ತುಳುವಪ್ಪೆ
ಜಯ ಜಯ ಸಿರಿ ತುಳುವಪ್ಪೆ ||ಪ||
ಸುಗಿಪುವೆ ಪೆರಿಯಾಕುಲೆನಷ್ಟೆ
ಲೋಕೊಗು ಮುವ್ವಲ ಬೊಲ್ಪುನೆ ಕೊರೊಡಪ್ಪೆ ||ಅ.ಪ.||
ರಾಮನೆ ಕುಡರಿನ್ ದಕ್‌ನಗ ಕಡಲುಡೆದೀ ಮಣ್ಣಿಂಚಿಗ್ ಬತ್ತ
ಭಾರತದಪ್ಪೆನ ತುಡೆರಡ್ಡೊಂಜಾದೀ ಉದಿತ||
ಸಹ್ಯ ಬೀಣೆದ ತಂತಿಡ್ ದುನಿತ| ದಿಕ್ಕ್‌‌ದಿಕ್ಕ್‌ಗ್ ಪನಿನೀರ್ ಮೈಂದ್‌ನ್ ತಲಿತ|
ಪೊಸರುತುಗಾಯನ ಕಿಲೆತ| ಕಡಲ್ ಬಾನೊನು ಸೂಕೆಡ್ ಪೊದಿತ ||1||
ಸತಿಯಪುತ್ರೆರೆ ಅರಂತಡೇ ತೆನ್ಕಾಯಿಸಾತರೆ ನಿಲೆಇಡೆ| ಆಲೂಪೆರಿಲ್ಲಡೆ
ಪಾಂಡ್ಯೆರೆಗೆಲುನಡೆ ಕನ್ನಡದರಸುಲೆನೆರೆಕರೆ ದಾಲಡೆ
ಬಂಗೆ‌ರ್ ಚೌಟೆ‌ರ್ ಭೈರವ ಅಜಿಲೆರ್ ಸಾಮಂತೆರೆಗಿಂಬೇ|
ತುಳುವೆರ್ ಪರಜನ ಭೇದೊನೆದಾಂತೆನೆ ಮಾತೆರೆಗೀ ಅಂಬೇ ||2||
ಗುಡಿಕುಲೋ ಧರ್ಮೊದ ಪಡಿಕುಲೋ ಪುಣ್ಯ ಸೀರ್ತೊದ ಗಿಂಡೆ ಸುದೆಕುಲೋ
ಬಸದಿಲೊ ಕನಕಲ್ಲಾದ್‌ಲ ನಿಲ ಪುಡದುಂತಿನ ಗುಮ್ಮಟೆರೊ
ನಿನಮೆಯ್ ಕೊಕ್ಕೆರ್ ದುಂತುದು ಪಸರಿನ ಪಜಿರ್‌ದ ಕುರೆಲೋ
ಬದ್ಕ್‌ದ ರಾಗೊಡು ಪಾರ್ದನ ಪನ್ಪಿನ ಪಶುಪಕ್ಕಿಲು ಪಾಂತೆಲೆ ಪೊರ್ಲೋ || 3 ||
ಹಿಂದೂ ಮುಸ್ಲಿಂ ಜೈನ ಕ್ರೈಸ್ತರ್‌ ಒಂಜೇ ಬಂಧುಲು ನಮ್ಮಾ
ಕರ್ತೆ ಒರಿಯೆ ಮಾತೆರೆಗೊರ್ತಿಯೆ ಅಪ್ಪೆ ತುಳುನಾಡಮ್ಮ
ಬಾರಿಪಿರಾಕ್‌ದ ಭೂಮ್ಯಪ್ಪೆ ತೂವೊನು ಪುರು ಜೊಕ್ಲನ ಬಳಕೆ
ತಲ್ಮೆನ ಕೆದುಕಿತ್ತಿ ತಾಮರೆ ಮೋಕೆ ನಿನ್ನೆದೆ ತೊಟ್ಟಿಲ್ಡ್ ತೂಂಕುನ ಬಯಕೆ || 4 ||
ಕುಸಿತ ಬದ್‌ಕೆಂಕೆನ್ನ ಅರಳುವೆ ತುಳುತೆಲಿನೀರ್‌‌ದ ಕೆದುಟೆ
ಎಸಳುದರಡ್ ನಿನ ಪಾದೊಗು ಕಮ್ಮೆನೊ ಪಸರಡ್ ನಿಲಟೆ
ನಟ್ಟೊನುವೆ ಈ ಎನ್ನ ಕಡನಗ ಜಕ್ಕೆಲ್ಡೊಚ್ಚಿದ್ ಮಾನಾಲ
ನಿನ್ನುಡಲ್‌ಡೆ ಪಿರಪುಟ್ಟುದು ಬರ್ಯೆರೆ ಎಡ್ಡೆ ಮದಿಪುನೆ ಕೊರ್ಲ ||5||
ಈ ತುಳುನಾಡಪ್ಪನ ಸುಗಿಪುನು ಕನ್ನಡೊಡ್ ತೌಳವ ಗೀತೆಂದ್ ಬರೆತಿನಾರ್ ರಾಷ್ಟ್ರಕವಿ ಮಂಜೇಶ್ವರ ಗೋವಿಂದ ಪೈಕುಲು. ನೆನ್ನ್ ತುಳುಕ್ಕು ತರ್ಜುಮೆ ಮಲ್ತಿನಾ‌ರ್ ಕವಿ ಡಾ. ಪಾಲ್ತಾಡಿ ರಾಮಕೃಷ್ಣ ಆಚಾರ್. ಈ ಕಬಿತೊನು ಓದುನಗ ಗೋವಿಂದ ಪೈಕುಲೆಗ್ ತುಳುನಾಡ್ಡ ಮಿತ್ತ್ ಏತ್ ಮೋಕೆ ಅಭಿಮಾನೊ ಇತ್ತ್ಂಡ್ಂದ್ ಗೊತ್ತಾಪುಂಡು. ಅರೆನ ಅಪ್ಪೆ ಭಾಷೆ ಕೊಂಕಣಿ ಅಂಡಲಾ ಆರ್ ತುಳುನಾಡ್ದ ಸುಪುತ್ರೆ ಆರ್ ತುಳುವೆ
ರಾಷ್ಟ್ರಕವಿ ಗೋವಿಂದ ಪೈ / 1
