ಸುರುತ ಪಾತರ "ಮದೆಪ್ಪಿಯೆರಾವಂದಿ ತುಳುವರ್" ಇನ್ನಿ ಬೂಕುದ ಮಾಲಿಕೆಡ್, ರಾಮಕಿರೋಡಿಯನ್ನ ಪ್ರೀತಿದ ಹಿರಿಯ ನಾಟಕಕಾರ ದಿ. ದೂಮಪ್ಪ ಮಾಸ್ಟರನ ಬೂಕುದ ಬಿಡುಗಡೆಗ್ ಬಿನ್ನೆ ಆದ್ ಬರೊಡುಂದು ಲೆಪ್ಸರೆ ಪೋಯ್ಕಪಗ ಆರೆನ ಆರೋಗ್ಯ ಎಡ್ಡೆ ಇಜ್ಜಿಂದ್ ಪಂಡ. ಆ ಬರುಜೆ ಇಂದ್ ಆ ಬೂಕುದ ಲೇಖಕಿ ಲೀಲಕ್ಕೆಗ್ ತೆರಿಪಾಯಿನ ಸುದ್ದಿ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರೆಗ್ ತೆರಿಂಡ್. ಪ್ರೊ. ಬಿ.ಎ.ವಿವೇಕ ರೈಕುಲು ಸ್ವತ ಬತ್ತ್ದ್ ಮೋಕೆಡ್ ಒತ್ತಾಯ ಮರ್. ಅರೆನಂಚಿನ ಗೌರವಾನ್ವಿತ ನರಮಾನಿ ಖುದ್ದು ಬತ್ತ್ದ್ ಲೆಪ್ಪುನಗ ಆರ್ ಒತ್ತೊಂಡ ಪಂಡ್ದ್ ಗೊತ್ತಾಂಡ್. ಎನನ್ನಾ ಒರಿ ಬಿನ್ನೆ ಆದ್ ಬರೊಡುಂದು ಕೇನ್ಸೆರ್. ಆಂಡ ಆನಿ ದಾದನ ತುರ್ತು ಜಂಬರ ಇತ್ತಿನಾತ್ರ ಬರಿಯೆರೆ ಆಪುಜಿ ಪಂಡೆ. ಆ ಲೆಪ್ಪುನು ಯಾನ್ ವಿನಯಪೂರ್ವಕ ನಿರಾಕರಣೆ ಮತ್ತೆ. ಇತ್ತೆ ಅವೆನ್ ಎನ್ನಿನಗ ಬಾರೀ ವ್ಯಸನ ಆಪುಂಡು. ಆರೆನ್ ಜೀವೊಪ್ಪ ತೂಪಿನ ಆ ಒಂಜಿ ಭಾಗ್ಯನು ಯಾನ್ ಕಳೆವೊಂದು ಪಶ್ಚಾತ್ತಾಪ ಪಡೆವೊಂದುಲ್ಲೆ. ದಿ.ದೂಮಪ್ಪ ಮಾಸ್ಟರೆನ ಬೂಕು ಬರವೊಂದುಪ್ಪುನಗನೇ ಯಾನ್ ಲೀಲಕ್ಕೆಡ ಪಂಡ. ರಾಮಕಿರೋಡಿಯಾನೆರೆ ಮಿತ್ತ್ ಲಾ ಒಂಜಿ ಬೂಕು ಬರೆವೊಡ್ ಪಂಡ್ದ್ ಅಕಾಡೆಮಿದಕ್ಕು ಅವಕಾಶ ಕೊರುಂಡ ಯಾನ್ಹಾ ಪ್ರಯತ್ನ ಮಲ್ಪುವೆ ಇಂದ್ ಪಂಡೆ. ಅಕಾಡೆಮಿದಕ್ಕೆಡ ಕೇನ್ದ್ ಅನು ಕೊರ್ಪಾವೆ ಪಂಡೆ."ಇನ್ನಿತ್ತ ಇನಿಕ್, ಎಲ್ಲೆದ ಎಲ್ಲೆಗ್ ಪನ್ನಿನ ಗಾದೆದ ಪಾತೆರದ ಲೆಕ್ಕ ಆದ್ ಪೋಂಡು, ಅಕ್ಕು ಅನು ಕೊರ್ಪಿನೆಡ್ ದುಂಬೇ ಆರ್ ಆ ಲೋಕೊಗು ಸಂದಿಯರ್ ♡ ತುಳು ಸಾಹಿತ್ಯ ಅಕಾಡೆಮಿದನ್ನು ತುರ್ತಾದ್ ಒಂಜಿ'ಶ್ರದ್ಧಾಂಜಲಿ' ಸಭೆ ಲೆತ್ತೆ ಇನ್ನಿಸುದ್ದಿ ಕೇಂಡೆ. 'ಶ್ರದ್ಧಾಂಜಲಿ' ಸಭೆಕ್ ಬತ್ತೆ. ದುಕ್ಕೋ ಉರ್ಕುದು ಬತ್ತ್ದ್ ಪಾತರೆರೆ ಸಬ್ಬನೇ ತಿಜಿ. ರುಸಿ ಸಮಾನ ಸತ್ಯ, ಶಾಂತಿ, ತ್ಯಾಗೊಡು ಕೂಡುನ ಆರೆನ ಸ್ಥಿತಪ್ರಜ್ಞ ಜೀವನದ ಆದರ್ಶಲೆನ್ ಎನ್ನಿದ್ ಆರೆನ್ ಕಳೆವೊನಿನ ಎಂಕ್ ಕಣನೀರ್ ಬತ್ತ್ಂಡ್. ಅಂಚಾದ್ ಕಣರ್ ಆರೆಗ್ ಅಶ್ರುತರ್ಪಣ' ಕೊರಿಯೆ. ರಾಮಣ್ಣನ ವಿಸಯೊಡು ಬರೆಯೆರೆ ಮನಸ್ಸೇ ಇತ್ತ್ಂಡ್. ಆಂಡ "ಮದಪ್ಪರಾವಂದಿ ತುಳು ಮಾಲಿಕೆಡ್" ಅತ್ತ್. ಜೀವಪ್ಪ ಉಪ್ಪುನಗನೇ ಬರೆವೊಡು ಪಂಡ್ದ್ ಆಸೆ ಮತ್ತೆ. ಇತ್ತೆ ಎಂಚಲ ತುಳು ಸಾಹಿತ್ಯ ಅಕಾಡೆಮಿದಕ್ಷು ಮಲ್ಲ ಮನಸ್ ಮಲ್ತ್ದ್ ಆ ಅವಕಾಸ ಕೊರ್ಯೆರ್. ಅಕ್ಸೆಗ್ ಎನ್ನ ಉಡಲ್ ದಿಂಜಿದಿ ಸೊಲು. "ಮಾಣಿಕ್ಯ", ಮರೋಳಿ 17-11-1998 ಮುಂಡಪ್ಪ ಬೋಳೂರು
