಾ ಅರೆನ ಇಲ್ಲ್‌ನ್ ತೂವೊಲಿ. ಕರ್ನಾಟಕ ಸರಕಾರ ಅಯಿನ್ ಪೊರ್ಲು ಮಲ್ತ್‌ದ್ ರಕ್ಷಣೆ ಮಲ್ತೊಂದುಂಡು. ಕರ್ನಾಟಕ ಸರಕಾರ ಕೇರಳ ಸರಕಾರೊಗು ಬೆರಿಸಹಾಯೊ ಕೊರ್ದ್ ಆರೆನ ಪುದರ್‌ಡ್ ಮಂಜೇಶ್ವರಡೇ ಒಂಜಿ ಕಾಲೇಜಿಲಾ ಕಟ್ಟದ್ಂಡ್.
ಗೋವಿಂದ ಪೈಕುಲೆನ ಮುಖಚರ್ಯೆ ಏರ್‌ಲಾ ಮದಪುನವೇ ಅತ್ತ್. ಸಾಮಾನ್ಯ
ರಾಷ್ಟ್ರಕವಿ ಗೋವಿಂದ ಪೈ / 2
